டிட்வா புயலால் கடல் சீற்றம்: மெரினா, பெசன்ட்நகர் கடற்கரைக்கு பொதுமக்கள் செல்ல தடை
சென்னை: டிட்வா புயலின் காரணமாக தமிழ்நாடு கடலோர பகுதிகள் கடல் கொந்தளிப்புடன் காணப்படுகிறது. குறிப்பாக சென்னை மெரினா மற்றும் பெசன்ட் நகர் கடற்கரைகளில் அலைகள் இயல்பை விட மிக அதிக உயரத்தில் எழுந்து கரையை நோக்கி மோதுகின்றன. பலத்த காற்றுடன் சேர்ந்து வரும் அலைகளால் கடற்கரைக்கு அருகிலும், நடைபாதை பகுதிகளிலும் நீர் ஊடுருவும் நிலை உருவாகியுள்ளது.
பொதுமக்களின் பாதுகாப்பை கருத்தில்கொண்டு, மெரினா கடற்கரைக்கு பொதுமக்கள் செல்லக்கூடாதபடி காவல்துறை தடுப்புகள் அமைத்துள்ளது. முக்கிய நுழைவாயில்களின் அருகே காவல் துறையினர் தொடர்ந்து கண்காணிப்பு பணியில் ஈடுபட்டு வருகின்றனர். அவசரநிலைக்கு தேவையான மீட்பு உபகரணங்களும், ரோந்து வாகனங்களும் தயார் நிலையில் நிறுத்தப்பட்டுள்ளன.
மேலும், மீனவர்கள் கடலுக்குச் செல்ல வேண்டாம் என்று முன்பே அரசு அறிவுறுத்தியிருந்த நிலையில், தற்போது ஏற்பட்டுள்ள கடல் சீற்றம் காரணமாக மீனவர்கள் தங்களது படகுகளை கரையில் நிறுத்திவைத்துள்ளனர். கடற்கரைப் பகுதிகளில் வசிக்கும் மக்களும் எச்சரிக்கையுடன் இருக்குமாறு அதிகாரிகள் அறிவுறுத்தி வருகின்றனர்.
டிட்வா புயல் சென்னைக்கு அருகில் வரும் வேளையில் அடுத்த சில மணி நேரங்களுக்கு கடல் தொடர்ந்து சீற்றத்துடன் காணப்படும் என வானிலை ஆய்வு மையம் எச்சரிக்கை விடுத்துள்ளது. அதனால் மக்கள் தேவையற்ற பயணங்களை தவிர்த்து, அதிகாரிகளின் அறிவுறுத்தல்களை கடைப்பிடிக்குமாறு கேட்டுக் கொள்ளப்படுகிறது.
