யுஎஸ் ஓபன் டென்னிஸ் அரையிறுதியில் சின்னர்-பெலிக்ஸ்; ஒசாகா-அமண்டா

நியூயார்க்: அமெரிக்காவில் நடைபெறும் யுஎஸ் ஓபன் கிராண்ட் ஸ்லாம் போட்டியில் நேற்றுடன் ஒற்றையர் பிரிவு காலிறுதி ஆட்டங்கள் முடிந்தன. ஆண்கள் பிரிவு காலிறுதியில் கனடாவின் பெலிக்ஸ் அகர் 4-6, 7-6(9-7), 7-5, 7-6(7-4) என்ற செட்களில் ஆஸ்திரேலியாவின் அலெக்ஸ் டி மினவரைகடுமையாக போராடி வென்று அரையிறுதிக்கு முன்னேறினார். இந்த ஆட்டம் 4 மணி 10 நிமிடங்கள் நீண்டது.

மற்றொரு ஆட்டத்தின் இத்தாலி வீரர்கள் நடப்பு சாம்பியன் ஜானிக் சின்னர், லாரன்சோ முசெட்டி ஆகியோர் மோதினர். இதில் 6-1, 6-4, 6-2 என நேர் செட்களில் சின்னர் வெற்றிப் பெற்று அரையிறுதிக்கு முன்னேறினார். நாளை நடைபெறும் 2வது அரையிறுதியில் பெலிக்ஸ்-சின்னர் மோத உள்ளனர். முதல் அரையிறுதியில் முன்னாள் சாம்பியன்கள் செர்பியாவின் நோவக் ஜோகோவிச், ஸ்பெயினின் கார்லோஸ் அல்கராஸ் பலப்பரீட்சை நடத்த உள்ளனர்.

பெண்கள் பிரிவில் காலிறுதி போட்டியில் முன்னாள் நம்பர் 1 வீராங்கனை போலாந்தின் இகா ஸ்வியாடெக், அமெரிக்காவின் அமண்டா அனிஸ்மோவா ஆகியோர் மோதினர். இதில் அமண்டா 6-4, 6-3 என நேர் செட்களில் வெற்றிப் பெற்று அரையிறுதிக்கு முன்னேறினார். கடந்த முறை பைனல் வரை முன்னேறிய ஸ்வியாடெக் இந்த முறை காலிறுதியில் அதிர்ச்சி தோல்வியடைந்து வெளியேறினார். மேலும், ஜூலை மாதம் நடந்த விம்பிள்டன் பைனலில் தன்னை தோற்கடித்த ஸ்வியாடெக்குக்கு, இந்த காலிறுதியில் அமண்டா பதிலடி கொடுத்துள்ளார்.

இன்னொரு காலிறுதியில் செக் குடியரசின் கரோலின் முகோவா, முன்னாள் சாம்பியன் ஜப்பானின் நவோமி ஒசாகா ஆகியோர் களம் கண்டனர். இதில் 6-4, 7-6(7-3) என்ற நேர் செட்களில் ஒசாகா போராடி வென்று அரையிறுதிக்கு முன்னேறினார். இந்த வெற்றியின் மூலம் கிராண்ட் ஸ்லாம் போட்டிகளில் காலிறுதியில் தோற்றதே இல்லை என்ற வரலாறையும் தக்க வைத்தார்.

இன்று நடைபெற உள்ள 2வது அரையிறுதியில் ஒசாகா-அமெண்டா ஆகியோர் களம் காண இருக்கின்றனர். முதல் அரையிறுதியில் நடப்பு சாம்பியன் பெலாரசின் அரினா சபலென்கா, அமெரிக்காவின் ஜெசிகா பெகுலா(31வயது, 4வது ரேங்க்) ஆகியோர் மோத உள்ளனர்.

யூகி போம்ரி இணை சாதனை வெற்றி

யுஎஸ் ஓபன் போட்டியில் இந்தியர்கள் ஆண்களுக்கான இரட்டையர் பிரிவில் மட்டும் களம் கண்டனர். அவர்களில் பலர் முதல், 2வது சுற்றுடன் வெளியேறினர். ஆனால் 3வது சுற்றிலும் முதல் முறையாக வென்று யூகி போம்ரி (இந்தியா), மிக்கேல் வீனஸ் (ஆஸ்திரேலியா) இணை காலிறுதிக்கு முன்னேறியது. நேற்று நடந்த காலிறுதியில் நட்சத்திர வீரர் ராஜீவ் ராம் (அமெரிக்கா)/நிகோலா மெக்டிக் (குரோஷியா) இணையுடன் யூகி ஜோடி மோதியது. இதில் யூகி இணை 6-3, 6-7(6-8), 6-3 என்ற செட்களில் வெற்றிப் பெற்று அரையிறுதிக்கு அசத்தலாக முன்னேறியது. இந்த ஆட்டம் 2 மணி நேரம் 37 நிமிடங்கள் நடந்தது. இந்த வெற்றியின் மூலம் யூகி போம்ரி முதல் முறையாக கிராண்ட் ஸ்லாம் போட்டியில் அரையிறுதிக்கு முன்னேறி உள்ளது குறிப்பிடதக்கது.

ஜோகோவிச் போட்டியை கண்டு ரசித்த தோனி

ஆண்கள் காலிறுதியில் ஜோகோவிச், டெய்லர் ப்ரிட்ஸ் மோதினர். இதில் 3-10 என்ற செட் கணக்கில் ஜோகோவிச் வெற்றி பெற்று அரையிறுதிக்கு முன்னேறினார். இந்த போட்டியை இந்திய கிரிக்கெட் அணியின் முன்னாள் கேப்டன் தோனி நேரில் கண்டுகளித்தார்.