தேசிய நலனுக்கு மாறாக பாகிஸ்தானுடன் கிரிக்கெட் மட்டும் விளையாடலாமா? காங்கிரஸ் கேள்வி

கவுகாத்தி: தேச நலனுக்கு மாறாக பாகிஸ்தானுடன் கிரிக்கெட் மட்டும் விளையாடலாமா என்று காங்கிரஸ் கேள்வி எழுப்பியுள்ளது. காஷ்மீர் பஹல்காம் தாக்குதலுக்கு பிறகு இந்தியா, பாகிஸ்தான் இடையிலான அனைத்து தொடர்புகளும் ரத்து செய்யப்பட்டுள்ளது. இந்த நிலையில் ஆசிய கோப்பை கிரிக்கெட் போட்டியில் செப்.14 அன்று துபாயில் பாகிஸ்தான் அணியை எதிர்த்து இந்தியா விளையாட உள்ளது. இதற்கு காங்கிரஸ் எதிர்ப்பு தெரிவித்துள்ளது. மக்களவை எதிர்க்கட்சி துணைத்தலைவர் கவுரவ் கோகாய் இதுகுறித்து பிசிசிஐ செயலாளர் தேவஜித் சைகியாவுக்கு எழுதிய கடிதத்தில் கூறியிருப்பதாவது: கிரிக்கெட் எப்போதும் மக்களிடையே மகிழ்ச்சியைத் தரும் விளையாட்டாக இருந்து வருகிறது. தற்போதைய இந்தியா மற்றும் பாகிஸ்தான் உறவுகளின் பின்னணியில், அத்தகைய ஈடுபாடுகள் தேசிய நலனை விட முன்னுரிமை அளிக்கப்படக்கூடாது. எல்லை தாண்டிய பதட்டங்கள் இன்னும் நீடிக்கின்றன. நமது ஆயுதப்படைகளின் தியாகங்களை நாம் அனைவரும் அறிவோம். இதுபோன்ற சூழ்நிலைகளில், பாகிஸ்தானுடன் இருதரப்பு கிரிக்கெட் விளையாடுவது தேசிய நலனுக்கு முரணாகத் தெரிகிறது.

சிந்து நதி நீர் ஒப்பந்தத்திலிருந்து இந்தியா வெளியேறியதைக் குறிப்பிட்ட நமது பிரதமர் கூட தண்ணீரும், ரத்தமும் ஒன்றாகப் பாய முடியாது என்று குறிப்பிட்டார். இந்த கட்டத்தில் பாகிஸ்தானுடன் ஈடுபடுவது, தேசிய பாதுகாப்பில் எந்தவொரு சமரசத்திற்கும் எதிராக உறுதியாக நிற்கும் இந்திய மக்களின் உணர்வுகளை குறைமதிப்பிற்கு உட்படுத்தும் ஒரு செய்தியை அனுப்புகிறது. தற்போதைய சூழ்நிலையில் கிரிக்கெட் உறவுகளை மீண்டும் தொடங்குவது பாதுகாப்பு மற்றும் ராஜதந்திரம் தொடர்பான தேசிய கவலைகளின் தீவிரத்தை நீர்த்துப்போகச் செய்யலாம். இந்தியாவின் நிலைப்பாடு ஒற்றுமை, வலிமை மற்றும் நமது இறையாண்மை மற்றும் பாதுகாப்புக்கான உயர்ந்த மரியாதையை பிரதிபலிக்க வேண்டும். தேசிய நலனுக்கு சாதகமான சூழ்நிலைகள் உருவாகும் வரை பிசிசிஐ தெளிவான நிலைப்பாட்டை எடுக்க வேண்டும். இவ்வாறு தெரிவிக்கப்பட்டுள்ளது.