மாங்காடு அருகே தேங்கி இருந்த மழை நீரில் மூழ்கி இரண்டரை வயது குழந்தை உயிரிழப்பு..!!

பூவிருந்தமல்லி: பூவிருந்தமல்லி அருகே மாங்காடு பகுதியைச் சேர்ந்தவர் சந்திப்குமார். இவரது மனைவி பிரியதர்ஷினி. இவர்களுக்கு இரண்டரை வயதில் பிரணிகாஸ்ரீ என்ற மகள் உள்ளார். பிரியதர்ஷினி அம்பத்தூரில் உள்ள ஐ.டி. நிறுவனத்தில் பணிபுரிந்து வருகிறார். நேற்று மாலை பிரிய தர்ஷினி, தனது மகள் பிரணிகாஸ்ரீயுடன் வீட்டில் தூங்கிக்கொண்டு இருந்தார். சிறிது நேரத்திற்கு பிறகு பிரியதர்ஷினி எழுந்து பார்த்தபோது அருகில் இருந்த மகள் காணவில்லை . அதிர்ச்சி அடைந்த அவர். வீட்டின் வெளியே வந்து தேடியபோது அருகில் உள்ள காலி மைதானத்தில் தேங்கிய மழைநீரில் மகள் பிரணிகாஸ்ரீ கிடப்பதை கண்டு அதிர்ச்சி அடைந்தார்.

உடனடியாக மகளை மீட்டு தனியார் ஆஸ்பத்திரியில் சேர்த்தார். குழந்தையை பரிசோதித்த மருத்துவர்கள் பிரணிகாஸ்ரீ இறந்து விட்டதாக தெரிவித்தனர்.வீட்டில் தாயுடன் தூங்கியபோது எழுந்த பிரணிகாஸ்ரீ விளையாடுவதற்காக வீட்டின் வெளியே வந்து உள்ளார். அப்போது வீட்டின் அருகே தேங்கி இருந்த மழைநீரில் தவறி விழுந்து இறந்து இருக்கலாம் என்று கூறப்படுகிறது.தகவல் அறிந்ததும் விரைந்து வந்த போலீசார் பலியான குழந்தையின் உடலை மீட்டு பிரேத பரிசோதனைக்காக போரூரில் உள்ள தனியார் மருத்துவமனைக்கு அனுப்பி வைத்தனர். குழந்தை பிரணிகா ஸ்ரீ உயிரிழப்புக்கு வேறு ஏதேனும் காரணம் உள்ளதா? என்று போலீசார் விசாரணை நடத்தி வருகிறார்கள்.