அடுத்த வெற்றிக்காக இன்று ஐதராபாத்-சென்னை மோதல்

ஐதராபாத்: ஐபிஎல் டி20 கிரிக்கெட் தொடரின் 18வது லீக் ஆட்டத்தில் சன் ரைசர்ஸ் ஐதராபாத்-சென்னை சூப்பர் கிங்ஸ் அணிகள் களம் காண உள்ளன. ஐதராபாத்தில் இன்று நடைபெறும் இந்த ஆட்டம் இந்த 2 அணிகளும் 4வது லீக் ஆட்டமாகும். இதுவரை 3 ஆட்டங்களில் ஆடியுள்ள நிலையில் ஐதராபாத் ஒரு வெற்றி, 2 தோல்விகளுடனும், சென்னை 2வெற்றி, ஒரு தோல்வியுடனும் உள்ளன. மும்பைக்கு எதிரான ஆட்டத்தில் சாதனை வெற்றியை பெற்ற பேட் கம்மின்ஸ் தலைமையிலான ஐதராபாத், தோற்ற ஆட்டங்களிலும் நூலிழையில்தான் வெற்றி வாய்ப்பை இழந்துள்ளது.

அதற்கேற்ப மயாங்க், அபிஷேக், திரிபாதி, மார்க்ரம், கிளாஸன் என அதிரடி வீரர்கள் வரிசைக் கட்டி எதிரணியை அச்சறுத்தி வருகின்றனர். பந்து வீச்சாளர்களும் கூடுதல் கவனம் செலுத்தினால் ருதுராஜ் தலைமையிலான நடப்பு சாம்பயின் சென்னைக்கு இன்றைய ஆட்டம் பெரும் அச்சுறுத்தலாக அமையலாம். அதே நேரத்தில் சென்னையின் ருதுராஜ், ரச்சின் ரவீந்திரா ஆகியோர் விளையாடினால் எதிரணிக்கு தடுமாறறம்தான். கூடவே ரகானே, மிட்சல், துபே, ஜடேஜா, முஸ்டாஃபிசூர், பதிரானா ஆகியோரும் ஆடினால் எதிரணிக்கு கடும் சவாலை சந்திக்க வேண்டி இருக்கும். ஆனாலும் இதுவரை நடந்த ஆட்டங்களில் சொந்த மண்ணில் விளையாடுவது ஐதராபாத்துக்கு சாதகமாகவும், வெளியூரில் விளையாடுவது சென்னைக்கு பாதகமாகவும் அமைந்துள்ளன.

நேருக்கு நேர்

* ஐதராபாத்-சென்னை அணிகள் ஐபிஎல் தொடர்களில் நேருக்கு நேர் மோதிய 19 ஆட்டங்களில் சென்னை 14லும், ஐதராபாத் 5லும் வென்று இருக்கின்றன.

* இந்த இரண்டு அணிகளுக்கும் இடையிலான ஆட்டங்களில் அதிகபட்சமாக சென்னை 223, ஐதராபாத் 192ரன் எடுத்துள்ளன. குறைந்தபட்சமாக ஐதராபாத் 134, சென்னை 132ரன் எடுத்துள்ளன.

* இந்த 2 அணிகளும் கடைசியாக விளையாடிய 5 ஆட்டங்களில் சென்னை 4-1 என்ற கணக்கில் முன்னிலையில் உள்ளது.

* இவ்விரு அணிகளும் ஐபிஎல் தொடர்களில் மற்ற அணிகளுடனும் கடைசியாக விளையாடிய 5 ஆட்டங்களில் சென்னை 4-1 என்ற கணக்கிலும், ஐதராபாத் 1-4 என்ற கணக்கில் வெற்றி, தோல்விகளை சந்தித்துள்ளன.