கூட்டுப்பண்ணையத்தில் கோடி நன்மைகள்!

விவசாயம் என்பது மனித சமூகத்திற்கு மிகவும் இன்றியமையாதது. உணவு, உடை, இருப்பிடம் ஆகிய வாழ்வின் மூன்று அடிப்படைத் தேவைகளில் ஒன்றான உணவை அளிக்கும் துறை என்பதால் விவசாயத்திற்கு உலகின் அனைத்து பகுதிகளிலும் உரிய மரியாதை இருக்கிறது. இருந்தபோதும் விளைபொருட்களுக்கான சந்தை சிக்கல், அதிகமான செலவீனம், குறைந்த வருவாய் போன்ற காரணிகளால் விவசாயத் தொழில் சவால்களை எதிர்கொண்டு வருகிறது. இதற்கான ஒரு தீர்வாக உலகின் பல பகுதிகளில் “கூட்டுப்பண்ணையம்” எனப்படும் ஒரு சிறந்த முறை கடைபிடிக்கப்பட்டு வருகிறது. நில உரிமை தனித்தனி நபர்களிடம் இருந்தாலும் உழவு, பாசனம், விதை வாங்குதல், உரம், இயந்திரப் பயன்பாடு, அறுவடை, விற்பனை போன்றவை அனைத்தும் ஒருங்கிணைந்து, குழுவாகச் செய்வதுதான் கூட்டுப்பண்ணையம். இதைச் செய்யும் விவசாயிகள் தங்களுக்குள் ஒரு உத்தியோகபூர்வமான ஒப்பந்தத்தை ஏற்படுத்திக் கொள்வார்கள். அந்த ஒப்பந்தத்தில், பயிரிடும் திட்டம், செலவு பகிர்வு, லாபப் பங்கீடு, வேலை ஒதுக்கீடு, சந்தைப்படுத்தல் நடவடிக்கைகள் அனைத்தும் முன்கூட்டியே தீர்மானிக்கப்படும்.

இந்தக் கருத்து புதிதல்ல. இந்தியாவின் பஞ்சாயத்து முறையிலும், பழைய காலக்கூட்டு உழவுத் திட்டங்களிலும், பாசனக் கால்வாய் பராமரிப்பு பணிகளிலும் இதற்கு இணையான நடைமுறைகள் இருந்தன. ஆனால் தற்போதைய “கூட்டுப்பண்ணையம்” ஒரு திட்டமிட்ட கணக்கு பராமரிப்பு கொண்ட சட்டரீதியான அமைப்பாக மாறியுள்ளது. குறிப்பாக 1960களில் பசுமைப் புரட்சி வந்தபோது, சில மாநிலங்களில் கூட்டுப்பண்ணைய முயற்சிகள் நடந்தன. தமிழகத்தில் 1980களின் இறுதியில் சில மாவட்டங்களில் விவசாய சங்கங்கள் மூலம் கூட்டாக பாசனத் திட்டங்கள், விதை வாங்குதல், சந்தைப்படுத்தல் போன்றவை தொடங்கப்பட்டன.நவீன காலத்தில் இதை வெற்றிகரமாகச் செய்ய சில அடிப்படை அம்சங்கள் தேவைப்படுகிறது. முதலில், ஒரே பகுதி அல்லது அருகிலுள்ள பகுதிகளில் உள்ள விவசாயிகள் ஒன்றுகூடி, “விவசாயிகள் கூட்டுறவு குழு” அல்லது “பண்ணை உற்பத்தியாளர் நிறுவனம்” (FPO) உருவாக்க வேண்டும். ஒவ்வொருவரின் நில அளவு, நிலத்தின் மண் தரம், பாசன வசதி, முன் அனுபவம், தற்போதைய பயிரிடும் பழக்கம் போன்ற விவரங்கள் சேகரிக்கப்பட வேண்டும்.பின்னர், மண் பரிசோதனை செய்து, எந்தப் பகுதியில் எந்தப் பயிர் அதிக மகசூல் தரும் என்பதைத் தீர்மானிக்க வேண்டும். விதைகள் ஒரே தரத்தில், ஒரே நாளில், ஒரே முறையில் விதைக்கப்பட வேண்டும். உரம், பூச்சிக்கொல்லிகள் போன்றவற்றை மொத்தமாக வாங்கி, தள்ளுபடி விலையில் பெற்றுக்கொள்ள முடியும். பாசன வசதி ஒன்றாக அமைக்கப்படலாம். டிரிப், ஸ்பிரிங்க்ளர், குழாய் பாசனம் ஆகியவை மொத்தமாக நிறுவினால் செலவு குறையும்.

அறுவடை நேரத்தில் இயந்திரப் பயன்பாடு மிக முக்கியம். டிராக்டர், ஹார்வெஸ்டர் போன்றவற்றை தனித்தனியாக வாங்குவது சிரமம். ஆனால் குழுவாக வாங்கி, அனைவரும் பகிர்ந்து பயன்படுத்தலாம். அறுவடை செய்யப்பட்ட பிறகு, விற்பனை நடவடிக்கையும் ஒருங்கிணைந்த முறையில் நடக்க வேண்டும். அதிக அளவில், ஒரே தரத்தில் பொருட்கள் சந்தைக்கு வந்தால் வியாபாரிகள் போட்டி போட்டு வாங்குவார்கள். இதனால் சந்தை விலை உயரும்.இது பொருளாதார ரீதியாக மட்டுமல்ல, சமூக ரீதியாகவும் பல நன்மைகள் தருகிறது. கிராமத்தில் வேலை வாய்ப்பு அதிகரிக்கும். பெண்களும் இளைஞர்களும் விதைத் தேர்வு, பாசனம், பயிர் பராமரிப்பு, அறுவடை, பேக்கேஜிங், விற்பனை ஆகிய செயல்களில் பங்கேற்க முடியும். புதிய தொழில்நுட்பங்களைப் பயன்படுத்தும் வாய்ப்பும் கிடைக்கும். உதாரணமாக, டிரோன் மூலம் பூச்சிக்கொல்லி தெளித்தல், மொபைல் ஆப்ஸ் மூலம் சந்தை விலை அறிதல், ஆன்லைன் மூலம் நேரடி விற்பனை செய்வது போன்றவை சாத்தியமாகும்.

ஆனால் இந்த முறையில் சில சவால்களும் உள்ளன. முக்கியமானது நம்பிக்கை. உறுப்பினர்கள் அனைவரும் ஒருவர் மேல் ஒருவர் நம்பிக்கை வைக்க வேண்டும். செலவுகள் மற்றும் வருவாய்கள் வெளிப்படையாக இருக்க வேண்டும். யார் எவ்வளவு வேலை செய்தார்கள், யார் எவ்வளவு செலவு செய்தார்கள், யாருக்கு எவ்வளவு லாபம் கிடைக்க வேண்டும் என்பதில் தெளிவு அவசியம். சில நேரங்களில் நல்ல மகசூல் கிடைக்காமல் போனால் அல்லது சந்தை விலை குறைந்தால், மன உளைச்சல்கள் ஏற்படலாம். அவற்றைத் தவிர்க்க முன்கூட்டியே திட்டமிடல், ஆவணப்படுத்தல், காப்பீடு, அரசின் உதவித் திட்டங்கள் ஆகியவற்றைப் பயன்படுத்த வேண்டும். தமிழகத்தில் தற்போது சில மாவட்டங்களில் கூட்டுப்பண்ணையம் சிறப்பாக நடைபெற்று வருகிறது. நாமக்கல், ஈரோடு, திருப்பூர், திண்டுக்கல் பகுதிகளில் பால் உற்பத்தி, காய்கறி, மலர், வாழைப்பழம், பயறு போன்றவற்றில் இம்முறை வெற்றிகரமாக செயல்படுகிறது. இங்கு, விவசாயிகள் தங்கள் நில உரிமையை வைத்துக்கொண்டே, அனைத்து உற்பத்தி நடவடிக்கைகளையும் ஒரே நேரத்தில், ஒரே தரத்தில் நடத்துவதால், லாபம் அதிகமாகிறது.மொத்தத்தில், கூட்டுப்பண்ணையம் என்பது செலவை குறைத்து, மகசூலை உயர்த்தி, சந்தையில் விலை பேசும் வலிமையை அளிக்கும் ஒரு நடைமுறை. இது ஒருங்கிணைந்த உழைப்பை, திட்டமிட்ட செயல்பாட்டை, பரஸ்பர நம்பிக்கையை, தொழில்நுட்ப முன்னேற்றத்தை இணைக்கும் பாலமாகும். சரியாக செயல்பட்டால், சிறு நில விவசாயிகளுக்கும் பெரிய நில விவசாயிகளுக்கும் ஒரே அளவிலான நன்மையை அளிக்கும் திறன் கூட்டுப்பண்ணையத்திற்கு உண்டு.