ஒகேனக்கல் காவிரி, மேட்டூர் அணைக்கு நீர்வரத்து சரிவு

மேட்டூர்: காவிரி நீர்பிடிப்பு பகுதிகளில் பெய்யும் மழை, கர்நாடக அணைகளில் இருந்து உபரிநீர் திறப்பு ஆகியவற்றை பொறுத்து ஒகேனக்கல் காவிரி, மேட்டூர் அணைக்கான நீர்வரத்து அதிகரிப்பதும், சரிவதுமாக உள்ளது. ஒகேனக்கல் காவிரியில் நேற்று காலை வினாடிக்கு 32,000 கனஅடியாக இருந்த நீரவரத்து, இன்று காலை 24,000 கனஅடியாக குறைந்தது. அங்குள்ள அருவி மற்றும் ஆற்றில் குளிக்க 7வது நாளாகவும், பரிசல் இயக்க 6வது நாளாகவும் தடை தொடர்கிறது.

இதேபோல் மேட்டூர் அணைக்கு நேற்று காலை 35,500 கனஅடியாக இருந்த நீர்வரத்து இன்று காலை 25,500 கனஅடியாக சரிந்தது. அணையில் இருந்து நீர் மின் நிலையங்கள் வழியாக, வினாடிக்கு 22,300 கனஅடி, உபரிநீர் போக்கி வழியாக வினாடிக்கு 2,700 கனஅடி, மேல்மட்ட மதகுகள் வழியாக கிழக்கு மேற்கு கால்வாய் பாசனத்திற்கு 500 கனஅடி தண்ணீர் திறக்கப்படுகிறது. அணையின் நீர்மட்டம் இன்று 8வது நாளாக முழு கொள்ளளவான 120 அடியாகவும், நீர் இருப்பு 93.47 டிஎம்சியாகவும் உள்ளது.