ஒரே நாளில் 2 முறை விலையில் அதிரடி மாற்றம் தங்கம் காலையில் ரூ.2000 சரிவு மாலையில் ரூ.400 உயர்வு

* வெள்ளி விலையும் அதிரடியாக சரிந்தது, தீபாவளி நேரத்தில் விலை ஏற்றம், இறக்கத்தால் நகை வாங்குவோர் குழப்பம்

சென்னை: வரலாறு காணாத வகையில் உயர்ந்து வந்த நிலையில் தங்கம் விலை நேற்று காலையில் பவுனுக்கு அதிரடியாக ரூ.2000 குறைந்து, மாலையில் ரூ.400 உயர்ந்தது. தங்கம் விலை கடந்த செப்டம்பர் மாதத்தில் இருந்து விலை உயர்வை சந்தித்து வந்தது. தீபாவளி நேரத்தில் விலை உயர்வு நகை வாங்குவோரை கடும் அதிர்ச்சிக்குள்ளாக்கியது. இந்த நிலையில் நேற்று முன்தினம் யாரும் எதிர்ப்பார்க்காத வகையில் தங்கம் விலை கிடு,கிடுவென உயர்ந்தது. அதாவது கிராமுக்கு ரூ.300 உயர்ந்து, ஒரு கிராம் ரூ.12,200க்கும், பவுனுக்கு ரூ.2,400 உயர்ந்து, ஒரு பவுன் ரூ.97,600க்கு விற்பனையாகி புதிய உச்சம் கண்டது.

அதே நேரத்தில் வெள்ளி விலை நேற்று முன்தினமும் விலை குறைந்தது. அதாவது கிராமுக்கு ரூ.3 குறைந்து கிராம் வெள்ளி ரூ.203க்கும், கிலோவுக்கு 3 ஆயிரம் ரூபாய் குறைந்து, பார் வெள்ளி 2 லட்சத்து 3 ஆயிரம் ரூபாய்க்கும் விற்கப்பட்டது. வழக்கமாக தீபாவளிக்கு 2நாட்களுக்கு முன்னர் விற்பனை அதிகரிக்கும். ஆனால், இந்தாண்டு விலை ஜெட் வேகத்தில் அதிகரித்து வந்தது. இதனால், விற்பனை சற்று குறைந்ததாக கூறப்படுகிறது. இந்த நிலையில் தீபாவளியை முன்னிட்டு தங்கம் விலை உயரும் என எதிர்பார்க்கப்பட்டது.

ஆனால், நேற்று காலையில் யாரும் எதிர்ப்பார்க்காத வகையில் தங்கம் விலையில் அதிரடி மாற்றம் காணப்பட்டது அதாவது தங்கம் விலை கிராமுக்கு ரூ.250 குறைந்து ஒரு கிராம் தங்கம் ரூ.11,950க்கும், பவுனுக்கு ரூ.2000 குறைந்து ஒரு பவுன் ரூ.95,600க்கும் விற்பனையானது. தங்கத்துக்குப் போட்டியாக உயர்ந்து வந்த வெள்ளி விலை மூன்றாவது நாளாக நேற்று காலை அதிரடியாக விலை குறைந்ததை பார்க்க முடிந்தது.

நேற்றைய தினம் வெள்ளி விலை கிராமுக்கு 13 ரூபாய் குறைந்து ஒரு கிராம் வெள்ளி ரூ.190 ரூபாய்க்கும், கிலோவுக்கு 13 ஆயிரம் ரூபாய் குறைந்து பார் வெள்ளி 1 லட்சத்துக்கு 90 ஆயிரம் ரூபாய்க்கும் விற்பனையானது. தங்கத்தின் விலை குறைவு மகிழ்ச்சியை அனுபவிப்பதற்குள் நேற்று மாலையில் தங்கம் விலையில் மாற்றம் காணப்பட்டது. நேற்று மாலையில் தங்கம் விலை கிராமுக்கு ரூ.50 உயர்ந்து ஒரு கிராம் ரூ.12,000க்கும், பவுனுக்கு ரூ.400 உயர்ந்து ஒரு பவுன் ரூ.96 ஆயிரத்துக்கும் விற்பனையானது.

தீபாவளி நேரத்தில் விலை ஏற்றம், இறக்கத்தால் நகை வாங்குவோர் குழப்பமடைந்துள்ளனர். எப்படியிருந்தாலும் நேற்று தங்கம் விலை பவுனுக்கு ரூ.1600 குறைந்துள்ளது குறிப்பிடத்தக்கது. இன்று ஞாயிற்றுக்கிழமை என்பதால் தங்கம் மார்க்கெட்டுக்கு விடுமுறையாகும். அதனால், நேற்றைய விலையிலேயே இன்று தங்கம் விற்பனையாகும். நாளை(திங்கட்கிழமை) மார்க்கெட் தொடங்கிய பின்னரே தங்கம் விலையில் என்ன மாற்றம் ஏற்பட போகிறது என்பது தெரியவரும். அதே நேரத்தில் தங்கம் விலை மேலும் குறைய வாய்ப்பு உள்ளதாக நகை வியாபாரிகள் கூறியுள்ளனர்.