2021, 2022, 2023ம் ஆண்டுகளுக்கான கலைமாமணி 90 கலைஞர்களுக்கு விருதுகள் அறிவிப்பு: அனிருத், சாய் பல்லவி, எஸ்.ஜே.சூர்யா, பூச்சி முருகனுக்கு விருது, கே.ஜே.யேசுதாசுக்கு எம்.எஸ்.சுப்புலட்சுமி விருது, தமிழக அரசு அறிவிப்பு

சென்னை: தமிழக அரசு நேற்று கலைமாமணி விருதுகளை அறிவித்துள்ளது. கடந்த 2021, 2022, 2023ம் ஆண்டுகளுக்கான கலைமாமணி விருதுகள் மற்றும் பாரதியார், எம்.எஸ்.சுப்புலட்சுமி, பாலசரசுவதி ஆகியோர் பெயரில் வழங்கப்படும் அகில இந்திய விருதுகள் அறிவிக்கப்பட்டுள்ளது. தமிழக முதல்வர் மு.க.ஸ்டாலின் தலைமையில், அடுத்த மாதம் சென்னை கலைவாணர் அரங்கில் நடக்கும் விழாவில் விருதாளர்களுக்கு இந்த விருதுகள் வழங்கி சிறப்பிக்கப்படுகிறது.

தமிழக அரசு சார்பில் தமிழ்நாடு இயல், இசை, நாடக மன்றத்தின் மூலம் பல்வேறு கலைப்பிரிவுகளை சேர்ந்த சிறந்த கலைஞர்களுக்கு கலைமாமணி விருதுகள் வழங்கப்பட்டு வருகிறது. பாரதியார், எம்.எஸ்.சுப்புலட்சுமி, பாலசரசுவதி ஆகியோர் பெயர்களில் அகில இந்திய விருதுகள் அறிவிக்கப்பட்டு வழங்கப்படுகிறது. மேலும், சிறந்த கலைநிறுவனத்துக்கு கேடயமும், சிறந்த நாடகக்குழுவுக்கு சுழற்கேடயமும் வழங்கப்படுகின்றன. தற்போது 2021, 2022, 2023ம் ஆண்டுகளுக்கான கலைமாமணி விருதுகள் வழங்கப்பட இருக்கிறது.

கலைமாமணி விருது வழங்கக்கோரி வரப்பெற்ற விண்ணப்பங்கள் தமிழ்நாடு இயல், இசை, நாடக மன்றத்தால் இயல், இசை, நாட்டியம், நாடகம், திரைப்படம், சின்னத்திரை, இசை நாடகம், கிராமியக்கலைகள் மற்றும் இதர கலைப்பிரிவுகள் என்று கலைப்பிரிவு வாரியாக பிரிக்கப்பட்டு, கலைமாமணி விருது பெற தகுதியுள்ள கலைஞர்களை தேர்வு செய்திட, கலைப்பிரிவு வாரியாக வல்லுநர் குழுக்கள் அமைக்கப்பட்டன.

மேற்படி வல்லுநர் குழுக்களால் அளிக்கப்பட்ட தகுதியுள்ள கலைஞர்களின் பெயர் பட்டியல் தமிழ்நாடு இயல், இசை, நாடக மன்றத்தின் பொதுக்குழு கூட்டத்தில் ஒப்புதல் அளிக்கப்பட்டு, இயற்றப்பட்ட தீர்மானம் மற்றும் பரிந்துரையை ஏற்று 2021, 2022, 2023ம் ஆண்டுகளுக்கான கலைமாமணி விருதுகள் பெறும் விருதாளர்களின் பெயர் பட்டியல் இணைப்பில் கண்டவாறு, தமிழக அரசு நேற்று வெளியிட்டுள்ள அரசாணையில் அறிவித்துள்ளது.

கலைமாமணி விருது பெறும் கலைஞர்களுக்கு 3 சவரன் எடையுள்ள தங்கப்பதக்கம் மற்றும் விருது பட்டயம் வழங்கப்படும். மேலும் பாரதியார், எம்.எஸ்.சுப்புலட்சுமி, பாலசரசுவதி ஆகியோர் பெயரில் வழங்கப்படும் கலை வித்தகர்களுக்கான அகில இந்திய விருதுகளும் கீழ்க்கண்டவாறு அரசால் அறிவிக்கப்பட்டுள்ளது. சிறப்பு விருது கலை வித்தகர்கள் பெயர்கள்: பாரதியார் விருது (இயல்) முனைவர் ந.முருகேச பாண்டியன்.

எம்.எஸ்.சுப்புலட்சுமி விருது (இசை) பத்மபூஷண் டாக்டர் கே.ஜே.யேசுதாஸ். பாலசரசுவதி விருது (நாட்டியம்) பத்மஸ்ரீ முத்துகண்ணம்மாள். அகில இந்திய விருது பெறும் கலைவித்தர்களுக்கு ஒரு லட்ச ரூபாய் பரிசுத்தொகைக்கான காசோலையுடன், 3 சவரன் எடையுள்ள தங்கப்பதக்கம் வழங்கப்படும்.

* 2021ம் ஆண்டுக்கான கலைமாமணி விருது பெறும் கலைஞர்கள் பட்டியல்:

1.க.திருநாவுக்கரசு (எழுத்தாளர்) 2.கவிஞர் நெல்லை ஜெயந்தா (இயற்றமிழ் கவிஞர்) 3.எஸ்.சந்திரசேகர் (எ) தங்கம்பட்டர் (சமய சொற்பொழிவாளர்) 4.பாபநாசம் அசோக் ரமணி (குரலிசை) 5. பா.சற்குருநாதன் (ஓதுவார் திருமுறை தேவார இசை) 6.டி.ஏ.எஸ்.தக்கேசி (தமிழிசை பாடகர்) 7.திருச்சூர் சி.நரேந்திரன் (மிருதங்கம்) 8.என்.நரசிம்மன் (கோட்டு வாத்தியம்) 9.கோ.பில்லப்பன் (நாதசுர ஆசிரியர்) 10.திருக்காட்டுப்பள்ளி டி.ஜே.சுப்பிரமணியன் (நாதசுரம்) 11.கல்யாணபுரம் ஜி.சீனிவாசன் (நாதசுரம்) 12.திருவல்லிக்கேணி கே.சேகர் (தவில்) 13.வழுவூர் எஸ்.பழனியப்பன் (பரத நாட்டிய ஆசிரியர்) 14.பிரியா கார்த்திகேயன் (பரத நாட்டியம்) 15.பூச்சி எஸ்.முருகன் (நாடக நடிகர்) 16.காரைக்குடி நாராயணன் (நாடக இயக்குனர்) 17.என்.ஏ.அலெக்ஸ் (ஆர்மோனியம்) 18.எஸ்.ஜே.சூர்யா (திரைப்பட நடிகர்) 19.சாய் பல்லவி (திரைப்பட நடிகை) 20.லிங்குசாமி (திரைப்பட இயக்குனர்) 21.ஜே.கே (எ) எம்.ஜெயகுமார் (திரைப்பட அரங்க அமைப்பாளர்) 22.சூப்பர் சுப்பராயன் (திரைப்பட சண்டை பயிற்சியாளர்) 23.பி.கே.கமலேஷ் (சின்னத்திரை நடிகர்) 24.எம்.பி.விசுவநாதன் (இசை நாடக நடிகர்) 25.வீரசங்கர் (கிராமிய பாடகர்) 26. நா.காமாட்சி (பொய்க்கால் குதிரை ஆட்டம்) 27.எம்.முனுசாமி (பெரியமேளம்) 28.பி.மருங்கன் (நையாண்டி மேள நாதசுரம்) 29.கே.கே.சி.பாலு வள்ளி (ஒயில் கும்மி) 30.வே.ஜீவானந்தன் (ஓவியர்).

* 2022ம் ஆண்டுக்கான கலைமாமணி விருது பெறும் கலைஞர்கள் பட்டியல்:

1.சாந்தகுமாரி சிவகடாட்சம் (எழுத்தாளர்) 2.முனைவர் தி.மு.அப்துல் காதர் (இலக்கிய பேச்சாளர்) 3.சு.முத்துகணேசன் (சமய சொற்பொழிவாளர்) 4.ஜெயஸ்ரீ வைத்தியநாதன் (குரலிசை) 5.சாரதா ராகவ் (குரலிசை) 6.பகலா ராமதாஸ் (வயலின்) 7.நெய்வேலி ஆர்.நாராயணன் (மிருதங்கம்) 8.செம்பனார்கோயில் எஸ்.ஜி.ஆர்.எஸ்.மோகன்தாஸ் (நாதசுரம்) 9.சித்துக்காடு டி.ஜி.முருகவேல் (நாதசுரம்) 10.திருக்கடையூர் டி.ஜி.பாபு (தவில்) 11.சுசித்ரா பாலசுப்பிரமணியன் (கதாகாலட்சேபம்) 12.அமுதா தண்டபாணி (பரத நாட்டிய ஆசிரியர்) 13.வி.சுப்பிரமணிய பாகவதர் (பாகவத மேளா) 14.சுவாமி மலை கே.சுரேஷ் (பரதநாட்டிய குரலிசை) 15.பொன் சுந்தரேசன் (நாடக நடிகர்) 16.கவிஞர் இரா.நன்மாறன் (நாடக இயக்குனர்) 17.சோலை ராஜேந்திரன் (நாடக தயாரிப்பாளர்) 18.விக்ரம் பிரபு (திரைப்பட நடிகர்) 19.ஜெயா வி.சி.குகநாதன் (திரைப்பட நடிகை) 20.விவேகா (திரைப்பட பாடலாசிரியர்) 21.டைமண்ட் பாபு (திரைப்பட செய்தி தொடர்பாளர்) 22.டி.லட்சுமிகாந்தன் (திரைப்பட புகைப்படக்கலைஞர்) 23.’மெட்டிஒலி’ காயத்ரி (சின்னத்திரை நடிகை) 24.என்.சத்யராஜ் (இசை நாடக நடிகர்) 25.ந.ரஞ்சிதவேல் பொம்மு (தேவராட்டம்) 26.மு.கலைவாணன் (பொம்மலாட்டம்) 27.எம்.எஸ்.சி.ராதாரவி (தப்பாட்டம்) 28.கே.பாலு (நையாண்டி மேள நாதசுரம்) 29.ஆர்.சாமிநாதன் (பண்பாட்டு கலை பரப்புநர்) 30.கே.லோகநாதன் (ஓவியர்).

* 2023ம் ஆண்டுக்கான கலைமாமணி விருது பெறும் கலைஞர்கள் பட்டியல்:

1.கே.ஜீவபாரதி (இயற்றமிழ் கவிஞர்) 2.ஆர்.காசியப் மகேஷ் (குரலிசை) 3.ஹேமலதா மணி (வீணை) 4.வே.பிரபு (கிளாரினெட்) 5.பி.பி.ரவிச்சந்திரன் (நாதசுரம்) 6.ஞான நடராஜன் (நாதசுரம்) 7.எம்.எஸ்.ஆர்.பரமேஸ்வரன் (நாதசுரம்) 8.ராமஜெயம் பாரதி (தவில்) 9.பா.ராதாகிருஷ்ணன் (தவில்) 10.க.தனசுந்தரி (பரத நாட்டிய ஆசிரியர்) 11.வி.ஜெயப்பிரியா (குச்சுப்புடி நாட்டியம்) 12.கே.ஹரி பிரசாத் (பரத நாட்டிய குரலிசை) 13.என்.ஜோதி கண்ணன் (பழம்பெரும் நாடக நடிகர்) 14.வானதி கதிர் (எ) பெ.கதிர்வேல் (நாடக நடிகர்) 15.வி.கே.தேவநாதன் (விழிப்புணர்வு நாடக நடிகர்) 16.கே.மணிகண்டன் (திரைப்பட நடிகர்) 17.எம்.ஜார்ஜ் மரியான் (திரைப்பட குணச்சித்திர நடிகர்) 18.அனிருத் (திரைப்பட இசை அமைப்பாளர்) 19.ஸ்வேதா மோகன் (திரைப்பட பின்னணி பாடகி) 20.சாண்டி (எ) அ.சந்தோஷ் குமார் (திரைப்பட நடன இயக்குனர்) 21. நிகில் முருகன் (திரைப்பட செய்தி தொடர்பாளர்) 22.என்.பி.உமா சங்கர் பாபு (சின்னத்திரை நிகழ்ச்சி தொகுப்பாளர்) 23.அழகன் தமிழ்மணி (சின்னத்திரை நிகழ்ச்சி தயாரிப்பாளர்) 24.ஏ.ஆர்.ஏ.கண்ணன் (இசை நாடக நடிகர்) 25.ஆர்.எம்.தமிழ்ச்செல்வி (இசை நாடக நடிகை) 26.கே.எம்.ராமநாதன் (தெருக்கூத்து) 27.டி.ஜெகநாதன் (வில்லுப்பாட்டு) 28.சி.மகாமணி (நையாண்டி மேள தவில்) 29.ஆ.சந்திரபுஷ்பம் (கிராமிய பாடல் ஆய்வாளர்) 30.சு.தீனதயாளன் (சிற்பி).