Dinakaran Cinema Button CINEMA Astrology Button ASTROLOGY  Magazines Logo VIDEOS Sun network Logo Epaper LogoEpaper Facebook
search-icon-img
Advertisement

தெ.ஆ உடன் முதல் ஓடிஐ இந்தியா அட்டகாச வெற்றி

ராஞ்சி: தென் ஆப்ரிக்காவுக்கு எதிரான முதல் ஒரு நாள் போட்டியில், விராட் கோஹ்லி, ரோகித் சர்மாவின் அதிரடி ஆட்டத்தால், 17 ரன் வித்தியாசத்தில் இந்தியா அபார வெற்றி பெற்றது. இந்தியா - தென் ஆப்ரிக்கா கிரிக்கெட் அணிகள் இடையே 3 ஒரு நாள் போட்டிகள் கொண்ட தொடர் நடந்து வருகிறது. ராஞ்சியில் நேற்று நடந்த முதல் ஒரு நாள் போட்டியில் முதலில் களமிறங்கிய இந்திய அணியின் துவக்க வீரர் யஷஸ்வி ஜெய்ஸ்வால் 18 ரன்னில் ஆட்டமிழந்தார்.

2வது விக்கெட்டுக்கு இணை சேர்ந்த முன்னாள் கேப்டன்கள் ரோகித் சர்மா, விராட் கோஹ்லி அட்டகாசமாக ஆடி 136 ரன்கள் குவித்திருந்தபோது, ரோகித் (57 ரன்) ஆட்டமிழந்தார். அதன் பின்னும் ரன் வேட்டையாடிய கோஹ்லி 120 பந்துகளில் 7 சிக்சர், 11 பவுண்டரிகளுடன் 135 ரன்கள் விளாசினார். பின் வந்தோரில், கேப்டன் கே.எல்.ராகுல் 60, ரவீந்திர ஜடேஜா 32, வாஷிங்டன் சுந்தர் 13 ரன் எடுத்தனர். 50 ஓவரில் இந்தியா 8 விக்கெட் இழந்து 349 ரன் குவித்தது.

பின்னர், 350 ரன் எடுத்தால் வெற்றி என்ற கடின இலக்குடன் தென் ஆப்ரிக்காவின் துவக்க வீரர்களாக களமிறங்கிய கேப்டன் அய்டன் மார்க்ரம் 7 ரன்னிலும், ரையான் ரிக்கெல்டன், பின் வந்த குவின்டன் டிகாக் ரன் எடுக்காமலும் ஆட்டமிழந்தனர். பின் வந்தோரில் மேத்யூ பிரீட்ஸ்கி (72 ரன்), மார்கோ யான்சன் (70 ரன்) இணை சிறப்பாக ஆடி 6வது விக்கெட்டுக்கு 68 பந்துகளில் 97 ரன் குவித்து ஆட்டமிழந்தனர். கோர்பின் பாஷ் சிறப்பாக ஆடி 67 ரன் குவித்து அவுட்டானார். கடைசியில் 49.2 ஓவரில் தென் ஆப்ரிக்கா 332 ரன்னுக்கு ஆல் அவுட்டானது. அதனால், 17 ரன் வித்தியாசத்தில் இந்தியா வெற்றி பெற்றது. இந்தியா தரப்பில், குல்தீப் யாதவ் 4, ஹர்சித் ராணா 3, அர்ஷ்தீப் சிங் 2, பிரசித் கிருஷ்ணா 1 விக்கெட் எடுத்தனர்.