வாக்காளர் பட்டியல் சிறப்பு தீவிர திருத்தப் பணி படிவங்கள் ஒப்படைக்க டிச.11 வரை அவகாசம்: வரைவு வாக்காளர் பட்டியல் டிசம்பர் 16ம் தேதி வெளியாகும்; தேர்தல் ஆணையம் அறிவிப்பு

சென்னை: வாக்காளர் பட்டியல் சிறப்பு தீவிர திருத்த (எஸ்ஐஆர்) படிவத்தை பூர்த்தி செய்து ஒப்படைப்பதற்கான கால அவகாசம் வருகிற 4ம் தேதி முடிவடைய இருந்த நிலையில், கால அவகாசத்தை டிசம்பர் 11ம் தேதி வரை நீட்டிப்பு செய்து தேர்தல் ஆணையம் அறிவிப்பு வெளியிட்டுள்ளது. வரைவு வாக்காளர் பட்டியல் 16ம் தேதி வெளியிடப்படும் என்று அறிவிக்கப்பட்டுள்ளது.

இந்திய தேர்தல் ஆணையம் சுமார் 21 ஆண்டுகளுக்கு பிறகு முதல்கட்டமாக பீகாரில் எஸ்ஐஆர் பணியை நடத்தியது. இதில் சுமார் 65 லட்சம் வாக்காளர்கள் அதிரடியாக நீக்கப்பட்டனர். இதற்கு எதிர்க்கட்சியினர் கடும் கண்டனம் தெரிவித்தனர். குறிப்பாக எதிர்க்கட்சி தலைவர் ராகுல் காந்தி பீகாரில் எஸ்ஐஆர் மூலம் வாக்குகள் திருட முயற்சி நடப்பதாக குற்றம் சாட்டினார். வாக்கு திருட்டில் பாஜக மற்றும் தேர்தல் ஆணையம் ஈடுபட்டுள்ளது. அதை நாங்கள் செய்ய அனுமதிக்க மாட்டோம் என்று கடும் கண்டனம் தெரிவித்திருந்தார்.

அதன் தொடர்ச்சியாக 2ம் கட்டமாக தமிழகம், கேரளா, புதுச்சேரி, மேற்குவங்கம் மற்றும் சத்தீஸ்கர், கோவா, குஜராத், மத்தியப் பிரதேசம், ராஜஸ்தான், உத்திரப் பிரதேசம் என 9 மாநிலங்கள் மற்றும் அந்தமான் நிகோபார் தீவுகள், புதுச்சேரி, லட்சத்தீவு ஆகிய 3 யூனியன் பிரதேசங்கள் உள்ள 12 மாநிலங்களில் எஸ்ஐஆர் பணி நடைபெறும் என்று தேர்தல் ஆணையம் அறிவித்தது.

தமிழ்நாட்டில் அடுத்த ஆண்டு (2026) ஏப்ரல் மாதம் சட்டப்பேரவை தேர்தல் நடைபெற உள்ளது. இந்த நிலையில் தமிழகத்தில் டிசம்பர் 4ம் தேதி முதல் எஸ்ஐஆர் பணி தொடங்கப்படும் என்று தேர்தல் ஆணையம் அறிவித்தது. இதற்கு திமுக தலைவர் தமிழ்நாடு முதல்வர் மு.க.ஸ்டாலின் கடும் கண்டனம் தெரிவித்து இருந்தார். ‘‘வாக்காளர் பட்டியல் சிறப்பு தீவிர திருத்தத்தை அவசர அவசரமாகச் செய்யக் கூடாது. கால அவகாசம் கொடுத்து செய்ய வேண்டும். நடைமுறைச் சிக்கல்கள் இல்லாமல் செய்ய வேண்டும். ஏப்ரல் மாதம் தேர்தலை வைத்துக் கொண்டு இப்போது இதனைச் செய்ய தொடங்குவது சரியானது அல்ல. முறையானது அல்ல. எனவே வாக்காளர் பட்டியல் சிறப்பு சீர்திருத்தத்தை நாங்கள் எதிர்க்கிறோம்’’ என்றார்.

முதல்வர் தலைமையில் நடந்த அனைத்துக்கட்சிகளின் கூட்டத்தில் எஸ்ஐஆருக்கு கடும் எதிர்ப்பு தெரிவிக்கப்பட்டது. அனைத்துக் கட்சிக் கூட்ட தீர்மானத்தின்படி உச்சநீதிமன்றத்தில் வழக்கு தொடரப்பட்டது. தமிழகத்தில் கடும் எதிர்ப்புக்கு மத்தியில் வாக்காளர் பட்டியல் சிறப்பு தீவிர திருத்தப் பணியை கடந்த 4ம் தேதி முதல் தேர்தல் ஆணையம் தொடங்கியது. வாக்காளர் கணக்கீட்டுப் படிவங்கள் வழங்கி திரும்ப பெறும் பணியினை டிசம்பர் 4ம் தேதிக்குள் முடித்திட அறிவுறுத்தப்பட்டது. அதன் அடிப்படையில், வாக்காளர்களிடமிருந்து பெறப்பட்ட கணக்கீட்டுப் படிவங்கள் இந்திய தேர்தல் ஆணைத்தின் செயலியில் பதிவேற்றம் செய்யும் பணி தீவிரமாக மேற்கொள்ளப்பட்டு வந்தது. இப்பணியை முழுமையாக பூர்த்தி செய்திடும் வகையிலும், வாக்காளர்கள் இறுதிநாளான டிசம்பர் 4ம் தேதி வரை காத்திருக்காமல் தங்களுக்கு வழங்கப்பட்ட படிவங்களைப் பூர்த்தி செய்து சம்பந்தப்பட்ட வாக்குச்சாவடி நிலை அலுவலர்களிடம் விரைந்து வழங்கிட வேண்டும் என்று அறிவுறுத்தப்பட்டிருந்தது. அதே நேரத்தில் தமிழகத்தில் புயலால் பல்வேறு மாவட்டங்களில் கடுமையாக மழை பெய்தது. இதனால், எஸ்ஐஆர் பணி பல இடங்களில் பாதிக்கப்பட்டது.

இதனால், எஸ்ஐஆர் விண்ணப்பிக்கும் காலக்கெடுவை நீட்டிக்க வேண்டும் என்று அரசியல் கட்சியினர் மற்றும் பல்வேறு தரப்பில் இருந்து கோரிக்கைகள் வந்த வண்ணம் இருந்தன. ஆனால், தேதி நீட்டிப்புக்கான எந்த அறிகுறியும் இல்லாமல் இருந்தது. இந்த நிலையில் திடீரென எஸ்ஐஆர் படிவங்களை சமர்ப்பிக்க டிசம்பர் 11ம் வரை கால அவகாசம் வழங்கி இந்திய தேர்தல் ஆணையம் நேற்று அறிவிப்பு வெளியிட்டது. இந்த அறிவிப்பு தமிழகம், கேரளா, மேற்குவங்கம், சத்தீஸ்கர், கோவா, குஜராத், ம.பி., ராஜஸ்தான், உ.பி என 9 மாநிலங்கள் மற்றும் அந்தமான் நிகோபார் தீவுகள், புதுச்சேரி, லட்சத்தீவு ஆகிய 3 யூனியன் பிரதேசங்களுக்கும் பொருந்தும் என தேர்தல் ஆணையம் தெரிவித்துள்ளது.

தேர்தல் ஆணையம் வெளியிட்ட அறிவிப்பில் கூறியிருப்பதாவது: எஸ்ஐஆர் கணக்கீட்டுப் படிவங்களைப் பெற்றுக்கொண்ட வாக்காளர்கள் தங்கள் படிவங்களை பூர்த்தி செய்து வரும் 11ம் தேதி வரை பிஎல்ஓ-க்கள் அல்லது வாக்காளர் உதவி மையத்தில் சமர்ப்பிக்கலாம். அதன் பிறகு டிசம்பர் 12ம் தேதி முதல் 15ம் தேதி வரை அட்டவணை புதுப்பித்தல் மற்றும் வரைவு பட்டியல் தயாரித்தல் பணிகள் நடைப்பெறும். வரைவு வாக்காளர் பட்டியல் டிசம்பர் 16ம் தேதி வெளியிடப்படும். வாக்காளர் பட்டியலில் கோரிக்கைகள், ஆட்சேபம் இருந்தால் டிசம்பர் 16ம் தேதி முதல் ஜனவரி 15ம் தேதி வரை தெரிவிக்கலாம். பின்னர் அவை டிசம்பர் 16ம் தேதி முதல் பிப்ரவரி 7ம் தேதிக்குள் சரிபார்க்கப்படும். தொடர்ந்து இறுதி வாக்காளர் பட்டியல் பிப்ரவரி 14ம் தேதி வெளியிடப்படும்.இவ்வாறு கூறப்பட்டுள்ளது. இறுதி வாக்காளர் பட்டியலில் பெயர் இருந்தால் மட்டுமே, அடுத்த ஆண்டு நடைபெற உள்ள சட்டப்பேரவை தேர்தலில் வாக்களிக்க முடியும் என்பது குறிப்பிடத்தக்கது.