தங்கம் விலை பவுன் ரூ.96,400க்கு விற்பனை: வெள்ளி விலை தொடர்ந்து ஜெட் வேகம்

சென்னை: தங்கம் விலை கடந்த மாதம் இறுதியில் இருந்து ஏற்றம், இறக்கத்துடன் காணப்பட்டு வருகிறது. அதே நேரத்தில் வெள்ளி விலை என்பது தாறுமாறாக அதிகரித்த வண்ணம் உள்ளது. இந்த நிலையில் கடந்த 9ம் தேதி தங்கம் விலை பவுனுக்கு ரூ.320 குறைந்து ஒரு பவுன் ரூ.96,000 விற்றது. அதே நேரத்தில் வெள்ளி விலை கிராமுக்கு ஒரு ரூபாய் உயர்ந்து ஒரு கிராம் வெள்ளி ரூ.199க்கும், கிலோவுக்கு ரூ.1,000 உயர்ந்து பார் வெள்ளி ரூ.1,99,000க்கும் விற்பனையானது.

தொடர்ந்து, நேற்று முன்தினம் தங்கம் விலை மீண்டும் உயர்ந்தது. நேற்று முன்தினம் தங்கம் விலை பவுனுக்கு ரூ.240 உயர்ந்து, ஒரு பவுன் ரூ.96,240க்கு விற்பனையானது. வெள்ளி விலையும் அதிரடியாக உயர்வை சந்தித்தது. அதாவது, வெள்ளி விலை கிராமுக்கு ரூ.8 உயர்ந்து, ஒரு கிராம் வெள்ளி ரூ.207க்கும், கிலோவுக்கு ரூ.8,000 உயர்ந்து பார் வெள்ளி 2,07,000க்கும் விற்கப்பட்டது.

இந்த நிலையில் நேற்றும் தங்கம் விலை அதிகரித்து காணப்பட்டது. நேற்றைய தினம் தங்கம் விலை கிராமுக்கு ரூ.20 உயர்ந்து ஒரு கிராம் ரூ.12,050க்கும், பவுனுக்கு ரூ.160 உயர்ந்து, ஒரு பவுன் ரூ.96,400க்கும் விற்றது. இதே போல நேற்று வெள்ளி விலையும் அதிகரித்தது. வெள்ளி விலை கிராமுக்கு ரூ.2 அதிகரித்து, ஒரு கிராம் ரூ.209க்கும், கிலோவுக்கு ரூ.2000 அதிகரித்து, பார்வெள்ளி ரூ.2 லட்சத்து 9 ஆயிரம் ரூபாய்க்கும் விற்றது.