வர்த்தக காஸ் சிலிண்டர் விலை ₹51 குறைப்பு: சென்னையில் ₹1,738க்கு விற்பனை

சேலம்: நாடு முழுவதும் 19 கிலோ வர்த்தக சிலிண்டர் விலை ₹51 குறைக்கப்பட்டுள்ளது. சென்னையில் ₹1,738, சேலத்தில் ₹1,687 என விலை நிர்ணயிக்கப்பட்டுள்ளது. இந்திய எண்ணெய் நிறுவனங்களின் கூட்டமைப்பு, நாடு முழுவதும் பெட்ரோல், டீசல், காஸ் சிலிண்டர் விலையை நிர்ணயம் செய்கிறது. இதில், காஸ் சிலிண்டர் விலை மாதந்தோறும் 1ம் தேதி மாற்றியமைக்கப்படுகிறது.

இதன்படி, செப்டம்பர் மாதத்திற்கான புதிய விலை பட்டியலை நேற்று காலை எண்ணெய் நிறுவனங்களின் கூட்டமைப்பு வெளியிட்டது. அதன்படி தொடர்ந்து 5வது மாதமாக, வீட்டு உபயோக காஸ் சிலிண்டர் விலையில் மாற்றம் செய்யப்படவில்லை. கடந்த மாத விலையிலேயே, அதாவது டெல்லியில் ரூ.853, மும்பையில் ரூ.852.50, கொல்கத்தாவில் ரூ.879, சென்னையில் ரூ.868.50, சேலத்தில் ரூ.886.50 என நீடிக்கிறது.

அதேசமயம், 19 கிலோ எடை கொண்ட வர்த்தக காஸ் சிலிண்டர் விலை ரூ.51 குறைக்கப்பட்டுள்ளது. கடந்த மாதம் வர்த்தக காஸ் சிலிண்டரின் விலை சென்னையில் ரூ.1,789 ஆக இருந்த நிலையில், ரூ.51 குறைந்து ரூ.1,738 ஆக நிர்ணயிக்கப்பட்டுள்ளது. சேலத்தில் ரூ.1,738ல் இருந்து ரூ.51 குறைந்து ரூ.1,687 ஆக நிர்ணயிக்கப்பட்டுள்ளது. டெல்லியில் ரூ.1,580.50, மும்பையில் ரூ.1,531.50, கொல்கத்தாவில் ரூ.1,683க்கு விற்கப்படுகிறது.