நிலத்தடி நீர் மாசுபாடு எதிரொலி; பீகார் தாய்மார்களின் தாய்ப்பாலில் ‘யுரேனியம்’: குழந்தைகளின் உடல்நலம்  பாதிக்கும் அபாயம்

பாட்னா: பீகாரில் பாலூட்டும் தாய்மார்களின் தாய்ப்பாலில் யுரேனியம் துகள்கள் கலந்திருப்பது ஆய்வில் கண்டுபிடிக்கப்பட்டுள்ளது பெரும் அதிர்ச்சியை ஏற்படுத்தியுள்ளது. பீகார் மாநிலத்தில் குடிநீர் சுகாதாரம் மற்றும் நிலத்தடி நீர் மாசுபாடு குறித்துப் பல்வேறு ஆய்வுகள் மேற்கொள்ளப்பட்டு வருகின்றன. இந்நிலையில், அம்மாநிலத்தின் 6 மாவட்டங்களில் பாலூட்டும் தாய்மார்களிடம் நடத்தப்பட்ட புதிய ஆய்வில், அவர்களது தாய்ப்பாலில் யுரேனியம் (யு-238) துகள்கள் இருப்பது உறுதி செய்யப்பட்டுள்ளது.

ஒரு லிட்டர் தாய்ப்பாலில் 5.25 மைக்ரோகிராம் வரை யுரேனியம் இருப்பது கண்டறியப்பட்டுள்ளது. இந்த நச்சுத்தன்மை வாய்ந்த துகள்கள், பச்சிளம் குழந்தைகளின் சிறுநீரகம், நரம்பு மண்டலம் மற்றும் எலும்பு வளர்ச்சியை நீண்ட காலத்தில் பாதிக்கக்கூடும் என்று ஆராய்ச்சியாளர்கள் எச்சரித்துள்ளனர். நிலத்தடி நீரில் கலந்துள்ள யுரேனியம், அதனைப் பருகும் தாய்மார்களின் வழியாகத் தாய்ப்பாலிலும் கலந்திருக்கலாம் எனக் கருதப்படுகிறது.

இந்த ஆய்வு முடிவுகள் அச்சத்தை ஏற்படுத்தியிருந்தாலும், தாய்மார்கள் தாய்ப்பால் கொடுப்பதை நிறுத்த வேண்டாம் என்று சுகாதாரத் துறை நிபுணர்கள் கேட்டுக்கொண்டுள்ளனர். இதுகுறித்து அவர்கள் கூறும்போது, ‘தாய்ப்பாலுக்கு மாற்றாகப் புட்டிப்பால் கொடுத்தாலும், அதனைத் தயாரிக்கப் பயன்படுத்தும் நிலத்தடி நீரிலும் யுரேனியம் இருக்க அதிக வாய்ப்புள்ளது;

அது தாய்ப்பாலை விடக் குழந்தைகளுக்கு அதிகத் தீங்கை விளைவிக்கும்’ என்று விளக்கமளித்துள்ளனர். தாய்ப்பாலில் உள்ள நோய் எதிர்ப்புச் சக்தியும் நன்மைகளும், அதில் கலந்துள்ள குறைந்த அளவு யுரேனியத்தின் அபாயத்தை விட மிக அதிகம் என்பதால், தொடர்ந்து தாய்ப்பால் ஊட்டுவதே குழந்தைகளுக்குப் பாதுகாப்பானது என்று மருத்துவர்கள் அறிவுறுத்தியுள்ளனர்.