பாலியல் புகாரில் கைது செய்யப்பட்ட கலாஷேத்ரா முன்னாள் பேராசிரியர் ஸ்ரீஜித் கிருஷ்ணாவுக்கு ஜாமின்

சென்னை: பாலியல் புகாரில் கைது செய்யப்பட்ட கலாஷேத்ரா முன்னாள் பேராசிரியர் ஸ்ரீஜித் கிருஷ்ணாவுக்கு ஜாமின் வழங்கியுள்ளது. கலாஷேத்ரா முன்னாள் பேராசிரியர் ஸ்ரீஜித் கிருஷ்ணாவுக்கு நிபந்தனை ஜாமின் வழங்கி சென்னை ஐகோர்ட் உத்தாவு அளித்துள்ளது.

சென்னை திருவான்மியூரில் உள்ள கலோஷேத்ரா நடனப்பள்ளி மற்றும் கல்லூரியில் கடந்த 1995-2001 காலகட்டத்தில் பயின்ற தற்போது வெளிநாட்டில் வசிக்கும் முன்னாள் மாணவி ஒருவர், அந்த கல்லூரியில் பணியாற்றிய முன்னாள் பேராசிரியரான ஸ்ரீஜித் கிருஷ்ணா தன்னை பாலியல் ரீதியாக துன்புறுத்தியதாக போலீஸில் புகார் அளித்திருந்தார். அதன்பேரில் நீலாங்கரை அனைத்து மகளிர் போலீஸார் வழக்குப்பதிவு செய்து ஸ்ரீஜித் கிருஷ்ணாவை கடந்த ஏப்.22 அன்று கைது செய்தனர்.

இந்த வழக்கில் ஸ்ரீஜித் கிருஷ்ணா ஜாமீன் கோரி சென்னை உயர் நீதிமன்றத்தில் மனு தாக்கல் செய்திருந்தார். இந்த மனு விடுமுறை கால அமர்வில் நீதிபதி சி.சரவணன் முன்பாக விசாரணைக்கு வந்தது. அப்போது மனுதாரர் தரப்பில் மூத்த வழக்கறிஞர் ஜான் சத்யன் ஆஜராகி, “28 ஆண்டுகளுக்கு முன்பாக நடந்ததாக கூறப்படும் இந்த விவகாரத்தில் புகார் கொடுத்த அந்த மாணவிக்கு தற்போது 40 வயதுக்கு மேலாகியிருக்கும். புகார் கொடுத்தவரும் தற்போது இங்கு இல்லை

தற்போது மருத்துவ ரீதியாக எதையும் நிரூபிக்க முடியாது. மனுதாரர் கைதாகி 30 நாட்களுக்கும் மேலாக சிறையில் உள்ளார். அவரை காவலில் எடுத்து போலீஸார் விசாரிக்கவில்லை. பல மாணவிகள் இவரால் பாதிக்கப்பட்டதாக கூறப்படும் நிலையில் இந்த மாணவியைத் தவிர வேறு யாரும் புகார் அளிக்கவில்லை” என்றார்.

தனக்கு உள்ள நற்பெயரை கெடுக்கும் வகையில் இந்த புகார் அளிக்கப்பட்டுள்ளது என்று ஸ்ரீஜித் கிருஷ்ணா தரப்பு வாதம் செய்தது. ஸ்ரீஜித் கிருஷ்ணாவுக்கு எதிராக மற்றொரு பெண்ணும் புகார் அளித்துள்ளார். இன்னும் சிலர் புகாரளிக்க உள்ளதாக கூறி ஸ்ரீஜித் கிருஷ்ணாவுக்கு ஜாமின் வழங்க காவல்துறை எதிர்ப்பு தெரிவித்துள்ளது. ஸ்ரீஜித் கிருஷ்ணா வெளிநாடு செல்ல வேண்டுமென்றால் விசாரணை நீதிமன்றத்தில் உரிய அனுமதி பெற வேண்டும் என ஐகோர்ட் கூறியுள்ளது.