கோபிசெட்டிபாளையம், பெருந்துறை, குன்னூர் தொகுதி திமுக நிர்வாகிகளுடன் முதல்வர் மு.க.ஸ்டாலின் சந்திப்பு: தேர்தல் வெற்றி வாய்ப்பு குறித்து அறிவுரை

சென்னை: கோபிசெட்டிபாளையம், பெருந்துறை, குன்னூர் சட்டமன்ற தொகுதி நிர்வாகிகளை முதல்வர் மு.க.ஸ்டாலின் நேற்று சந்தித்து பேசினார். அப்போது தேர்தல் வெற்றி வாய்ப்பு குறித்து பல்வேறு அறிவுரைகளை வழங்கினார். திமுக தலைவர் முதல்வர் மு.க.ஸ்டாலின், ‘உடன் பிறப்பே வா’ என்ற பெயரில் ‘ஒன் டூ ஒன்’ மூலம் தொகுதி வாரியாக நிர்வாகிகளை கடந்த 13ம் தேதி முதல் நேரில் சந்தித்து பேசி வருகிறார். ஒவ்வொரு நாளும் 3 சட்டமன்ற தொகுதிகளின் நிர்வாகிகளை தனித்தனியே அழைத்து பேசினார்.

இதுவரை 12 நாட்களில் 36 சட்டமன்ற தொகுதிகளை சேர்ந்த ஆயிரத்திற்கும் மேற்பட்ட பகுதி, வட்டம்-நகரம்- ஒன்றியம், பேரூர் கழக நிர்வாகிகளை சந்தித்து முதல்வர் மு.க.ஸ்டாலின் கலந்துரையாடியுள்ளார். கட்சி நிர்வாகிகளை சந்தித்து கலந்துரையாடி, அவர்களுக்கு உற்சாகமூட்டி, புத்தகங்கள் வழங்கி தொகுதி நிலவரங்கள் குறித்து கேட்டறிந்து வருகிறார். இந்நிலையில் முதல்வர் மு.க.ஸ்டாலின் சென்னை அண்ணா அறிவாலயத்தில் நேற்று கோபிசெட்டிபாளையம், பெருந்துறை, குன்னூர் ஆகிய 3 சட்டமன்ற தொகுதிகளின் நிர்வாகிகளை தனித்தனியே அழைத்து பேசினார்.

இதில் 3 தொகுதிகளை சேர்ந்த ஒன்றிய, நகர, பேரூர் செயலாளர்கள் மற்றும் ஈரோடு வடக்கு மாவட்ட செயலாளர் என்.நல்லசிவம், ஈரோடு மத்திய மாவட்ட செயலாளர் தோப்பு வெங்கடாசலம், நீலகிரி மாவட்ட செயலாளர் கே.எம்.ராஜூ, தேர்தல் பொறுப்பாளர் முன்னாள் அமைச்சர் வி.செந்தில் பாலாஜி ஆகியோர் கலந்து கொண்டனர். சந்திப்பின் போது சட்டப்பேரவை தொகுதி நிலவரம் வெற்றி நிலவரம், கட்சி வளர்ச்சி பணி, உறுப்பினர் சேர்க்கை உள்ளிட்ட விவரங்களை கேட்டறிந்தார்.

கட்சி நிர்வாகிகள் எவ்வாறு செயல்படுகிறார்கள் என்பது குறித்தும் கேட்டறிந்தார். திராவிட மாடல் அரசின் திட்டங்கள் குறித்து மக்கள் என்ன நினைக்கிறார்கள். இன்னும் மக்கள் என்ன எதிர்ப்பார்க்கிறார்கள். அரசின் திட்டங்கள் அனைத்தும் மக்களிடம் கொண்டு சேர்க்கப்படுகிறதா என்றும் கேட்டறிந்தார். கடந்த தேர்தலை விட வரும் சட்டசபை தேர்தலில் அதிக வாக்குகள் வித்தியாசத்தில் திமுக கூட்டணியை வெற்றி பெற வைக்க பாடுபட வேண்டும். 200க்கும் அதிகமான தொகுதிகளில் வெற்றி வாகை சூட உறுதி ஏற்க வேண்டும் உள்பட தேர்தலுக்கான பல்வேறு ஆலோசனைகளையும் முதல்வர் மு.க.ஸ்டாலின் வழங்கியதாக கூறப்படுகிறது.