ஜெட் வேகத்தில் அதிகரித்த தங்கம் விலை பவுனுக்கு ரூ.720 குறைந்தது

சென்னை: தங்கம் விலை ஜெட் வேகத்தில் அதிகரித்து வந்த நிலையில் நேற்று பவுனுக்கு ரூ.720 குறைந்தது. தங்கம் விலை கடந்த மாதத்தில் இருந்து அதிரடியாக உயர்ந்து வருகிறது. அதன் பிறகு மாதம் இறுதியில் இருந்து தினம், தினம் விலையேற்றம் என்ற வகையில் வரலாற்று உச்சத்தை கண்டு வந்தது. அதன் பிறகு கடந்த 22ம் தேதி தங்கம் விலை காலை, மாலை என போட்டி போட்டு உயர்ந்தது. அன்றைய தினம் மட்டும் ரூ.1,120 வரை அதிகரித்து பவுன் ரூ.83,440க்கு விற்கப்பட்டது. தொடர்ந்து மறுநாள் 23ம் தேதியும் தங்கம் விலை காலை, மாலை என 2 வேளை உயர்ந்தது. காலையில் பவுனுக்கு ரூ.560, மாலையில் பவுனுக்கு ரூ.1,120 என ஒரே நாளில் பவுனுக்கு ரூ.1,680 உயர்ந்து ஒரு பவுன் ரூ.85,120க்கு விற்கப்பட்து.

இந்நிலையில் நேற்று முன்தினம் யாரும் எதிர்பார்க்காத வகையில் தங்கம் விலை குறைந்தது. அன்றைய தினம் கிராமுக்கு ரூ.40 குறைந்து ஒரு கிராம் ரூ.10,600க்கும், பவுனுக்கு ரூ.320 குறைந்து ஒரு பவுன் ரூ.84,800க்கும் விற்றது. தொடர்ந்து நேற்றும் தங்கம் விலை குறைந்தது. நேற்று கிராமுக்கு ரூ.90 குறைந்து ஒரு கிராம் ரூ.10,510க்கும், பவுனுக்கு ரூ.720 குறைந்து ஒரு பவுன் ரூ.84,080க்கும் விற்றது. இது நகை வாங்குவோருக்கு சற்று ஆறுதலை ஏற்படுத்தியுள்ளது. வெள்ளி விலையில் நேற்று எந்த மாற்றமும் ஏற்படவில்லை. ஒரு கிராம் வெள்ளி ரூ.150க்கும், பார் வெள்ளி ஒரு லட்சத்து 50 ஆயிரம் ரூபாய்க்கும் விற்பனை செய்யப்பட்டது.