என்எஸ்125 எல்ஏ ஸ்கூட்டர்

ஹோண்டா என்எஸ்125 எல்ஏ என்ற ஸ்கூட்டர் மாடலுக்கு இந்தியாவில் காப்புரிமை பதிவு செய்துள்ளது. ரெட்ரோ வடிவிலான இந்த ஸ்கூட்டர் சீனா உள்பட சில சர்வதேசச் சந்தைகளில் விற்பனை செய்யப்பட்டு வருகிறது. இதற்கு முன்பு ஸ்கூப்பி, என்பிஎப் 125, சிபி190டிஆர் மற்றும் சிஜி160 ஆகிய மாடல்களுக்கும் காப்புரிமை பதிவு செய்திருந்தது.

இதில் 124சிசி சிங்கிள் சிலிண்டர் ஏர்கூல்டு இன்ஜின் இடம் பெற்றுள்ளது. இது அதிகபட்சமாக 9.5 எச்பி பவரையும், 10 என்எம் டார்க்கையும் வெளிப்படுத்தும். ஸ்மார்ட் போன் இணைப்புடன் கூடிய டிஎப்டி டிஸ்பிளே, டயரில் காற்றழுத்தம் உள்ளதை கண்காணிக்கும் அமைப்பு உள்பட பல அம்சங்கள் இதில் இருக்கின்றன.

ஏறக்குறைய இந்தியச் சந்தையில் விற்பனையில் உள்ள ஆக்டிவா 125 திறனுடன் ஒப்புமை உடையதாக இது உள்ளது. புதிய ஸ்கூட்டர் இந்தியாவில் சந்தைப்படுத்தப்படுமா என்ற விவரம் வெளியாகவில்லை.