அனல் மின் நிலைய ஊழியர்களுக்கு மாதந்தோறும் இனி 2 சனிக்கிழமை லீவு: மின் வாரியம் உத்தரவு

சென்னை: அனல் மின்நிலைய ஊழியர்களுக்கு இனி மாதந்தோறும் இரண்டு சனிக்கிழமைகளுக்கு விடுமுறை அளிக்கப்படுவதாக மின்வாரியம் தரப்பில் உத்தரவு பிறப்பிக்கப்பட்டுள்ளது.

இதுகுறித்து வெளியிடப்பட்டுள்ள அறிக்கையில் கூறியிருப்பதாவது:

மின் வாரியத்துக்கு தற்போது வடசென்னை, மேட்டூர், தூத்துக்குடியில் 5,120 மெகாவாட் திறனில் 5 அனல் மின் நிலையங்கள் உள்ளன. அனல் மின் நிலையங்களில் பணிபுரியும் ஊழியர்களுக்கு, அனைத்து சனிக்கிழமையும் வேலை நாளாக உள்ளது. ஆனால் வாரிய அலுவலகங்கள், மின் கட்டண மையங்களுக்கு, இரண்டாவது சனிக்கிழமை விடுமுறையாகவும், மற்ற சனிக்கிழமை வேலை நாளாகவும் இருந்தது. கடந்த 2018 மார்ச் மாதம் முதல் நான்காவது சனிக்கிழமையும் விடுமுறை விடப்படுகிறது.

இந்நிலையில் அனல் மின் நிலையங்களில் வழக்கமான பணிகளில் உள்ளவர்களுக்கு 2வது மற்றும் 4வது சனிக்கிழமைகளில் விடுமுறை வழங்க வேண்டும் என தொழிற்சங்கங்கள் தொடர்ந்து கோரிக்கை வைத்து வந்தன. இந்த கோரிக்கையை பரிசீலித்த மின் வாரியம் அனல் மின் நிலையங்களின் ஊழியர்களுக்கும் இனி இரண்டாவது, நான்காவது சனிக்கிழமை விடுமுறை அறிவித்துள்ளது. காலை, 8:30 மணி முதல் மாலை, 5:30 வரை இருந்த பணி நேரம், மாலை, 5:45 மணி வரை நீட்டிக்கப்பட்டு உள்ளது.

மேலும் குறைந்த அளவில் பணியாளர் பராமரிப்பு பணிகளில் சுழற்சி முறையில் ஈடுபடலாம். அன்றைய தினம் பணிக்கு வருவோருக்கு மாற்று விடுப்பு மட்டுமே வழங்கப்படும், கூடுதல் சம்பளம் வழங்கப்படாது.