அரை ஏக்கரில் கலப்பு காய்கறிகள்...ஆர்கானிக் விவசாயத்தில் அசத்தலான யுக்திகள்!

இயற்கை விவசாயம், பாரம்பரிய விதை மீட்பு என இன்றைய இளம் தலைமுறையினரில் சிலர் விவசாயத்தில் சைலன்டாக ஒரு புரட்சியை ஏற்படுத்தி வருகிறார்கள். திருச்சி மாவட்டம் மணப்பாறை அருகில் உள்ள கல்பட்டி சத்திரத்தைச் சேர்ந்த அரவிந்தன், அவர்களில் முக்கியமான நபராக விளங்குகிறார். தமது உறவினருக்கு சொந்தமான நான்கரை ஏக்கர் நிலத்தைத் திருத்தி முழுக்க முழுக்க இயற்கை விவசாயம் பார்ப்பதுடன், அரை ஏக்கரில் கலப்பு சாகுபடி முறையில் நாட்டுக் காய்கறிகளைப் பயிரிட்டு அசத்தலான வருமானம் பார்த்து வருகிறார். மணப்பாறையில் இருந்து திண்டுக்கல் செல்லும் பிரதான சாலையில் சுமார் 25 கிலோமீட்டர் தூரத்தில் உள்ள கல்பட்டியில் இருந்து இடதுபுறம் செல்லும் பாதையில் கொஞ்ச தூரம் பயணித்து ரயில் தண்டவாளத்தைக் கடந்தால் வனப்பகுதி தொடங்கிவிடுகிறது. அங்கிருந்து மேலும் சிறிது தூரம் பயணித்தால் அழகிய மலைக்கிராமங்கள் வருகின்றன. மலையடிவாரத்திற்கும், திண்டுக்கல் பிரதான சாலைக்கும் இடையில் உள்ள இயற்கை எழில் கொஞ்சும் கிராமமாக விளங்கும் கல்பட்டி சத்திரத்திற்கு நாம் சென்றபோது, தமது பண்ணையில் சில பராமரிப்புப் பணிகளில் பிசியாக இருந்த அரவிந்தன், நம்மை வரவேற்று தமது விவசாய அனுபவம் குறித்து பகிர்ந்துகொண்டார்.

``நமக்கு பூர்வீகம் இந்த ஊர்தான். விவசாயக்குடும்பம். எம்எஸ்சி கம்ப்யூட்டர் சயின்ஸ் படிச்சிருக்கேன். நம்மாழ்வார் அய்யா கூட பேசி இருக்கேன். அப்பவே இயற்கை விவசாயம் செய்யணும்னு ஆசை. ஆனா செயல்படுத்த முடியலை. இந்த நிலம் எங்க தாய்மாமா பாரிக்கு சொந்தமானது. இதுல ரசாயனம் எதுவும் போடாமத்தான் விவசாயம் பார்த்தாங்க. அம்மாவுக்கு திடீர்னு உடல்நிலை சரியில்லாம போச்சி. நாம கூட இருந்து பார்த்துக்க வேண்டிய சூழல். அப்படியே மாமா நிலத்துல இயற்கை விவசாயத்தை செஞ்சுக்கிட்டே அம்மாவையும் கவனிச்சிக்கலாம்னு முடிவெடுத்தேன்.

சரியா 2023ல இங்க என்னோட விவசாயப் பயணத்தைத் தொடங்குனேன். அதுக்கு முன்னாடி மானாவாரி விவசாயம்தான். நான் இதை புதுமாதிரி செய்யணும்னு நினைச்சேன். முதல்ல நிலத்தை இயற்கை விவசாயத்துக்கு தக்க மாதிரி சீரமைச்சேன். வயலைச் சுத்தி கிளுவை, களாக்காய் செடிகளை உயிர்வேலியா நட்டேன். அதற்கடுத்து அகழி வெட்டுனேன். நிலத்துல பெய்யுற மழைநீர் வெளியில போகாம நிலத்துக்குள்ளே சேகரமாகுறதுக்காக இந்த அகழியை வெட்டுனேன். அந்த தண்ணி முழுசா ஒரு இடத்துல சேகரமாகுறதுக்கு பண்ணைக்குட்டை வெட்டுனேன். அதையொட்டி கொய்யா, நாவல், சப்போட்டா, வாட்டர் ஆப்பிள், மா, நெல்லி, முள்சீத்தா, அத்தின்னு பழமரங்களை நட்டேன். அதோட காயா, ஆச்சா, மகோகனின்னு டிம்பர் வேர்யூ மரங்களை நட்டேன். கூடவே வில்வம், தான்றிக்காய் போன்ற மரங்களையும் நட்டேன்.

போன வருசம் 25 சென்ட் நிலத்துல துவரை போட்டேன். 70 கிலோ மகசூல் கிடைச்சுது. வீட்டு தேவைக்கு வச்சிக்கிட்டு ஒரு பகுதியை நண்பர்களுக்கும், தெரிஞ்சவங்களுக்கும் விற்பனை செஞ்சேன். அரை ஏக்கர்ல பப்பாளி வச்சேன். இப்போ மகசூல் கொடுக்க ஆரம்பிச்சிருக்கு. மாமரத்துல இப்போ கோடைக்காய் காய்க்குது. எங்க பகுதியில இந்த மழை சீசன்ல காய்க்குற மாங்காய்களை கோடைக்காய்னு சொல்லுவோம். அந்தக்காய்களை கிலோ 80 ரூபாய்னு விக்கிறோம். இது இல்லாம அரை ஏக்கர்ல கலப்பு முறையில காய்கறிகளை பயிர் செஞ்சுருக்கோம். அதுல இருந்து தினமும் காய் பறிச்சி விற்பனை செய்றோம்’’ என்று கூறும் அரவிந்தன், காய்கறி சாகுபடி விபரம் குறித்தும் விளக்கினார்.

`` நல்லா உழவு ஓட்டி மாட்டு எரு போட்ட நிலத்துல 3 அடி இடைவெளியில மேட்டுப்பாத்தி அமைச்சோம். அதுல இரண்டரை அடி இடைவெளியில செடிக்கு செடிங்குற வகையில ஒரு பக்கம் யானைத்தந்த வெண்டையும், இன்னொரு பக்கம் இலவம்பாடி முள் கத்தரியும் நட்டிருக்கோம். இது ரெண்டையும் வெறும் 10 சென்ட்லதான் பண்ணி இருக்கோம். அதே மாதிரி கொத்தவரை, மிளகாய், பீர்க்கன்னு தலா பத்து சென்ட்ல போட்டுருக்கோம். இதுல யானைத்தந்தம் வெண்டை ரொம்ப விசேஷம். ஒரு காய் ஒரு அடி தாண்டி வளரும். பார்க்குறதுக்கு யானைத்தந்தம் போல இருக்குறதால இதுக்கு இந்த பேரு. நல்ல வழவழப்புத்தன்மை இருக்கும். எதிர்ப்பு சக்தி அதிகம். இதை சாப்பிட்டா உடம்புக்கு நல்ல வலு கிடைக்கும். இதை 3 நாளுக்கு ஒருமுறை பறிப்போம். ஒரு பறிப்புக்கு 10 கிலோ காய் கிடைக்கும். அதை கிலோ ரூ.50க்கு விற்பனை செய்வோம்.

இப்போ கொத்தவரையிலயும் நல்ல காய்ப்பு இருக்கு. இதையும் 3 நாளுக்கு ஒருமுறை பறிப்போம். ஒரு பறிப்புக்கு 15ல இருந்து 20 கிலோ வரை காய் கிடைக்கும். ஒரு கிலோ ரூ.40 லருந்து 50 வரைக்கும் விற்கும். மிளகாய், கத்தரி, பீர்க்கை எல்லாமே அப்படித்தான். நான் எந்த காய்கறியையும் கமிஷன் கடையில விக்கிறது இல்ல. என்னோட வாட்ஸ்அப் குரூப்லயே ஆர்டர் வரும். அவங்களுக்கு அனுப்புவேன். ஆர்கானிக் விவசாயம், நாட்டு காய்கறி பத்தி நல்லா தெரிஞ்ச அக்கம் பக்கத்து ஊர்க்காரங்க நேர்ல வந்து வாங்கிட்டு போவாங்க. சென்னை, மதுரை போன்ற ஊர்களில் உள்ள வாடிக்கையாளர்களுக்கு கூரியரில் அனுப்புவேன்.

வெண்டைக்காயை மதிப்புக்கூட்டியும் விக்குறேன். அதாவது காய வச்சி, வத்தலாக்கி விற்பனை பண்றேன். 5 கிலோ காயை காய வச்சா ஒரு கிலோ வத்தல் கிடைக்கும். 5 கிலோ பச்சைக்காயை விற்பனை செஞ்சா அதிகபட்சம் 100 ரூபாய்தான் கிடைக்கும். அதையே வத்தலாக்கி வித்தா 200 ரூபாய் கிடைக்கும். அப்படியே இரண்டு மடங்கு லாபம். இதே மாதிரி பல காய்களை மதிப்புக்கூட்டி விக்கலாம்னு இருக்கேன். அதுக்காக சோலார் டிரையர் வாங்கப்போறேன்’’ என்றவர் இறுதியாக `` இந்த நிலத்துல 2 ஏக்கர்ல சந்தனம், தேக்கு... அப்படின்னு பல மரங்களை நட்டு மைக்ரோ என்விரான்மென்ட் சூழலை உருவாக்கி மிளகு, ஜாதிக்காய் போன்ற மலைப்பிரதேச பயிர்களை விளைவிக்க போறேன். மேலும் ஒரு உணவுக்காடாகவும் மாத்தப்போறேன்’’ என உறுதியோடு தெரிவித்தார்.

தொடர்புக்கு:

அரவிந்தன்: 95008 31716.

பலவகை பழமரங்கள்

பல்வேறு பழமரங்களை சாகுபடி செய்துவரும் அரவிந்தன் நாவலில் ஜம்பு நாவல், நாட்டு நாவல், வெண் நாவல் ஆகிய ரகங்களை வைத்திருக்கிறார். கொய்யாவில் லக்னோ 49, பன்னீர் கொய்யா, அர்கா கொய்யா, நாட்டு சிவப்பு கொய்யா, பீட்ரூட் கொய்யா ஆகிய ரகங்களை வைத்திருக்கிறார். இதில் பீட்ரூட் கொய்யாவில் தற்போது மகசூல் வர ஆரம்பித்திருக்கிறது. ஆனால் 2 ஆண்டுகளுக்கு மேல் வரும் மகசூலே சிறந்த மகசூலாக இருக்கும் என்பதால், தற்போது வரும் பிஞ்சுகளை உதிர்த்து விடுகிறார்.