நகை பிரியர்களுக்கு குட்நியூஸ்; 2-வது நாளாக சரிவைக் கண்ட தங்கம் விலை

சென்னை: சென்னையில் ஆபரணத் தங்கம் சவரனுக்கு ரூ.320 குறைந்து ஒரு சவரன் ரூ.91,680க்கு விற்பனை செய்யப்படுகிறது. தங்கம் விலை இந்த மாதம் தொடக்கத்தில் இருந்து ஏற்றம், இறக்கத்துடன் இருந்து வருகிறது. கடந்த 4 நாட்களாக தங்கம் விலை குறைந்து வந்தது. கடந்த 18ம் தேதி கிராமுக்கு ரூ.140 குறைந்து ஒரு கிராம் ரூ.11,400க்கும், பவுனுக்கு 1,120 குறைந்து ஒரு பவுன் ரூ.91,200க்கும் விற்றது. இதன் மூலம் தங்கம் விலை தொடர்ந்து 4 நாட்களில் பவுனுக்கு ரூ.4,000 வரை குறைந்தது. தங்கம் விலை மேலும் குறையும் என்று எதிர்பார்த்த நிலையில் நேற்று முன்தினம் மீண்டும் தங்கம் விலை உயர்ந்தது. நேற்று முன்தினம் காலை, மாலை என தங்கம் விலை பவுனுக்கு ரூ.1600 உயர்ந்து ஒரு பவுன் ரூ.92800க்கு விற்பனையானது.

நேற்று மீண்டும் தங்கம் விலை குறைந்தது. அதாவது, நேற்று தங்கம் விலை கிராமுக்கு ரூ.100 குறைந்து, ஒரு கிராம் ரூ.11,500க்கும், பவுனுக்கு ரூ.800 குறைந்து, ஒரு பவுன் ரூ.92 ஆயிரத்துக்கும் விற்பனையானது. அதே போல வெள்ளி விலையும் நேற்று குறைந்தது. வெள்ளி விலை கிராமுக்கு ரூ.3 குறைந்து ஒரு கிராம் ரூ.173க்கும், கிலோவுக்கு ரூ.3 ஆயிரமும் குறைந்து, பார் வெள்ளி ரூ.1 லட்சத்து 73 ஆயிரத்துக்கும் விற்பனையானது. இந்நிலையில் இன்றும் சவரனுக்கு ரூ.320 குறைந்தது. சவரன் ரூ.91,680க்கும் கிராம் ரூ.11,460க்கு விற்பனை செய்யப்படுகிறது. சென்னையில் சில்லறை வர்த்தகத்தில் வெள்ளி விலை கிராமுக்கு ரூ.4 குறைந்து ஒரு கிராம் ரூ.169க்கு விற்பனை செய்யப்படுகிறது.