பெங்களூருவில் ரூ.60 லட்சம் கொடுத்தும் போதவில்லையாம்... வரதட்சணை கேட்டு தொடர் டார்ச்சர்; கர்ப்பிணி ஐடி ஊழியர் தற்கொலை: கணவன் கைது; மாமியார், மாமனாரிடம் விசாரணை

பெங்களூரு: கர்நாடகா மாநிலம், பெங்களூரு சுத்தகுண்டேபாளையம் பகுதியை சேர்ந்தவர் பிரவீன். இவரது மனைவி ஷில்பா (27). இருவரும் சாப்ட்வேர் நிறுவனத்தில் பணியாற்றி வந்தனர். இவர்களுக்கு ஒன்றரை வயதில் ஒரு குழந்தை உள்ளது. மீண்டும் ஷில்பா கர்ப்பம் தரித்தார். திருமணத்தின்போது பிரவீனுக்கு வரதட்சணையாக ரூ.50 லட்சம் மற்றும் இதர பொருட்கள் கொடுக்கப்பட்டது. திருமணம் முடிந்த ஓராண்டில் பிரவீன், தனது ஐ.டி வேலையை விட்டுவிட்டு, பானிபூரி கடை நடத்தி வந்துள்ளார். இந்நிலையில், தொழில் தொடங்க கூடுதல் பணம் வாங்கி வரும்படி அடிக்கடி ஷில்பாவிடம் பிரவீன் தகராறு செய்ததாக கூறப்படுகிறது. அவரும், தனது பெற்றோரிடம் பேசி ரூ.10 லட்சத்தை பிரவீனுக்கு வாங்கி கொடுத்துள்ளார். அதற்கு பிறகும் கூடுதல் பணம் கேட்டு பிரவீனும் அவரது குடும்பத்தினரும் ஷில்பாவை தொடர்ந்து தொல்லை கொடுத்து வந்தனர்.

இதனால் விரக்தியடைந்த ஷில்பா, பிரவீனுடன் வாழ மறுத்து விட்டு பெற்றோர் வீட்டுக்கு சென்றுவிட்டார். சில காலம் கழித்து, பிரவீனின் குடும்பத்தினர் வந்து, ஷில்பாவை சமாதானப்படுத்தி மீண்டும் தங்கள் வீட்டிற்கு அழைத்து வந்தனர். சில நாட்கள்தான் கழிந்தது. மீண்டும் வரதட்சணைக் சித்ரவதை தொடர்ந்தது. இதனால் மிகுந்த மனமுடைந்த ஷில்பா, நேற்று வீட்டில் தூக்கு போட்டு தற்கொலை செய்து கொண்டார். இந்த சம்பவத்தை கேள்விபட்டதும் அவரது பெற்றோர் மற்றும் உறவினர்கள் கதறி அழுதனர். தகவலறிந்து போலீசார் சம்பவ இடத்திற்கு விரைந்து சென்று ஷில்பாவின் உடலை மீட்டு பிரேத பரிசோதனைக்கு அரசு மருத்துவமனைக்கு அனுப்பி வைத்தனர். இதற்கிடையில் சம்பவம் குறித்து ஷில்பாவின் பெற்றோர் போலீசில் புகார் செய்தனர். பிரவீன், அவரது தாய் சாந்தா, தங்கை பிரியா ஆகியோர் மீது போலீசார் வழக்கு பதிவு செய்தனர்.

பின்னர் தலைமறைவாக இருந்த பிரவீனை கைது செய்து அவரை சிறையில் அடைத்தனர். மாமியார், மாமனாரிடம் விசாரணை நடந்து வருகிறது. இச்சம்பவத்தால் அப்பகுதியில் பெரும் பரபரப்பு ஏற்பட்டுள்ளது.