வாக்காளர் இறந்த தேதி தெரியவில்லை என்றால் நிரந்தரமாக இடம் பெயர்ந்தவர் என்று பதிவு: எஸ்ஐஆர் பதிவில் தொடரும் குளறுபடி

சென்னை: எஸ்ஐஆர் பதிவில் இறந்தவர்களின் தேதி பற்றிய விவரம் தெரியவில்லை என்றால், இறந்தவர்களை நிரந்தரமாக இடம் பெயர்ந்தவர்கள் என்று பதியும் நிலை ஏற்பட்டுள்ளது. தமிழகத்தில் பல்வேறு எதிர்ப்புகளுக்கு மத்தியில் வாக்காளர் பட்டியல் சிறப்பு தீவிர திருத்தம் பணி (எஸ்ஐஆர்) நடந்து வருகிறது. இந்த பணி தொடங்கியது முதல் எஸ்ஐஆர் கணக்கீட்டு படிவம் (எனுமரேஷன் பார்ம்) வரை எத்தனை பிரச்னைகள், எத்தனை குழப்பங்கள் இருந்தது என்பது அந்த படிவத்தை நிரப்பியவர்களுக்கு தான் தெரியும். எவ்வளவு பெரிய அறிவாளியாக இருந்தாலும், எவ்வளவு படித்தவர்களாக இருந்தாலும் எனுமரேஷன் பார்ம் நிரப்புவதில் கடும் குழப்பத்திற்கு ஆளாகினர்.

எனுமரேஷன் பார்மில் முதலில் நம்முடைய விவரங்களைக் கேட்டு இருக்கிறார்கள். அதற்கு அடுத்தபடியாக, முந்தைய வாக்காளர் திருத்தப் பட்டியலில் உள்ள வாக்காளரின் உறவினரின் பெயர் கேட்கப்பட்டிருக்கிறது. உறவினர் என்றால் யார்? அப்பாவா? அம்மாவா? அண்ணனா? தங்கையா? கணவனா? மனைவியா? பிள்ளைகளா? யார் என்பதில் ஒரு தெளிவு இல்லாமல் இருந்தது. வாக்காளரின் உறவினர் பெயர் என்று சொல்லப்பட்டிருக்கும் இடத்தில், முதலில் பெயரும், பிறகு, வாக்காளரின் புகைப்பட அடையாள அட்டை எண் என்றும் கேட்கப்பட்டிருக்கிறது. மூன்றாவதாக, மீண்டும் உறவினர் பெயர் என்று கேட்கப்பட்டிருக்கிறது.

முதலில் யார் பெயரை எழுத வேண்டும்? எந்த வாக்காளர் விண்ணப்பிக்கிறாரோ அவர் பெயரா? அல்லது உறவினர் பெயரா? என்பது தெளிவு இல்லாமல் இருந்தது. இவ்வாறு, முதல் கோணல் முற்றிலும் கோணல் என்ற கதையாக, அனைத்து இடத்திலும் குழப்பம்தான். அதே நேரத்தில் இந்த பணியில் அமர்த்தப்பட்ட பிஎல்ஓக்களுக்கே எஸ்ஐஆர் படிவம் குறித்து முழுமையாக செயலாக்குவதில் தொடர்ந்து சிரமங்களை எதிர்கொள்வதாக தெரிவித்தனர். இவ்வளவு குளறுபடிகளுக்கு மத்தியில் மேலும் ஒரு சம்பவம் அரங்கேறியுள்ளது.

எஸ்ஐஆர் படிவத்தில் வாக்காளர்களின் உறவினர்களின் இறப்பு விவரங்களை பதிவு செய்ய வேண்டும். இறப்பு தேதி தெரிந்தால் பிரச்னை இல்லை. இறப்பு விவரத்தை பதிவு செய்து விடலாம். ஆனால் பெரும்பாலானவர்களுக்கு இறப்பு தேதி உள்ளிட்ட விவரம் தொடர்பான எந்த ஆதாரமும் இல்லை. இதனால், இறப்பு வகைப்படுத்தப்பட்ட பட்டியலில் பிஎல்ஓக்கள் பதிவு செய்வதில் பல பிரச்னைகள் ஏற்பட்டுவருகிறது. அதாவது பிஎல்ஓக்களிடம் உள்ள மொபைல் செயலியில் தேதியை இறப்பு தேதி ஆண்டை குறிப்பிடாமல் ஒரு வாக்காளரை இறந்ததாக பதிய அனுமதிப்பது இல்லை. இதனால் இறப்பு குறித்த தேதி ஆண்டு போன்ற விவரம் தெரியாதவர்களை, கணக்கெடுப்பின் போது, ‘நிரந்தரமாக இடம் பெயர்ந்தவர்கள்’ என்று பட்டியலிடப்பட்டு பதிவு செய்து வருகின்றனர்.

சென்னை சேப்பாக்கம்-திருவல்லிக்கேணி சட்டமன்ற தொகுதியைச் சேர்ந்த ஒரு பிஎல்ஓ, தனது வாக்குச் சாவடியில் மட்டும் 120 வாக்காளர்கள் இறந்துள்ளதாக அடையாளம் கண்டுள்ளார். அதில் 10 பேரின் உறவினர்கள் மட்டும் சரியான இறப்பு தேதியை கூறினர். மற்றவர்களுக்கு இறந்த தகவல் தெரியவில்லை. இதனால் இறந்தோர் வகைப்பாட்டில் அவர்களை சேர்க்க ‘ஆப்’ அனுமதி மறுக்கிறது. எனவே அவர்களை ‘நிரந்தரமாக இடம் பெயர்ந்தவர்கள்’ என்று பதிந்து வருகிறோம்” என்றார்.