புயல், மழை வேகம் குறைந்ததை தொடர்ந்து தென்மாவட்டங்களுக்கு இன்று விமான சேவை துவக்கம்

மீனம்பாக்கம்: தென்மாவட்டங்களான திருச்சி, மதுரை, தூத்துக்குடி மாவட்டங்களில் டிட்வா புயல் மற்றும் மழையின் வேகம் குறைந்ததைத் தொடர்ந்து, அப்பகுதிகளில் வழக்கம் போல் இன்று காலை முதல் மீண்டும் விமான சேவை துவங்கியது. இதற்கு விமானப் பயணிகள் மகிழ்ச்சி தெரிவித்தனர். மேலும், சென்னையில் இருந்து யாழ்ப்பாணம் செல்லும் 2 விமான சேவைகள் இன்று ரத்து செய்யப்பட்டு உள்ளன.

தமிழ்நாட்டில் வடகிழக்கு பருவமழை உச்சகட்ட வேகத்தில் உள்ளது. மேலும், தென்கிழக்கு வங்கக் கடலில் உருவான குறைந்த காற்றழுத்து தாழ்வு மண்டலம், டிட்வா புயலாக உருமாறியதால் தென்மாவட்டங்கள், மத்திய மாவட்டங்கள், டெல்டா மாவட்டங்கள் கனமழையினால் வெகுவாக பாதிக்கப்பட்டன. அதோடு, சென்னையை நோக்கி டிட்வா புயல் நகர்வதாக கூறப்பட்டதால், சென்னை புறநகர் பகுதிகளில் நாள் முழுவதும் விட்டுவிட்டு தொடர் மழை பெய்தது.

இதையடுத்து, சென்னை விமானநிலையத்தில் இருந்து நேற்று தூத்துக்குடி, திருச்சி, மதுரை, சேலம், யாழ்ப்பாணம், கொழும்பு ஆகிய இடங்களுக்கு செல்லும் விமானங்களின் வருகை, புறப்பாடு மற்றும் பெங்களூர்-தூத்துக்குடி, புதுச்சேரி-ஐதராபாத் உள்பட பல்வேறு இடங்களுக்கு செல்லும் 54 விமானங்களின் வருகை, புறப்பாடு ரத்து செய்யப்பட்டன.

குறிப்பாக, சிறிய ரக ஏடிஆர் விமானங்கள் அனைத்தும் ரத்து செய்யப்பட்டன. இதையடுத்து இன்றும் புயல், மழை மிரட்டல் தொடர்ந்து, சென்னை விமான நிலையத்தில் 2வது நாளாக பெரும்பாலான விமான சேவைகள் ரத்து செய்யப்படும் வாய்ப்பு உள்ளது என்று எதிர்பார்க்கப்பட்டது. எனினும், சென்னை மற்றும் புறநகர் பகுதிகளில் தற்போது மழையின் வேகம் ஓரளவு குறைந்துள்ளது.

மேலும் திருவள்ளூர், ராணிப்பேட்டை மாவட்டங்களுக்கு இந்திய வானிலை மையம் ரெட் அலர்ட் விடுத்துள்ளதால், சென்னை புறநகர் பகுதிகள் ஓரளவு மழை பாதிப்பிலிருந்து தப்பித்ததாகத் தெரியவருகிறது. இதைத் தொடர்ந்து, சென்னை விமானநிலைய உள்நாட்டு முனையத்தில் நேற்று முழுமையாக நிறுத்தி வைக்கப்பட்டு இருந்த மதுரை, திருச்சி, தூத்துக்குடி, சேலம் ஆகிய தென்மாவட்ட பகுதிகளுக்கு செல்லும் விமானங்களின் சேவைகள் இன்று காலை முதல் மீண்டும் வழக்கம் போல் இயங்கத் துவங்கியுள்ளன.

இதில், இன்றும் சென்னையில் இருந்து யாழ்ப்பாணம் சென்று வரும் 2 விமானங்களின் சேவைகள் மட்டும் ரத்து செய்யப்பட்டு உள்ளன. எனினும், அதே நேரத்தில் தாங்கள் பயணிக்க வேண்டிய விமானங்கள் குறித்து, அந்தந்த ஏர்லைன்ஸ் நிறுவனங்களை விமானப் பயணிகள் தொடர்பு கொண்டு, தங்களின் விமானங்கள் இயங்கும் நேரங்களை கேட்டு தெரிந்து பயணத்தை மேற்கொள்ள வேண்டும் என்று சென்னை விமான நிலைய அதிகாரிகள் தகவல் தெரிவிக்கின்றனர்.