திருத்த நீட்டிப்பு

தமிழகத்தில் கடந்த மாதம் 4ம் தேதி எஸ்ஐஆர் எனப்படும் சிறப்பு தீவிர வாக்காளர் பட்டியல் திருத்த பணிகள் தொடங்கின. வாக்காளர் பட்டியல் திருத்தம் என்பதே தேர்தல் கமிஷன், ஒன்றிய பாஜ அரசோடு இணைந்து நடத்தும் தில்லுமுல்லு வேலை என்பது பல மாநிலங்களில் நிரூபணம் செய்யப்பட்டுள்ளது. பாஜ அரசின் வாக்கு திருட்டுக்கு எஸ்ஐஆர் என்பது ஒரு புறவாசலாக இருப்பதை எதிர்கட்சி தலைவர் ராகுல்காந்தி பலமுறை ஆதாரங்களோடு அம்பலப்படுத்தி உள்ளார். தமிழ்நாடு மட்டுமின்றி கேரளா, மேற்கு வங்க மாநிலங்களும் இந்த சிறப்பு தீவிர திருத்த பணிகளுக்கு எதிர்ப்பு தெரிவித்து வருகின்றன. மக்களை சந்திக்க தெம்பற்ற பாஜ, குறுக்கு வழியில் ஆட்சி அதிகாரங்களை கைப்பற்ற எஸ்ஐஆர் திருத்த பணிகளை கையில் எடுத்துள்ளது.

தமிழகத்தில் எஸ்ஐஆர் பணிகள் தொடங்கியபோதே திமுக கூட்டணி கட்சிகள் எதிர்ப்பு தெரிவித்து ஆர்ப்பாட்டம் நடத்தின. தொடர்ந்து இப்பணிகளை நிறுத்தி வைக்கக்ேகாரி திமுக சார்பில் உச்சநீதிமன்றத்தில் வழக்கும் தொடரப்பட்டது. ஆனால் வழக்கம் போல் பாஜவின் தலையாட்டி பொம்மையாக உள்ள அதிமுக, எஸ்ஐஆருக்கு ஆதரவாக உச்சநீதிமன்றத்தில் முறையிட்டுள்ளது. தமிழகத்தில் வாக்காளர் பட்டியல் சிறப்பு திருத்தத்திற்கு கால அவகாசமும் குறைவாக அளிக்கப்பட்டது. திமுக கூட்டணி கட்சிகள் இதை தொடக்கத்தில் இருந்தே கூறிக் கொண்டிருக்கும் நிலையில், அனைத்து மாவட்டங்களிலும் தேர்தல் அதிகாரிகள் காலநீட்டிப்பு செய்யப்பட மாட்டாது என உறுதியாக தெரிவித்து வந்தனர். இந்நிலையில் தற்போது டிசம்பர் மாதம் பிறந்துவிட்ட நிலையில், எதிர்பார்த்தது போலவே திருத்த பணிகளை முடிக்க முடியவில்லை.

வேறுவழியின்றி இப்போது தேர்தல் ஆணையம் தனது முடிவில் பின்வாங்கி, வரும் 11ம் தேதி வரை பூர்த்தி செய்யப்பட்ட படிவங்களை ஒப்படைக்கலாம் என தெரிவித்துள்ளது. அடுத்தாண்டு சட்டசபை தேர்தலை ஒட்டி வாக்காளர் பட்டியல் திருத்த பணிகளை அவசரம், அவசரமாக மேற்கொள்ளும்போது, அதில் பல குளறுபடிகள் நடக்கவும் வாய்ப்புகள் உள்ளன. குறிப்பாக கடந்த 2001 மற்றும் 2005ம் ஆண்டுக்கான திருத்தம் குறித்து கேள்விகளுக்கு பதில் அளிக்க முடியாமல் பலரும் திணறுகின்றனர். அதை கணினியில் தேடிக் கண்டுபிடித்து எழுதி கொண்டு வாருங்கள் என தேர்தல் அலுவலர்கள் நிர்பந்தம் செய்வதால், கிராம மக்கள் திண்டாடி வருகின்றனர்.

எஸ்ஐஆர் பணிகளால் பிஎல்ஓக்கள் எனப்படும் அரசு துறை அதிகாரிகளுக்கும் கடும் மனஉளைச்சல் ஏற்பட்டு வருகிறது. பணிகளை குறிப்பிட்ட காலத்தில் முடிக்க முடியாமல் அவர்கள் திண்டாடுகின்றனர். குறிப்பாக வருவாய்துறை மற்றும் உள்ளாட்சிகளில் பணியாற்றும் அதிகாரிகள், வழக்கமான பணிகளோடு தற்போது மழை வெள்ள சேதப்பணிகளையும் மேற்கொள்ள வேண்டியதுள்ளது. இவற்றோடு எஸ்ஐஆர் பணிகளை மேற்கொள்வதால், மக்களுக்கான பணிகள் பாதிக்கப்பட்டு வருகின்றன.

நாடாளுமன்றத்தில் குளிர்கால கூட்ட தொடர் தொடங்க உள்ள நிலையில், இதுகுறித்து எதிர்கட்சி எம்பிக்கள் கண்டிப்பாக கேள்வி எழுப்புவர். இவை எல்லாவற்றையும் தாண்டி வரைவு வாக்காளர் பட்டியல் வெளியாகும்போதே, தமிழகத்தில் பல லட்சம் வாக்குகள் மாயமாகும் அபாயங்களும் உள்ளன. தேர்தல் ஆணையத்தின் விடாப்பிடி காரணமாக இவ்வாண்டு தமிழகத்தில் அரசு ஊழியர்கள் 7 மாதங்கள் தேர்தல் பணியாற்ற வேண்டிய கட்டாயம் ஏற்பட்டுள்ளது.