வரவேற்பு நிகழ்ச்சியின்போது நடனமாடும்படி வற்புறுத்தியதால் திருமணத்தை நிறுத்திய இளம்பெண்: மாப்பிள்ளையின் நண்பர்களால் விபரீதம்

கிருஷ்ணகிரி: கிருஷ்ணகிரி மாவட்டம், பர்கூர் ஒன்றியத்தில் உள்ள ஒரு கிராமத்தை சேர்ந்த இளம்பெண்ணுக்கும், தனியார் நிறுவனத்தில் பணிபுரியும் இளைஞருக்கும் காவேரிப்பட்டணத்தில் உள்ள திருமண மண்டபத்தில், கடந்த 27ம் தேதி திருமணம் நடைபெறுவதாக இருந்தது. 26ம் தேதி மாலை, திருமண வரவேற்பு நிகழ்ச்சி நடந்தது. உறவினர்கள், நண்பர்கள் அனைவரும் வந்தனர். இரவு 10 மணியளவில், மணமகனின் நண்பர்கள் சிலர், மது போதையில் மண்டபத்தில் குத்தாட்டம் போட்டனர்.

போதை உற்சாகத்தில், மேடையில் ஏறிய நண்பர்கள், மாப்பிள்ளையையும் ஆடச்சொல்லி வற்புறுத்தினர். சிறிது நேரத்தில் மணப்பெண்ணையும் நடனமாடுமாறு கட்டாயப்படுத்தினர். இதை கண்ட உறவினர்கள் அவர்களை கண்டித்தனர். ஒரு கட்டத்தில் வாக்குவாதம் ஏற்பட்டு, பெண் வீட்டாரை மணமகனுடன் வந்த நண்பர்கள் சிலர் தாக்கினர். இதனால் அதிர்ச்சியடைந்த மணப்பெண், திருமணத்திற்கு முன்பே இப்படி நடந்து கொள்கிறார்களே, இவரை திருமணம் செய்து கொண்டால் எனது வாழ்க்கை என்ன ஆகும்? என்றார்.

பின்னர், அந்த நபரை திருமணம் செய்து கொள்ள மறுத்து விட்டார். இதனால் வரவேற்புடன் திருமணம் பாதியில் நின்றது. மண்டபத்தில் கட்டப்பட்டிருந்த பேனர்கள், அலங்கார வளைவுகள் அவசர, அவசரமாக இரவோடு இரவாக அகற்றப்பட்டன. மேலும் மணமகன், மணமகள் வீட்டாரும் அவரவர் ஊருக்கு திரும்பினர்.

இதனிடையே, காலையில் திருமணத்தில் கலந்து கொள்ளலாம் என எண்ணி, பலரும் மண்டபத்திற்கு சென்றார்கள். ஆனால், திருமண மண்டபம் பூட்டப்பட்டிருந்ததை கண்டு விசாரித்த போது, முதல்நாள் இரவு வரவேற்பில் ஏற்பட்ட பிரச்னையில் திருமணம் நின்று போனதை அறிந்தனர். வரவேற்பு நிகழ்ச்சியில் போதையில் வந்த மாப்பிள்ளையின் நண்பர்களால், திருமணம் நின்றது பெரும் பரபரப்பை ஏற்படுத்தி உள்ளது.