சமையலுக்கும் வந்தாச்சு AI தொழில் நுட்பம்... AI இனி 100% சமையலையும் பார்த்துக்கொள்ளும்...!

ஏனுங்க... நான் சமையல் செய்றேன்... கொஞ்சம் காய்கறி மட்டும் நறுக்கி கொடுத்துருங்களேன்... ப்ளீஸ்...’’ என்கிற பேச்சுக்கே இனி இடமில்லை. வேலைக்கு செல்லும் கணவன்-மனைவி Each 50% சமையல் என்கிற சொல்லுக்கும் இனி இடமில்லை. 100% சமையலையும் இனி AI பார்த்துக்கொள்ளும் என்றால் உங்களால் நம்ப முடிகிறதா..? நம்பித்தான் ஆக வேண்டும்...!

அரைப்பது, அவிப்பது, வதக்குறது, வறுப்பது....ன்னு எல்லா வசதியும் கொண்ட ஆல் இன் ஒன் AI ராஜாவாக களம் இறங்கி இருப்பதுதான் ஸ்மார்ட் குக்கிங் அசிஸ்டன்ட், ‘Upliance.AI.’ என்னும் தொழில்நுட்பம். இவன் எக்கச்சக்கமான வித்தைகளை வெச்சுருக்கான்... இதோ அது... ‘சாப்பிட தெரியும், சமைக்க தெரியாது. மூக்கு பிடிக்க வெட்ட தெரியும், முழுசா வெந்து இருக்கான்னுகூட பார்க்க தெரியாது..’ அப்படின்னு சொல்ற பேச்சுலர் பட்டாளத்திற்கு என்றே சமைப்பதை எளிதாக்க வேண்டும் என்ற நோக்கத்துடனே உருவாக்கப்பட்டதுதான் இந்த AI தொழில்நுட்ப இயந்திரம். இந்தியாவை சேர்ந்த மகேக் மோடி மற்றும் மோகித் ஷர்மா ஆகியோரால் 2021-ல் இந்த இயந்திரம் அறிமுகப்படுத்தப்பட்டது. உப்புக்கும், சர்க்கரைக்கும்கூட வித்தியாசம் தெரியாத டாட் லிட்டில் பிரின்சஸ்களுக்கு தேவையான அளவு உப்பு போடுன்னா எப்படிங்க புரியும்?

என்ன போட வேண்டும், எவ்வளவு போட வேண்டும் என்று துல்லியமாக, செயல்முறையோடு கிளிப்பிள்ளைக்கு கூறுவது போல் கூறுகிறது இந்த AI இயந்திரம். ஒரு டச்... பண்ணா போதும். அதுவே எல்லாவற்றையும் பார்த்துக்கொள்ளும். இதில், தீயே எரியாது.. ஆனாலும் விர்ச்சுவல் ஃப்லேம்ஸ் (virtual flames) என்ற அமைப்பை கொடுத்திருக்கிறார்கள். அதாவது, நீல நிறத்தில் லைட் எரிந்தால், வெந்து கொண்டிருக்கின்றது என்று அர்த்தம். பிங்க் நிறம் என்றால் நறுக்கிக்கொண்டிருக்கின்றது என்று அர்த்தம். பச்சை நிறம் என்றால் சமையல் ரெடி..! என்றும் அர்த்தம். இந்த பாத்திரத்தை மூடுவதற்கு கண்ணாடி மூடியும் (glass lid) கொடுத்திருக்கிறார்கள். இதன் வழியே உள்ளே என்ன நடக்கிறது என்பதை பார்க்கலாம். பார்க்காவிட்டாலுமே அது தன் வேலையை சுத்தமாக செய்து முடித்துவிடும். ரீல்ஸ்...

பார்த்திட்டு இருந்ததுனால குக்கரில் எத்தனை விசில் வந்ததுன்னே தெரியலை...ன்னு இனிமே புலம்ப வேண்டாம். இந்த இயந்திரத்தின் டிஸ்ப்ளே ஸ்கிரீனில் ஒரு QR கோடு இருக்கிறது. அதை ஸ்கேன் செய்து உங்களது மொபைலை அந்த இயந்திரத்தோடு லிங்க் செய்தாலே போதும். மொபைலையே ரிமோட் ஆகவும் பயன்படுத்தி, கிட்டத்தட்ட இதில் சமைப்பது ஒரு வீடியோ கேம் விளையாடுவது போன்ற ஃபீலை ஏற்படுத்துகிறது. அதுமட்டுமல்லாமல், நாம் செய்யக்கூடிய ரெசிபியை செலக்ட் செய்த பிறகு அதுவே அந்த ரெசிபிக்கு தேவையான பொருட்களை இந்த அளவில் போட வேண்டும் என்று சொல்லும். அது சொன்னபடியே எல்லாவற்றையும் போட்டு மூடிவிட்டு நாம் நமது வேலையை பார்க்கலாம். சத்தமே இல்லாமல் கப்-சிப் என்று வேலையை முடித்துவிடும். அப்புறம்.... உங்களுக்கு ‘மட்டன் சுக்கா ரெடி!’ என்று மொபைலிலேயே நோட்டிஃபிகேஷன் அனுப்பிவிடுகிறது.

இது என்ன பிரம்மாதம்..? இன்னொரு ஸ்பெஷல் ஐட்டம் ஒன்னு இருக்கே..! குறைந்த எண்ணெய், அதிக புரதம், குழந்தைகளுக்குக்கான சமையல் என்று ஆளுக்கேத்தபடி.., அசத்தலான சமையலையும் இந்த இயந்திரம் செய்து கொடுக்கிறது. நாம் சமைக்கும் உணவில் புரதம், கொழுப்பு, மாவுச்சத்து போன்றவற்றின் அளவையும் துல்லியமாக புட்டு புட்டு வைப்பதனால் டயட், கேலரி டெஃபிசிட் போன்றவற்றில் இருப்பவர்கள் இதைப்பற்றி கவலைப்பட வேண்டாம். அது சரி... சமைக்கிறதைவிட பாத்திரம் கழுவுறதுதானே பெரிய வேலை..., இதை எப்படி கழுவுவது என்று யோசிக்கிறீங்களா? அதுக்கும் இருக்கு ஆட்டோ கிளீனிங் அமைப்பு. எவ்வளவு தண்ணீர், டிஷ்வாஷ் லிக்விட் ஊற்ற வேண்டும் என்ற அளவையும் அதுவே சொல்லிவிடும். அதன்படி ஊற்றிவிட்டு மூடி விட்டாலே போதும், தானாகவே சுத்தம் செய்து தந்துவிடும்.

2021-ல் முதன்முதலாக அப்ளையன்ஸ் 1.0 அறிமுகப்படுத்தப்பட்டு பயங்கரமாக ட்ரெண்டாகி வெற்றியும் பெற்றுவிட்டது. அதைத்தொடர்ந்து செப்டம்பர், 2025-ல் அப்ளையன்ஸ் 2.0 வெர்ஷனும் கொண்டுவரப்பட்டுள்ளது. அப்ளையன்ஸ் 1.0-வை விட அப்ளையன்ஸ் 2.0 அதிவேகத்தில் வேலை செய்கிறது. இந்த இயந்திரத்தின் தோராய விலை ரூ.30 ஆயிரத்தில் இருந்து ரூ.40 ஆயிரம். தென்னிந்திய உணவு வகைகள் இதில் கொஞ்சம் குறைவாகவே பதிவு செய்யப்பட்டிருக்கிறது என்று ஆரம்பத்தில் பலரும் கூறியதால், தற்போது தென்னிந்திய உணவு வகைகளின் பட்டியலை சற்று விரிவுபடுத்தி இருக்கிறார்கள். மொத்த சமையலுமே சோம்பேறியாக மாறுவதால், உடல் உழைப்பே இல்லாமல் போகிறது என்றும், கையால் சமைப்பதுபோன்ற ருசி இதில் இல்லை என்றும் சிலர் கூறுகிறார்கள்...!