முல்லைப் பெரியாறு அணை பராமரிப்பு 4 வாரத்தில் சுற்றுச்சூழல் அனுமதி தர வேண்டும்: ஒன்றிய அரசுக்கு உச்ச நீதிமன்றம் மீண்டும் உத்தரவு

புதுடெல்லி: முல்லைப் பெரியாறு அணை பராமரிப்பு பணிகளுக்கு தேவையான சுற்றுச்சூழல் அனுமதியை 4 வாரத்தில் வழங்க ஒன்றிய அரசுக்கு உச்ச நீதிமன்றம் மீண்டும் உத்தரவு பிறப்பித்துள்ளது. முல்லைப் பெரியாறு அணை தொடர்பான பிரதான வழக்கு உச்ச நீதிமன்றத்தில் நிலுவையில் உள்ளது. முன்னதாக வழக்கு விசாரணைக்கு வந்தபோது, “முல்லைப் பெரியாறு அணை விவகாரத்தில் மேற்பார்வை குழு முன்னதாக கொடுத்துள்ள பரிந்துரைகளை உடனே அமல்படுத்த வேண்டும்.

மேலும் அணையில் பராமரிப்பு பணிகளை மேற்கொள்ளும் விதமாக நான்கு வாரத்தில் ஒன்றிய அரசு சுற்றுச்சூழல் அனுமதியை வழங்க வேண்டும் என்று கடந்த மே.19ம் தேதி உத்தரவிட்டிருந்தது. இந்த நிலையில் மேற்கண்ட வழக்கானது உச்ச நீதிமன்றத்தில் நீதிபதிகள் சூர்யகாந்த், திபங்கர் தத்தா மற்றும் என்.கே.சிங் ஆகியோர் அமர்வில் நேற்று மீண்டும் விசாரணைக்கு வந்தது. அப்போது தமிழ்நாடு அரசு தரப்பில் ஆஜரான மூத்த வழக்கறிஞர்கள் சேகர் நாப்தே மற்றும் உமாபதி ஆகியோர், “வல்லக்கடவு சாலை பராமரிப்பு பணிகள் தற்போது வரை நிலுவையில் தான் உள்ளது.

அதற்கு கேரளா அரசு பருவமழையை காரணம் காட்டுகிறது. மேலும் இந்த விவகாரத்தில் சுற்றுச்சூழல் அனுமதி தர உச்ச நீதிமன்றம் முன்னதாக உத்தரவிட்டும் தற்போது வரை எந்தவித நடவடிக்கையும் எடுக்காமல் காலதாமதம் செய்து வருகிறது” என்று தெரிவித்தனர். தொடர்ந்து, கேரளா அரசு தரப்பில் ஆஜரான வழக்கறிஞர், ‘‘முல்லைப் பெரியாறு அணை பகுதியில் தற்போது பருவ மழை பெய்து வருகிறது. அக்டோபர் மாதம் இறுதி வரையில் அது நீடிக்கும்.

அதனால் சாலை பராமரிப்பு, மரங்களை நீக்குவது என்பது சவாலான ஒன்றாகும். எனவே அதற்கு கால அவகாசம் தேவைப்படும் என்று விளக்கமளித்தார். இதைத்தொடர்ந்து ஒன்றிய அரசு தரப்பில் ஆஜரான கூடுதல் சொலிசிட்டர் ஜெனரல் ஐஸ்வர்யா பாட்டி, ‘‘முல்லைப் பெரியாறு அணை விவகாரத்தில் பராமரிப்பு பணிகளை மேற்கொள்ள சுற்றுச்சூழல் அனுமதி வழங்குவது குறித்து விரைவில் முடிவெடுக்கப்படும் என்று தெரிவித்தார்.

இதையடுத்து நீதிபதிகள் பிறப்பித்த உத்தரவில், ‘‘முல்லைப் பெரியாறு அணை விவகாரத்தில் பராமரிப்பு பணிகளுக்காக தேவைப்படும் சுற்றுச்சூழல் அனுமதியை ஒன்றிய அரசு அடுத்த நான்கு வாரத்திற்குள் வழங்க வேண்டும். மேலும் அணையை பலப்படுத்தும் பணிகளை மேற்கொள்வதற்கு முன்பாக அதுசார்ந்த ஆய்வுகளை மேற்கொண்டு அதன் அறிக்கையை கேரளா அரசிடம், தமிழ்நாடு அரசு தரப்பில் வழங்க வேண்டும். சாலை பராமரிப்பு மற்றும் மரங்களை நீக்குவது ஆகியவை தொடர்பான வேலையை பருவமழை முடிந்தவுடன் கேரளா அரசு விரைவாக நடத்தி முடிக்க வேண்டும் என தெரிவித்தனர்.