யுஎஸ் ஓபன் டென்னிஸ் திக்... திக்... த்ரில்லரில் காஃப் வெற்றி வாகை

நியூயார்க்: யுஎஸ் ஓபன் டென்னிஸ் மகளிர் ஒற்றையர் பிரிவு முதல் சுற்றுப் போட்டியில் நேற்று, அமெரிக்க வீராங்கனை கோகோ காஃப் போராடி வெற்றி பெற்று 2வது சுற்றுக்கு முன்னேறினார். அமெரிக்காவின் நியூயார்க் நகரில், கிராண்ட் ஸ்லாம் போட்டிகளில் ஒன்றான யுஎஸ் ஓபன் டென்னிஸ் போட்டிகள் நடந்து வருகின்றன. நேற்று நடந்த மகளிர் ஒற்றையர் பிரிவு போட்டி ஒன்றில், அமெரிக்காவை சேர்ந்த உலகின் 3ம் நிலை வீராங்கனை கோகோ காஃப் (21), ஆஸ்திரேலியா வீராங்கனை அஜிலா டோம்லஜனோவிக் (32) உடன் மோதினார். முதல் செட்டை 6-4 என்ற புள்ளிக் கணக்கில் எளிதில் கைப்பற்றிய காஃப், 2வது செட்டில் கடுமையாக போராட நேரிட்டது. டைபிரேக்கர் வரை நீண்ட அந்த செட்டை, 7-6 (7-2) என்ற புள்ளிக் கணக்கில் அஜிலா கைப்பற்றினார்.

அதையடுத்து வெற்றியை தீர்மானிக்கும் 3வது செட்டை, சுதாரித்து ஆடிய காஃப், 7-5 என்ற புள்ளிக் கணக்கில் வசப்படுத்தினார். அதனால், 2-1 என்ற செட் கணக்கில் வென்ற காஃப், 2வது சுற்றுக்கு முன்னேறினார்.

மற்றொரு முதல் சுற்றுப் போட்டியில் ஜப்பான் வீராங்கனை நவோமி ஒஸாகா (27), பெல்ஜியம் வீராங்கனை கிரீட் மினென் (28) உடன் மோதினார். இப்போட்டியில் அதிரடியாக ஆடிய ஒஸாகா, 6-3, 6-4 என்ற நேர் செட் கணக்கில் வென்றார். நேற்றைய போட்டிகளில், ரஷ்ய வீராங்கனை அனஸ்டாஸியா ஸாகரோவா, குரோஷியா வீராங்கனை டோனா வெகிக், அமெரிக்க வீராங்கனை ஹேலி பாப்டிஸ்டே, ரோமானிய வீராங்கனை ஸொரானா கிறிஸ்டீ உள்ளிட்டோர் வெற்றி பெற்று 2வது சுற்றுக்கு தகுதி பெற்றனர்.

* ஆடவர் பிரிவு முதல் சுற்று விறுவிறு ஆட்டத்தில் ஸ்வெரெவ் அபாரம்

யுஎஸ் ஓபன் ஆடவர் ஒற்றையர் டென்னிஸ் போட்டியில், ஜெர்மன் வீரர் அலெக்சாண்டர் ஸ்வெரெவ் (28), சிலி வீரர் அலெஜாண்ட்ரோ அல்வரெஸ் (28) மோதினர். முதல் செட்டில், 6-2 என்ற புள்ளிக் கணக்கில் எளிதில் வென்ற ஸ்வெரெவ், 2வது செட் டைபிரேக்கர் வரை நீண்டதால், 7-6 (7-4) என்ற புள்ளிக்கில் போராடி கைப்பற்றினார். அதைத் தொடர்ந்து 6-4 என்ற புள்ளிக் கணக்கில் 3வது செட்டையும் கைப்பற்றி, 2வது சுற்றுக்கு முன்னேறினார். நேற்று நடந்த ஆடவர் பிரிவு போட்டிகளில், அமெரிக்காவின் டாம்மி பால், பிரிட்டன் வீரர் ஜேகப் பியர்ன்லி, ரஷ்ய வீரர் ரோமன் ஸபியுலின், ஆஸ்திரேலியா வீரர் அலெக்ஸ் டி மினார் உள்ளிட்டோர் வெற்றி வாகை சூடினர்.