டெல்டாவில் 2 நாளாக கொட்டி தீர்த்த மழை; 1.63 லட்சம் ஏக்கர் சம்பா பயிர்கள் மூழ்கின: 1 லட்சம் மீனவர்கள் முடக்கம்

திருச்சி: தொடர் மழை காரணமாக டெல்டா மாவட்டங்களில் 1.63 லட்சம் ஏக்கர் சம்பா நெற்பயிர்கள் மூழ்கி உள்ளது. 1,000 பேர் நிவாரண முகாம்களில் தஞ்சமடைந்துள்ளனர். டிட்வா புயல் காரணமாக டெல்டா மாவட்டங்களில் நேற்றுமுன்தினம் பகலில் துவங்கிய மழை இடைவிடாமல் பொழிந்து வருகிறது. நேற்று பகல், இரவு என நீடித்த மழை இன்று காலையிலும் தொடர்ந்து பெய்தது. இடைவிடாமல் மழை பொழிந்ததால் மக்களின் இயல்பு வாழ்க்கை பாதித்தது. நாகை, மயிலாடுதுறையில் இன்று கடல் சீற்றம் அதிகமாக இருந்தது.

காற்றும் பலமாக வீசியது. நாகை மாவட்டத்தில் 80,000 ஏக்கர், மயிலாடுதுறை மாவட்டத்தில் 20,000 ஏக்கர், திருவாரூர் மாவட்டத்தில் 50,000 ஏக்கர், தஞ்சை மாவட்டத்தில் 11,000 ஏக்கர் சம்பா, தாளடி பயிர்கள் மழை நீரில் மூழ்கி உள்ளது. இந்த பயிர்கள் தொடர்ந்து 2 நாட்களாக தண்ணீரில் மூழ்கி கிடப்பதால் விவசாயிகள் கவலையில் உள்ளனர். நாகூர் வள்ளியம்மை நகர், சிவசக்தி நகர், எம்ஜிஆர் நகர் ஆகிய குடியிருப்பு பகுதிகளில் வீடுகளுக்குள் மழைநீர் புகுந்ததால் பாதிக்கப்பட்ட 500க்கும் மேற்பட்டோரை அதிகாரிகள் மீட்டு பாதுகாப்பான இடத்தில் தங்க வைத்துள்ளனர்.

வேதாரண்யம் அகஸ்தியன்பள்ளியில் குடியிருப்புகளை மழைநீர் சூழ்ந்ததால் 60க்கும் மேற்பட்டோர் பல்நோக்கு சேவை கட்டிட நிவாரண முகாமில் தங்க வைக்கப்பட்டுள்ளனர். அகஸ்தியன்பள்ளி பகுதியில் உள்ள உப்பளங்கள் மழைநீர் தேங்கி கடல் போல் காட்சியளிக்கிறது. சேமித்து வைத்துள்ள உப்பு குவியல்கள் மழைநீரில் கரைந்து வருகிறது. நாகை கீச்சாங்குப்பம் கடற்கரையில் மின்கம்பம் சாய்ந்து விழுந்து விசைப்படகு சேதமடைந்தது.

நன்னிலம் தாலுகா கொல்லாபுரம் நிவாரண முகாமில் 14 பேர், முத்துப்பேட்டை தெற்குக்காடு, துறைக்காடு, இடும்பாவனம் நிவாரண முகாம்களில் 240 பேர், நீடாமங்கலத்தில் உள்ள முகாமில் 102 பேர் என மொத்தம் 342 பேர் தங்க வைக்கப்பட்டு அவர்களுக்கு தேவையான உணவுகள் வழங்கப்பட்டு வருகிறது. தஞ்சை மாவட்டத்தில் 11 வீடுகள் சேதமடைந்துள்ளது. 8 கால்நடைகள் உயிரிழந்தது. புதுக்கோட்டை மாவட்ட விளையாட்டு மைதானம் அருகே நேற்றிரவு ஒரு மரம் முறிந்து விழுந்தது.

கரூர், பெரம்பலூர், அரியலூர் மாவட்டங்களில் லேசான மழையே பெய்து வருவதால் பாதிப்புகள் எதுவும் ஏற்படவில்லை. திருச்சி மாவட்டத்தில் தொடர்ந்து 3வது நாளாக மழை பெய்து வருவதால் தாழ்வான பகுதிகளில் மழைநீர் தேங்கி நிற்கிறது. டிட்வா புயல் புயல் எச்சரிக்கை காரணமாக நாகை, காரைக்கால் துறைமுகத்தில் இன்று 2வது நாளாக 5ம் எண் புயல் எச்சரிக்கை கூண்டு ஏற்றப்பட்டுள்ளது. நாகை மாவட்டத்தில் 70,000 மீனவர்கள் கடலுக்கு மீன்பிடிக்க செல்லவில்லை.

இதனால் துறைமுகத்தில் 580 விசைப்படகுகள், 3,200 பைபர் படகுகள் நிறுத்தி வைக்கப்பட்டுள்ளன. மயிலாடுதுறை மாவட்டத்தில் 10,000 மீனவர்கள், தஞ்சை மாவட்டத்தில் 10,000 மீனவர்கள், புதுக்கோட்டை மாவட்டத்தில் 3,000 மீனவர்கள் மீன் பிடிக்க கடலுக்கு செல்லவில்லை.

* விழுப்புரம்

விழுப்புரம் மாவட்டம் திருவெண்ணெய்நல்லூர் அருகே உள்ள கண்ணாரம்பட்டு கிராமத்துக்கு செல்லும் வழியில் (சாராயம்மேடு- கண்ணாரம்பட்டு இடையே) மலட்டாறு செல்கிறது. இந்நிலையில் டிட்வா புயல் காரணமாக நேற்று காலை முதல் திருவெண்ணெய்நல்லூர் பகுதியில் மழை பெய்தது. தொடர் மழையால் ஆற்றில் வெள்ளப்பெருக்கு ஏற்பட்டு கண்ணாரம்பட்டு தரைப்பாலம் முற்றிலுமாக மீண்டும் வெள்ளநீரில் அடித்துச் செல்லப்பட்டது.

* தூத்துக்குடி

தூத்துக்குடி மாவட்டம் மற்றும் மாநகர பகுதிகளில் கடந்த 2 நாட்களாக விடாமல் மழை பெய்து வருகிறது. இந்நிலையில் கடல் பகுதியிலும் கனமழை பெய்யும் எனவும், கடல் பகுதியில் சுமார் 70 கிமீ வேகத்தில் காற்று மற்றும் அவ்வப்போது சூறாவளி காற்று வீசக்கூடும் எனவும் வானிலை மையம் எச்சரிக்கை விடுத்துள்ளது. இதனைத்தொடர்ந்து தூத்துக்குடி மாவட்ட நிர்வாகம் சார்பில், மறுஅறிவிப்பு வரும் வரை மீனவர்கள் கடலுக்கு மீன் பிடிக்கச் செல்ல வேண்டாம் என அறிவுறுத்தப்பட்டு உள்ளனர். இன்று 7வது நாளாக மீனவர்கள் கடலுக்கு மீன் பிடிக்க செல்லவில்லை. இதனால் 1 லட்சத்திற்கும் மேற்பட்ட மீனவர்களின் வாழ்வாதாரம் பாதிக்கப்பட்டுள்ளது.

* ராமேஸ்வரம்

டிட்வா புயலால் ராமேஸ்வரத்தில் பெய்துவந்த தொடர் மழை இன்று காலை ஓய்ந்தது. இதையடுத்து, தனுஷ்கோடி செல்ல சுற்றுலாப் பயணிகள் அனுமதிக்கப்பட்டனர். மீன்பிடி தடை உத்தரவு தொடர்வதால் மீனவர்கள் கடலுக்கு செல்லவில்லை.

* கொடைக்கானல்

திண்டுக்கல் மாவட்டத்தில் உள்ள கொடைக்கானல் பிரசித்தி பெற்ற சுற்றுலா தலமாக திகழ்கிறது. டிட்வா புயல் காரணமாக கொடைக்கானலில் தொடர்ந்து மழை பெய்து வருகிறது. கடும் குளிர் நிலவுகிறது. இதனால், வனத்துறை கட்டுப்பாட்டில் உள்ள மோயர் பாயிண்ட், பைன் மரக்காடுகள், குணா குகை, தூண்பாறை உள்ளிட்ட அனைத்து சுற்றுலா இடங்களும், பேரிஜம் ஏரி வனப்பகுதியும் நேற்று மூடப்பட்டது. தடை உத்தரவு 2வது நாளாக இன்றும் தொடர்வதால் விடுமுறையை கழிக்க வந்த சுற்றுலா பயணிகள் பெரும் ஏமாற்றம் அடைந்தனர்.

* இளம்பெண் பலி

தஞ்சை மாவட்டம், கும்பகோணம் அடுத்த வாளபுரம் ஆலமன்குறிச்சி உடையார் தெருவை சேர்ந்தவர் முத்துவேல்(56). இவரது மனைவி கீதா(45), மகள்கள் கனிமொழி(21), ரேணுகா(20). இவர்கள் நேற்றிரவு வீட்டில் தூங்கி கொண்டிருந்தனர். இந்த பகுதியில் கடந்த 3 நாட்களாக பெய்த மழையால் முத்துவேல் வீட்டின் ஒரு பக்க சுவர் இடிந்து விழுந்தது.

இதில் கீதா, கனிமொழி, ரேணுகா ஆகியோர் இடிபாடுகளில் சிக்கி படுகாயமடைந்தனர். இதையடுத்து 3 பேரையும் மீட்டு சிகிச்சைக்காக கும்பகோணம் அரசு மருத்துவமனையில் சேர்த்தனர். அங்கிருந்து மேல்சிகிச்சைக்காக ரேணுகா, கீதா ஆகியோர் தஞ்சை அரசு மருத்துவக்கல்லூரி மருத்துவமனைக்கு அனுப்பி வைக்கப்பட்டனர். அங்கு சிகிச்சை பலனின்றி ரேணுகா இறந்தார்.