வெஸ்ட்இண்டீசுக்கு எதிரான 2வது டெஸ்ட் டெல்லியில் நாளை தொடக்கம்: வெற்றியை தொடர இந்தியா ஆயத்தம்

புதுடெல்லி: வெஸ்ட்இண்டீஸ் கிரிக்கெட் அணி இந்தியாவில் சுற்றுப்பயணம் மேற்கொண்டு 2 டெஸ்ட்டில் ஆடுகிறது. இதில் அகமதாபாத்தில் நடந்த முதல் டெஸ்ட்டில் இந்தியா இன்னிங்ஸ் மற்றும் 140 ரன் வித்தியாசத்தில் வெற்றி பெற்றது. 2வது டெஸ்ட் புதுடெல்லி அருண்ஜெட்லி மைதானத்தில் நாளை தொடங்குகிறது. இந்தியா பேட்டிங், பந்துவீச்சில் வலுவாக உள்ளது. கே.எல்.ராகுல் சூப்பர் பார்மில் உள்ளார்.

துருவ் ஜூரல், ஜடேஜா ஆகியோரும் முதல் டெஸ்ட்டில் சதம் விளாசினர். குறிப்பாக துணை கேப்டன் ஜடேஜா பேட்டிங் மட்டுமின்றி பந்துவீச்சிலும் அசத்தினார். தமிழக வீரர் சாய்சுதர்சன் தனது திறமையை நிரூபிக்க வேண்டிய கட்டாயத்தில் உள்ளார். இந்த டெஸ்ட்டில் வேகப்பந்து வீச்சாளர் பும்ராவுக்கு ஓய்வு அளிக்கப்பட்டு பிரசித் கிருஷ்ணா இடம்பெறக்கூடும் என தெரிகிறது. மற்றபடி எந்த மாற்றமும் இருக்காது.

மறுபுறம் வெஸ்ட் இண்டீஸ் அணி பேட்டிங், பந்துவீச்சு என இரண்டிலும் பரிதாபமான நிலையில் உள்ளது. முதல் டெஸ்ட்டில் முதல் இன்னிங்சில் 44.1 ஓவரிலும், 2வது இன்னிங்சில 45.1 ஓவரிலும் ஆல்அவுட் ஆனது. பேட்டிங்கில் கேப்டன் ரோஸ்டன் சேஸ், ஷாய் ஹோப், பிராண்டன் கிங் ஆகியோர் சிறப்பாக செயல்பட்டால் தான் இந்தியாவுக்கு சவாலாவது கொடுக்க முடியும். பவுலிங்கில் சொல்லிக்கொள்ளும்படி தாக்கத்தை ஏற்படுத்தும் வகையில் யாரும் இல்லை. இந்த டெஸ்ட்டிலும் இந்தியா வெற்றிபெற்று ஒயிட் வாஷ் செய்யும் முனைப்பில் களம் இறங்குகிறது.

* பேட்டிங்கிற்கு சாதகமான ஆடுகளம்

அகமதாபாத்தில் நடந்த முதல் டெஸ்ட் இரண்டரை நாட்களில் முடிந்தது. இந்தியாவுக்கு சவால் கொடுக்கும் வகையில் வெ.இண்டீஸ் இல்லாததால் போட்டியை பார்க்க ரசிகர்கள் ஆர்வம் காட்டவில்லை. இதனால் முதல் டெஸ்ட்டில் மைதானம் வெறிச்சோடி காணப்பட்டது. ஆனால் கான்பூரில் இந்தியா ஏ - ஆஸி.ஏ அணிகள் மோதிய போட்டியை காண மைதானம் நிரம்பி வழிந்தது. இதனால் 2வது டெஸ்ட்டில் 4 நாட்கள் வரையாவது நடக்கும் வகையில் பேட்டிங்கிற்கு சாதகமான ஆடுகளம் அமைக்கப்பட்டுள்ளது. முதல் 3 நாள் பேட்டிங்கிற்கும், கடைசி 2 நாள் சுழற்பந்துவீச்சுக்கும் ஆடுகளம் சாதகமாக இருக்கும்.

* இதுவரை நேருக்கு நேர்...

இரு அணிகளும் நாளை 102வது டெஸ்ட்டில் மோத உள்ளன. இதற்கு முன் ஆடிய 101 டெஸ்ட்டில் வெஸ்ட்இண்டீஸ் 30,இந்தியா 24ல் வென்றுள்ளன. 47 டெஸ்ட் டிராவில் முடிந்துள்ளது. இந்தியாவுக்கு எதிராக 2002ம் ஆண்டுக்கு பின் டெஸ்ட்டில் வெ.இண்டீஸ் வென்றது இல்லை. கடைசியாக மோதிய 10 டெஸ்ட்டில் இந்தியா 7ல் வென்றுள்ளது. 3 டிராவில் முடிந்துள்ளது.

* டெல்லி மைதானத்தில்...

டெல்லி மைதானத்தில் இந்தியா இதுவரை 35 டெஸ்ட்டில் ஆடி 14ல் வெற்றி, 6ல் தோல்வி அடைந்துள்ளது. 15 போட்டி டிராவில் முடிந்திருக்கிறது. வெஸ்ட்இண்டீஸ் இங்கு 7 டெஸ்ட்டில் ஆடி 2ல் வெற்றி, ஒரு தோல்வி அடைந்துள்ளது. 4 டெஸ்ட் டிராவில் முடிந்திருக்கிறது. கடைசியாக 1987ல் இங்கு வெஸ்ட்இண்டீசுக்கு எதிராக இந்தியா தோல்வி அடைந்திருந்தது. அதன் பின்னர் ஆடிய 13 டெஸ்ட்டில் 11ல் வென்றுள்ளது. 2 டிராவில் முடிந்திருக்கிறது. டெண்டுல்கர் இங்கு 10 டெஸ்ட்டில் 2 சதத்துடன் 759 ரன் எடுத்துள்ளார். பவுலிங்கில் கும்ப்ளே 7 டெஸ்ட்டில் 58 விக்கெட் எடுத்து டாப்பில் உள்ளார்.

* வீரர்களுக்கு காம்பீர் விருந்து

இந்திய கிரிக்கெட் வீரர்கள் வெ.இண்டீசுக்கு எதிரான 2வது டெஸ்ட்டில் ஆட டெல்லி சென்றுள்ளனர். இந்நிலையில் தலைமை பயிற்சியாளர் கவுதம் காம்பீர் இந்திய வீரர்கள் மற்றும் பயிற்சியாளர்கள் குழுவினருக்கு நேற்றிரவு தனது வீட்டில் டின்னர் விருந்து அளித்தார்.