அரிதான பாதிப்பு: மூளையை உண்ணும் அமீபா 100 பேரில் 98 பேர் உயிரிழப்பு; குட்டை, குளங்களில் குளிப்பதை தவிர்க்க வேண்டும்; விழிப்புணர்வுடன் இருக்க வேண்டும்; மருத்துவர்கள் அறிவுறுத்தல்

* சிறப்பு செய்தி

மூளையை உண்ணும் அமீபா, அறிவியல் ரீதியாக ‘Naegleria fowleri’ என அழைக்கப்படுகிறது. இது முதன்முதலில் 1960களில் ஆஸ்திரேலியாவில் கண்டறியப்பட்டது. இது ஒற்றை செல் உயிரினம் ஆகும். சூடான நன்னீர் நிலைகளில், குறிப்பாக ஏரிகள், ஆறுகள், குளங்கள் மற்றும் மோசமாகப் பராமரிக்கப்படும் நீச்சல் குளங்களில் வாழ்கிறது. மூளையை உண்ணும் அமீபாவின் முதன்மை அமீபிக் மெனிங்கோஎன்செபாலிடிஸ் (PAM) எனப்படும் ஒரு கடுமையான மூளைத் தொற்றை ஏற்படுத்துகிறது. இது மூளை திசுக்களை அழித்து விரைவாக மரணத்திற்கு வழிவகுக்கிறது.

1960களில் இருந்து, இந்த தொற்று உலகின் பல்வேறு பகுதிகளில், குறிப்பாக வெப்பமான காலநிலை உள்ள பகுதிகளில் அவ்வப்போது பதிவாகியுள்ளது. மூளையை உண்ணும் அமீபாவால் ஏற்படும் தொற்று மிகவும் அரிதானது என்றாலும், அதன் இறப்பு விகிதம் மிக அதிகமாக உள்ளது. உலகளவில், இந்த தொற்று ஒவ்வொரு ஆண்டும் சில நூறு பேரை மட்டுமே பாதிக்கிறது. எடுத்துக்காட்டாக, அமெரிக்காவில் 1962 முதல் 2022 வரை சுமார் 157 அமீபிக் மெனிங்கோஎன்செபாலிடிஸ் பாதிப்புகள் பதிவாகியுள்ளன, இதில் சுமார் 97% பேர் உயிரிழந்துள்ளனர். இந்தியாவில், குறிப்பாக கேரளாவில், சமீப ஆண்டுகளில் இந்த தொற்று கவனத்தை ஈர்த்துள்ளது.

கேரளாவில் ஆண்டுக்கு ஆண்டு இந்த பாதிப்பு அதிகமாக உள்ளது. இதுவரை திருவனந்தபுரம், கொல்லம், கோழிக்கோடு, வயநாடு மற்றும் மலப்புரம் ஆகிய மாவட்டங்களில் 18 பேருக்கு மூளையை தின்னும் அமீபா பாதிப்பு கடந்த சில நாட்களில் கண்டறியப்பட்டுள்ளது. இந்த ஆண்டு மட்டும் கேரளாவில் இதுவரை 41 பேருக்கு அமீபா பாதிப்பு கண்டறியப்பட்டது. இந்த தொற்று பெரும்பாலும் குழந்தைகளையும் இளைஞர்களையும் பாதிக்கிறது, ஏனெனில் அவர்கள் நீர் நிலைகளில் நீந்துவது அல்லது விளையாடுவது போன்ற செயல்களில் அதிகம் ஈடுபடுகின்றனர். ஆண்கள் இந்த தொற்றுக்கு அதிகம் பாதிக்கப்படுவதாகவும் ஆய்வுகள் தெரிவிக்கின்றன, இது அவர்களின் நீர் சார்ந்த பொழுதுபோக்கு நடவடிக்கைகளுடன் தொடர்புடையதாக இருக்கலாம்.

இதுதொடர்பாக ரேலா மருத்துவமனை நரம்பியல் துறை இணை ஆலோசகர் மருத்துவர் ஸ்ரீவித்யா கூறியதாவது: தற்போது கேரளாவில் மூளையை உண்ணும் அமீபா பாதிப்பு அதிகமாக உள்ளது. இது பொதுவாக வெதுவெதுப்பாக இருக்கும் தண்ணீரில் வாழக்கூடியவை. குறிப்பாக குளம் ஆறு உள்ளிட்ட பகுதிகளில் இது வாழ கூடும். சுத்தமாக இருக்கும் நீரில் இது வாழ்வது கடினம். நீச்சல் குளத்தில் இது வாழ அதிக வாய்ப்புள்ளது. குளிக்கும்போது மூக்கு வழியாக இது மூளைக்கு செல்லும். குறிப்பாக சொல்ல வேண்டும் என்றால் மூக்கில் இருந்து மூளைக்கு மியூக்கஸ் வழியாக சென்று பாதிக்கும்.

மூளையையும் மூக்கையும் பிரிப்பது சிறிய வகை எலும்புதான். அந்த எலும்பில் பல்வேறு விதமான ஓட்டைகள் உள்ளன. அதன் வழியாக மூளைக்கு சென்று பாதிப்பை ஏற்படுத்துகிறது. மூளைக்குள் நுழைந்த ஒன்று முதல் இரண்டு வாரங்களில் மரணத்தை ஏற்படுத்தும் அளவிற்கு இந்த பாதிப்பு தீவிரமாக இருக்கும். மூளைக்காய்ச்சல் பல்வேறு வகையான பாதிப்பால் ஏற்படுகிறது. எனவே இது ஒரு வகை பாதிப்பு. மூளைக்காய்ச்சலுக்கு ஏற்படும் பொதுவான அறிகுறிகள் தான் இதற்கும் ஏற்படும். காய்ச்சல், தலைவலி, சுயநினைவு மாறுதல், குழப்பமாக பேசுவார்கள், கழுத்து வலி, கழுத்து இறக்கம் உள்ளிட்டவை ஏற்படும். இந்த பாதிப்பு தீவிரமடையும்போது இல்லாத ஒன்று இருப்பது போன்று தோற்றம் ஏற்படும்.

இதைப் பற்றி விழிப்புணர்வு குறைவாக உள்ளது. எனவே மக்களுக்கு விழிப்புணர்வு தேவை. அதுமட்டுமின்றி இதுபோன்ற நீர்களில் குளிக்காமல் இருப்பது நன்று. இந்த பாதிப்புக்கு மருத்துவம் போதுமான அளவில் இல்லை. குறிப்பாக சொல்ல வேண்டும் என்றால் 100 பேருக்கு இந்த பாதிப்பு ஏற்பட்டால் இரண்டு பேர் மட்டுமே உயிர் பிழைக்க முடியும். கிட்டத்தட்ட 98 பேர் இறந்து போகும் நிலைக்கு தள்ளப்படுகின்றனர். இது ஒரு அரியவகை பாதிப்பு தான். ஆனால் பாதிப்பு ஏற்பட்டால் பிழைப்பது மிகவும் கடினமாக இருக்கும். தலைவலி, காய்ச்சல் ஏற்பட்டால் உடனடியாக மருத்துவரை அணுக வேண்டும். இது ஒருவர் இடமிருந்து மற்றொருவருக்கு பரவாது. தண்ணீர் மூலமாக மட்டுமே பரவக்கூடும்.

இவ்வாறு அவர் கூறினார்.

பாதுகாப்பு வழிமுறைகள்: ஏரி, குளம், குட்டையில் தேங்கியுள்ள நீர், சுத்தம் இல்லாத பாதுகாப்பற்ற நீர்நிலை போன்றவற்றில் குளிப்பதை தவிர்த்துக் கொள்ள வேண்டும். சூடான, தேங்கிய நன்னீர் நிலைகளில் நீந்துவதை தவிர்க்க வேண்டும். நீச்சல் குளங்களில் குளோரினேஷன் அளவு 2 பிபிஎம் (PPM) விட அதிகமாக இருப்பதை உறுதி செய்ய வேண்டும். சந்தேகத்திற்கு இடமான நீர் நிலைகளில் குளிப்பதைத் தவிர்க்க வேண்டும். காய்ச்சல், தலைவலி, அல்லது மனக் குழப்பம் போன்ற அறிகுறிகள் தோன்றினால், உடனடியாக மருத்துவமனையை அணு வேண்டும். இது ஆரம்பகால நோயறிதல் உயிரிழப்பைத் தவிர்க்க உதவும்.

மூளையை உண்ணும் அமீபா பாதிப்பு அறிகுறிகள்

* தொற்று ஏற்பட்ட 1 முதல் 12 நாட்களுக்குள் அறிகுறிகள் தோன்றும்.

* குறிப்பாக கடுமையான தலைவலி

* காய்ச்சல்

* குமட்டல் மற்றும் வாந்தி

* கழுத்து இறுக்கம்

* ஒளியுணர்வு

* குழப்பமான மனநிலை

* வலிப்பு

* மயக்கம் அல்லது கோமா

* மூளையை உண்ணும் அமீபா பரவும் விதம்

மூளையை உண்ணும் அமீபா சூடான (25-46 டிகிரி செல்சியஸ்), தேங்கிய நன்னீர் நிலைகளில் வளர்கிறது. அசுத்தமான நீரில் நீந்தும்போது அல்லது மூழ்கும்போது, இந்த அமீபா மூக்கு வழியாக உடலில் நுழைகிறது. அங்கிருந்து, அது ஆல்பாக்டரி நரம்பு வழியாக மூளையை அடைந்து திசுக்களை அழிக்க தொடங்குகிறது. உப்பு நீர் அல்லது நன்கு குளோரினேற்றப்பட்ட நீரில் இது உயிர்வாழ முடியாது.