சில நாட்களாக போதிய மழை இல்லாததால் பூண்டி, செம்பரம்பாக்கம், புழல் ஏரியில் உபரி தண்ணீர் வெளியேற்றம் குறைப்பு

திருவள்ளூர்: வடகிழக்கு பருவமழை காரணமாக திருவள்ளூர் மாவட்டத்தில் விட்டுவிட்டு மழை பெய்வதால் அனைத்து நீர்நிலைகள் நிரம்பி வருகிறது. இன்று காலை 10 மணி நிலவரப்படி பூண்டி சத்தியமூர்த்தி சாகர் நீர்த்தேக்கத்தின் 35 அடி மொத்த உயரத்தில் 33.11 அடி உயரத்துக்கும் மொத்த கொள்ளளவான 3231 மில்லியன் கன அடியில் தற்போது தண்ணீர் இருப்பு 2553 மில்லியன் கன அடியாக உள்ளது.

ஏரிக்கு வினாடிக்கு 1380 கன அடி மழைநீர் வந்து கொண்டுள்ளது. பேபி கால்வாய் வழியாக வினாடிக்கு 200 கன அடி நீர் அனுப்பி வைக்கப்படுகிறது. இந்த நிலையில், நேற்றுமுதல் திருவள்ளூர் மாவட்டத்தில் போதிய மழை இல்லாததால் அணையின் பாதுகாப்பு கருதி பூண்டி சத்தியமூர்த்தி சாகர் நீர்த்தேக்கத்தில் இருந்து வினாடிக்கு 4 ஆயிரம் கன அடியில் இருந்து குறைத்து 750 கன அடி வீதம் உபரிநீர் வெளியேற்றப்பட்டு வருகிறது.

செம்பரம்பாக்கம் ஏரியில் இருந்து சென்னை மாநகர மக்களின் குடிநீருக்காக வினாடிக்கு 165 கன அடி தண்ணீர் அனுப்பி வைக்கப்படுகிறது. போதிய மழை இல்லாததால் செம்பரம்பாக்கம் ஏரியில் இருந்து வினாடிக்கு 3000 கன அடியில் இருந்து குறைத்து 250 கன அடி வீதம் உபரி நீர் வெளியேற்றப்பட்டு வருகிறது. புழல் ஏரியின் 21.20 அடி மொத்த உயரத்தில் 18.67 அடி உயரத்திற்கும், மொத்த கொள்ளளவான 3300 மில்லியன் கன அடியில் தற்போது தண்ணீர் இருப்பு 2745 மில்லியன் கன அடியாக உள்ளது.

நீர்வரத்து வினாடிக்கு 350 கன அடியாக உள்ளது. சென்னை மாநகர மக்களின் குடிநீருக்காக வினாடிக்கு 184 கன அடி விதம் தண்ணீர் அனுப்பி வைக்கப்படுகிறது. புழல் ஏரியில் இருந்து 500 கன அடியிலிருந்து குறைத்து வினாடிக்கு 250 கன அடி வீதம் உபரி நீர் வெளியேற்றப்பட்டு வருகிறது. சோழவரம் ஏரியின் 18.86 அடி மொத்த உயரத்தில் 12.32 அடி உயரத்துக்கும்மொத்த கொள்ளளவான 1081 மில்லியன் கன அடியில் தற்போது தண்ணீர் இருப்பு 518 மில்லியன் கன அடியாக உள்ளது.

நீர்வரத்து 142 கன அடியாக உள்ளது. 200 கன அடி உபரி நீர் வெளியேற்றப்பட்டு வருகிறது. சென்னை மக்களின் குடிநீர் தேவைக்காக 200 கன அடி வீதம் அனுப்பப்பட்டு வருகிறது. இதுபோல் கண்ணன்கோட்டை ஏரியில் 438 மில்லியன் கன அடி தண்ணீர் இருப்பு உள்ளது. ஏரிக்கு நீர் வரத்து இல்லை சென்னை மாநகர மக்களின் குடிநீருக்காக வினாடிக்கு 2 கன அடி வீதம் தண்ணீர் அனுப்பி வைக்கப்படுகிறது. ‘’5 ஏரிகளின் மொத்த கொள்ளளவான 11757 தற்போது 9151 மில்லியன் கன அடி நீர் இருப்பு உள்ளது’ என்று பொதுப்பணித்துறை அதிகாரிகள் தெரிவித்தனர்.

* வெள்ள அபாய எச்சரிக்கை

பூண்டி நீர்த்தேக்கத்தில் இருந்து உபரி நீர் வெளியேறும் கொசஸ்தலை ஆறு செல்லும் கிராமங்களான நம்பாக்கம், கிருஷ்ணாபுரம், ஆட்ரம்பாக்கம், ஒதப்பை, நெய்வேலி, எறையூர், பீமன்தோப்பு, கொரக்கந்தண்டலம், சோமதேவன்பட்டு, மெய்யூர், வெள்ளியூர், தாமரைப்பாக்கம், திருக்கண்டலம், ஆத்தூர், பண்டிக்காவனுர், ஜெகநாதபுரம், புதுகுப்பம், கன்னிப்பாளையம், வன்னிப்பாக்கம், அசூவன்பாளையம், மடியூர், சீமாவரம், வெள்ளிவாயல்சாவடி, நாப்பாளையம், இடையான்சாவடி, மணலி மற்றும் மணலி புதுநகர், சடையன்குப்பம், எண்ணூர் ஆகிய பகுதிகளில் கொசஸ்தலை ஆற்றின் இரண்டு புறமும் உள்ள தாழ்வான பகுதிகளில் வசித்து வருகின்ற மக்கள் பாதுகாப்பாக இருக்கவேண்டும். இவ்வாறு திருவள்ளூர் மாவட்ட கலெக்டர் மு.பிரதாப் கேட்டுக்கொண்டுள்ளார்.