சென்னையின் புதிய பொழுதுபோக்கும் இடமாக சோழிங்கநல்லூர் தாங்கல் ஏரியை அழகுபடுத்த ரூ.4 ேகாடி ஒதுக்கீடு: மாநகராட்சி டெண்டர் வெளியீடு

சென்னை: சென்னை சோழிங்கநல்லூர் தாங்கல் ஏரியை இனி பொதுமக்களுக்கான அழகிய பொழுதுபோக்கு இடமாக மாற்றும் நடவடிக்கையை சென்னை மாநகராட்சி தொடங்கியுள்ளது. இதற்காக ரூ.4கோடி ஒதுக்கப்பட்டு டெண்டரை வெளியிட்டுள்ளது. சென்னை நகரமே, நீர் நிலைகளை கபளீகரம் செய்து தான் பல பிரமாண்ட கட்டுமானங்களை தன்னுள் வைத்திருக்கிறது. சென்னை புறநகரைப் பற்றி சொல்லவே வேண்டியதில்லை. நீர்நிலைகள் ஆக்கிரமித்து கட்டப்பட்ட கட்டிடங்களால் இன்று கனமழை பெய்தாலே பெரும்பாக்கம், சிட்லபாக்கம், சோழிங்கநல்லூர் உள்ளிட்ட பகுதிகள் மூழ்கிவிடும் அளவுக்கு நிலைமை கட்டுங்கடங்காமல் சென்று விட்டது. இங்கே ஏரிகளாக இருந்தவைகள் பெரும்பாலும் ஆக்கிரமிக்கப்பட்டுவிட்டன.

எஞ்சிய ஏரிக்கும் கூட வரக் கூடிய மழைநீர் கால்வாய்களையும் மரணித்துப் போகச் செய்துவிட்டு மூழ்குதே.. மூழ்குதே என கூப்பாடு போட்டுக் கொண்டிருக்கிறோம். 1906ம் ஆண்டு சென்னையில் இருந்த ஏரி, குளங்களின் எண்ணிக்கை 400க்கும் அதிகமானவை. இப்போது இதில் 50 கூட இல்லை என்பதே உண்மை. இவை ஒருபுறம் இருந்தாலும் தற்போது இருக்கின்ற ஏரிகள் உள்ளிட்ட நீர்நிலைகளை பாதுகாப்பதே ஆக சிறந்தாக இருக்கும் என்பது சமூக ஆர்வலர்களின் எதிர்பார்ப்பாக இருக்கிறது. அதன் அடிப்படையில், நீர்நிலைகளை தூர்வாரி கரைகளை பலப்படுத்தினால் ஆக்கிரமிப்புகள் குறைவதோடு, தண்ணீரையும் சேமிக்க முடியும், என்ற குரல் ஓங்கி ஒலிக்கத் தொடங்கியுள்ளது.

இந்நிலையில், சென்னை ஏரிகளை தூர்வாரி பொழுதுபோக்கு இடங்களாக மாற்றும் திட்டத்தை தமிழக அரசு கையிலெடுத்துள்ளது. அதன் அடிப்படையில், பல்வேறு திட்டங்களின் கீழ் ஏரிகள் உள்ளிட்ட நீர்நிலைகள் புதுப்பிக்கப்பட்டு வருகின்றன. இவற்றில், சோழிங்கநல்லூர் தாங்கல் ஏரி, வில்லிவாக்கம் ஏரி, கொரட்டூர், ரெட்டேரி, பெருங்குடி, போரூர் போன்ற ஏரிகள் மறுசீரமைக்கப்பட்டு, பசுமையான நடைபாதைகள், பொழுதுபோக்கு பூங்காக்கள் மற்றும் நீர்நிலைகளை ஒட்டிய அழகிய இடங்களாக உருவாக்கப்பட்டு வருகின்றன. இந்த திட்டங்கள், நகரின் இயற்கையை மேம்படுத்துவதுடன், குடிமக்களுக்கு பொழுதுபோக்கிற்கான புதிய இடங்களையும் உருவாக்குவதாக உள்ளதால் மிகுந்த வரவேற்பை பெற்றுள்ளது.

அந்த வகையில், சென்னை சோழிங்கநல்லூர் தாங்கல் ஏரியை தமிழக அரசு மறு சீரமைப்பு செய்ய திட்டமிட்டுள்ளது குறிப்பிடத்தக்கது. 24 ஏக்கர் பரப்பளவு கொண்ட நீர்வளத் துறைக்கு சொந்தமான இந்த ஏரியை சுற்றி பல இடங்கள் ஆக்கிரமிப்பு செய்யப்பட்டு உள்ளதாக பொதுக்களிடமிருந்து ஏராளமான புகார்கள் வந்துள்ளன. ஏரிக்கரையோரம் வீடு, கடைகள் மற்றும் குடோன்கள் கட்டி உள்ளனர். இதனை சிலர் வாடகைக்கும் விட்டு பணம் வசூலித்து வருவதாகவும் குற்றச்சாட்டு எழுந்தது.

ஆக்கிரமிப்பு காரணமாக ஏரியின் பரப்பளவு சுருங்கும் நிலை ஏற்பட்டது. மேலும், ஏரிக்கு வரும் தண்ணீர் பாதையும் ஆக்கிரமிப்புகளால் அடைக்கப்பட்டு உள்ளன. இதனால் மழை பெய்யும்போது ஏரிக்கு தண்ணீர் வராமல் ஆங்காங்கே தடைபட்டு அப்பகுதி மக்கள் கடும் அவதிக்குள்ளாகி வந்தனர். எனவே தாங்கல் ஏரி ஆக்கிரமிப்பை அகற்றி உரிய நடவடிக்கை எடுக்க வேண்டும் என்று சமூக ஆர்வலர்கள், பொதுமக்கள் கோரிக்கை விடுத்து வந்தனர். இந்த சூழ்நிலையில் தான், ஆக்கிரமிப்பின் பிடியில் சிக்கிக் கிடந்த இந்த ஏரியை, இனி பொதுமக்களுக்கான அழகிய பொழுதுபோக்கு இடமாக மாற்றுவதற்கான பணிகளை தமிழக அரசு தொடங்கியுள்ளது.

சென்னை மாநகராட்சியில் உள்ள நீர்நிலைகளை சீரமைத்து பருவமழை காலங்களில் நீரை சேமிக்கும் இடமாகவும், வெள்ளநீரை தடுக்கும் கவசமாகவும், பறவைகளின் விருப்பமான இடமாகவும் மாற்ற பல்வேறு நடவடிக்கைகள் முடுக்கி விடப்பட்டுள்ளன. அந்த வகையில் சோழிங்கநல்லூரில் உள்ள தாங்கல் ஏரியில் நடந்து வரும் பணிகள் பெரிதும் கவனம் பெற்றிருக்கின்றன. இது அப்பகுதியில் உள்ள மிகப்பெரிய ஏரியாகும். வயதானவர்கள் தினசரி வருகை புரிந்து நடைபயிற்சி மேற்கொண்டு வருகின்றனர். மாடல் ஸ்கூல் ரோட்டில் சிறுவர்கள் சைக்கிளிங் செய்கின்றனர். ஆனால் வாகனங்கள் ஆக்கிரமிக்கப்பட்டு பாதையை அடைத்து கொள்கின்றன. இவற்றை அகற்றுவதற்கு நடவடிக்கைகள் எடுக்கப்பட்டு வருகின்றன.

இந்த ஏரிக்கரையை பலப்படுத்தும் பணிகள் உள்ளிட்ட பல்வேறு பணிகளை செய்ய கோவையைச் சேர்ந்த ‘சிறுதுளி’ என்ற தன்னார்வ அமைப்பு, இன்போசிஸ் உதவியுடன் முன் வந்தது. இதற்காக, ரூ.2.50 கோடியை அந்நிறுவனம் சி.எஸ்.ஆர் நிதியில் இருந்து ஒதுக்கியது. அதன் அடிப்படையில், தாங்கல் ஏரி தரை மட்டத்திலிருந்து 5 அடி ஆழத்தில், 10 கோடி லிட்டர் தண்ணீர் சேமிக்கும் கொள்ளளவில் இருந்தது. தற்போது மேற்கொள்ளப்பட்ட சீரமைப்பு பணிகள் மூலம், கூடுதலாக 10 அடி ஆழம் துார்வாரப்பட்டு, 2 லட்சம்கன அடி மண் அகற்றப்பட்டுள்ளது. இதில், மேற்பரப்பில் இருந்த களிமண்கள் அகற்றப்பட்டு, 5 அடி ஆழத்துக்கு கீழ் இருந்த ஓடை மண்களும் நீக்கப்பட்டுள்ளது. இதன் மூலம், மொத்தம் 30 கோடி லிட்டர் தண்ணீர் சேமிக்கும் அளவுக்கு ஏரி ஆழப்படுத்தப்பட்டுள்ளது. இந்த பணிகள் முடிவடைந்த நிலையில், சென்னை மாநகராட்சி இந்த இடத்தை பொதுமக்களின் பயன்பாட்டிற்காக மேம்படுத்துவதற்கான நடவடிக்கைகளை தொடங்கியுள்ளது. இந்த திட்டத்திற்காக சென்னை மாநகராட்சி ரூ.4 கோடி ஒதுக்கியுள்ளது.

இந்த ஏரியை ஒரு அழகான இடமாக மாற்றும் பணிக்கான டெண்டரை சென்னை மாநகராட்சி தற்போது வெளியிட்டுள்ளது அப்பகுதி மக்களை மகிழ்ச்சியில் ஆழ்த்தியுள்ளது. இப்பணிகள் முடிவடையும் பட்சத்தில், சென்னையில் ஒரு அழகான புதிய பொழுது போக்கு இடமாக மாறும் என்றும் ஓய்வு நேரங்களில் பொதுமக்கள் நேரம் செலவிட சிறப்பான சூழலை தாங்கல் ஏரி அமைத்து தரும் என்பது வரவேற்புக்குரிய ஒன்றாக உள்ளது. இதுகுறித்து சென்னை மாநகராட்சி அதிகாரிகள் கூறியதாவது: ‘சோழிங்கநல்லூர் தாங்கல் ஏரியை அழகிய பொழுபோக்கு இடமாக மாற்றும் பணிகள் நடைபெற்று வருகின்றன’. இந்த திட்டத்தின் கீழ், ராஜிவ் காந்தி சாலையில் உள்ள தாங்கல் ஏரி நுழைவாயிலில் சுற்றுச்சுவர், நடைபாதை, வாகன நிறுத்துமிடம், பசுமை அலங்காரங்கள் மற்றும் நீரூற்று ஆகியவை கட்டப்பட உள்ளன.

மேலும், நகரின் பல பூங்காக்களில் இருப்பது போல, இங்கு ஒரு படிக்கும் பகுதியும் அமைக்க திட்டமிடப்பட்டுள்ளது. இங்கு புத்தகங்கள் மற்றும் பத்திரிகைகள் பொதுமக்களுக்கு கிடைக்கும். மழைக்காலம் முடிந்த பிறகு, ஜனவரி மாதம் கட்டுமானப் பணிகள் தொடங்கும். 6 மாதங்களுக்குள் பணிகள் நிறைவடையும் என எதிர்பார்க்கப்படுகிறது. இந்த திட்டம் அப்பகுதி மக்கள் மத்தியில் மிகுந்த வரவேற்பை பெற்றுள்ளது. மேலும், ஏரிக்கு அருகில் நடக்கும் சட்டவிரோத செயல்களை தடுப்பதும் இந்த திட்டத்தின் முக்கிய நோக்கங்களில் ஒன்றாகும்.

குறிப்பாக முதியவர்களுக்கு காலை மற்றும் மாலை நேர நடைப்பயிற்சிக்கு மிகவும் உதவியாக இருக்கும். இந்த திட்டத்தின் மூலம், சோழிங்கநல்லூர் தாங்கல் ஏரி ஒரு அழகான மற்றும் பாதுகாப்பான பொது இடமாக மாறும். இது அப்பகுதி மக்களுக்கு ஒரு சிறந்த பொழுதுபோக்கு மற்றும் ஓய்வெடுக்கும் இடமாக அமையும். இந்த ஏரியை சுற்றி அமைக்கப்படும் வசதிகள், குறிப்பாக படிக்கும் பகுதி, அறிவுசார் வளர்ச்சிக்கும் உதவும். மேலும், இது ஒரு சமூக சந்திப்பு இடமாகவும் செயல்படும். இவ்வாறு அவர்கள் கூறினர்.