சமையலை கிண்டல் செய்வது கொடுமையாகாது; மனைவியின் நிறத்தை குறை கூறுவது குற்றமா?.. 27 ஆண்டாக நடந்த வழக்கில் கணவருக்கு விடுதலை

மும்பை: சமையலை கிண்டல் செய்வது கொடுமையாகாது; மனைவியின் நிறத்தை குறை கூறுவது குற்றமல்ல என்று கூறிய உயர் நீதிமன்றம் 27 ஆண்டு வழக்கில் கணவருக்கு விடுதலை அளித்தது. மகாராஷ்டிரா மாநிலத்தில் கடந்த 1995ம் ஆண்டில் திருமணமான தம்பதி இடையிலான உறவு முறிந்ததால், தனது கணவர் வீட்டில் இருந்து மனைவி தனது பெற்றோர் வீட்டிற்கு சென்றார். தொடர்ந்து, 1997-ம் ஆண்டு தனது கணவர் மற்றும் அவரது குடும்பத்தினர் மீது, வரதட்சணைக் கொடுமை தடுப்புச் சட்டத்தின் கீழ் அவர் காவல் நிலையத்தில் புகார் அளித்தார். தனது கணவர் தொழில் தொடங்குவதற்காக ₹40,000 கேட்டதாகவும், தனது கருமையான நிறத்தைக் குறிப்பிட்டு கிண்டல் செய்ததாகவும், சமையல் சரியில்லை என்று தொடர்ந்து குறை கூறியதாகவும் அவர் தனது புகாரில் தெரிவித்திருந்தார்.

இந்த வழக்கை விசாரித்த கீழ் நீதிமன்றம், 2004ல் கணவர் மற்றும் அவரது குடும்பத்தினரை குற்றவாளிகள் எனத் தீர்ப்பளித்து, அவர்களுக்கு ஓராண்டு சிறைத் தண்டனை விதித்தது. இந்தத் தீர்ப்பை எதிர்த்து, கணவர் தரப்பில் அமர்வு நீதிமன்றத்தில் மேல்முறையீடு செய்யப்பட்டது. அங்கும் கீழ் நீதிமன்றத்தின் தீர்ப்பு உறுதி செய்யப்பட்டதால், இறுதியாக மும்பை உயர் நீதிமன்றத்தின் அவுரங்காபாத் கிளையில் மேல்முறையீட்டு மனு தாக்கல் செய்யப்பட்டது. சுமார் 27 ஆண்டுகளாக நடைபெற்ற இந்த வழக்கில், தற்போது உயர் நீதிமன்றம் முக்கியத்துவம் வாய்ந்த தீர்ப்பை வழங்கியுள்ளது. மனுதாரர் தரப்பில் கூறப்பட்ட குற்றச்சாட்டுகள் பொதுவானதாகவும், தெளிவற்றதாகவும் இருப்பதாக நீதிமன்றம் குறிப்பிட்டது. எப்போது, எங்கே துன்புறுத்தல் நடந்தது என்பது குறித்த விவரங்கள் எதுவும் புகாரில் இல்லை என்று நீதிமன்றம் சுட்டிக்காட்டியது.

உயர் நீதிமன்ற நீதிபதி நிதின் சூர்யவன்ஷி தனது தீர்ப்பில், ‘மனைவியின் சமையலை விமர்சிப்பதோ அல்லது அவரது நிறத்தைக் குறிப்பிட்டு கிண்டல் செய்வதோ, இந்திய தண்டனைச் சட்டம் பிரிவு 498ஏ-ன் கீழ் வரும் கொடுமை என்ற வரையறைக்குள் வராது. பெண்ணைத் தற்கொலைக்குத் தூண்டும் அல்லது அவரது உயிருக்கோ, உடல் நலத்திற்கோ கடுமையான பாதிப்பை ஏற்படுத்தும் நடத்தை மட்டுமே கொடுமையாகக் கருதப்படும். திருமண வாழ்வில் ஏற்படும் சாதாரண சண்டைகள் மற்றும் கருத்து வேறுபாடுகளை எல்லாம் கொடுமை என்று கூற முடியாது’ எனக் குறிப்பிட்டார். இதனையடுத்து, கணவர் மற்றும் அவரது குடும்பத்தினர் மீதான அனைத்து குற்றச்சாட்டுகளையும் ரத்து செய்து, 27 ஆண்டு கால சட்டப் போராட்டத்திற்குப் பிறகு அவர்களை வழக்கிலிருந்து முழுமையாக நீதிமன்றம் விடுவித்து உத்தரவிட்டது.