பிரதமர் மோடி தமிழகம் வந்துள்ள நிலையில் கீழடி குறித்த வீடியோவை வெளியிட்ட திமுக: கீழடி வரலாறு ஒருநாள் நிச்சயம் வெல்லும், தமிழர் வரலாற்றை உலகமே சொல்லும் என்றும் பதிவு

சென்னை: பிரதமர் மோடி தமிழகம் வந்துள்ள நிலையில் கீழடி குறித்த வீடியோவை திமுக வெளியிட்டுள்ளது. அதில் கீழடி வரலாறு ஒரு நாள் நிச்சயம் வெல்லும், தமிழர் வரலாற்றை உலகமே சொல்லும் என்றும் கூறப்பட்டுள்ளது. பிரதமர் மோடி 2 நாட்கள் பயணமாக நேற்று தமிழகம் வந்தார். பிரதமர் மோடி தமிழ்நாடு வந்துள்ள நிலையில் கீழடி குறித்து திமுக வீடியோ ஒன்றை நேற்று வெளியிட்டுள்ளது.

வணக்கம்... நான் கீழடியில் வாழ்ந்த தமிழன் பேசுகிறேன். புதைந்து கிடந்த எங்கள் நாகரிகத்தை அகழ்வாராய்ச்சி மூலம் வெளிக்கொண்டு வந்தார்கள். கீழடி நாகரிகம் வெளியில் வர,வர தமிழர் நாகரிகத்தின் மற்றுமொரு தொன்மையை உலகமே அறிய தொடங்கியது. ஹரப்பா, மொஹஞ்சதாரோ போல தமிழ்நாட்டிலும் ஒரு நகர நாகரிகம் இருந்தது என்பதற்கு சான்றாக நம் கீழடி நாகரிகம் வெளிப்பட்டது. தமிழனின் உயர்வான நகர நாகரிகம் உலகிற்கே தெரியவந்தது.

தமிழ் எழுத்துக்களின் காலம் கிமு 300 என அனைவரும் நினைத்து இருந்த வேளையில், கிமு 600 என எங்கள் கீழடியால் மாற்றி அமைக்கப்பட்டது. இந்தியாவின் வரலாறு தெற்கில் இருந்து தான் தொடங்குகிறது என்பது நிரூபணமும் ஆனது. உலகின் மூத்த நாகரிகமாக பன்னாட்டு ஆய்வகங்கள் எங்கள் கீழடியின் தொன்மத்தை அங்கீகரித்தன. இத்தனை சிறப்புகளை கொண்ட எங்கள் கீழடியில் உலகமே உற்று கவனிக்கிறது. கீழடி வரலாறு ஒரு நாள் நிச்சயம் வெல்லும். தமிழர் வரலாற்றை உலகமே சொல்லும் என வீடியோவில் கூறப்பட்டுள்ளது.