விபசாரத்துக்கு மறுத்த காதலி குத்திக்கொலை: கொடூர காதலனுக்கு வலை

திருமலை: கணவரை பிரிந்து காதலனுடன் வாழ்ந்த இளம்பெண் விபசாரத்திற்கு மறுத்ததால் கத்தியால் குத்தி கொலை செய்யப்பட்டார். இந்த கொடூர செயலில் ஈடுபட்ட அவரது காதலனை போலீசார் தேடி வருகின்றனர்.

ஆந்திர மாநிலம் கோணசீமா மாவட்டம் மெரகபாலம் கிராமத்தைச் சேர்ந்தவர் புஷ்பா (22). இவருக்கும் நெருங்கிய உறவினர் ஒருவருக்கும் கடந்த 4 ஆண்டுகளுக்கு முன்பு திருமணம் நடந்துள்ளது. ஆனால் திருமணமான சில மாதங்களிலேயே இருவருக்கும் கருத்து வேறுபாடு ஏற்பட்டதால் பிரிந்தனர். அதன்பிறகு புஷ்பா, விஜயவாடாவிற்கு சென்றுவிட்டார்.

அப்போது அங்கு கார் ஏசி மெக்கானிக்காக பணிபுரியும் ஷேக் ஷாம்(22) என்பவருடன் பழக்கம் ஏற்பட்டு காதலாக மாறியுள்ளது. அடிக்கடி சந்தித்து வந்த நிலையில் சித்தார்த்த நகரில் உள்ள பி.சவரம் கிராமத்தில் ஒரு வீட்டை வாடகைக்கு எடுத்து இருவரும் கணவன், மனைவி போல் குடும்பம் நடத்தி வந்தனர். சில நாட்களில் ஷாம் மதுபோதைக்கு அடிமையாகியுள்ளார். இதனால் பணத்தேவை அதிகமானது. அடிக்கடி பணம் கேட்டு புஷ்பாவை துன்புறுத்தியுள்ளார்.

நேற்றுமுன்தினம் இரவு 9 மணியளவில், ஷேக் ஷாம் வழக்கம்போல் குடிபோதையில் வீட்டிற்கு வந்தார். அவசரமாக பணம் தேவைப்படுவதாகவும், புஷ்பாவை விபச்சாரத்தில் ஈடுபடுமாறும் கூறியுள்ளார். இதைக்கேட்டு அதிர்ச்சி அடைந்த புஷ்பா மறுத்துள்ளார். இதனால் ஷாம் தான் மறைத்து வைத்திருந்த கத்தியால், புஷ்பாவை சரமாரியாக குத்தினார். இதில் புஷ்பா ரத்த வெள்ளத்தில் மயங்கி விழுந்து சம்பவ இடத்திலேயே பரிதாபமாக இறந்தார். இதனால் ஷாம் அங்கிருந்து தப்பி ஓடிவிட்டார்.

இதுகுறித்து நேற்று தகவல் கிடைத்த போலீசார் சம்பவ இடத்திற்கு வந்து புஷ்பாவின் சடலத்தை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். மேலும் இதுதொடர்பாக போலீசார் வழக்குப்பதிவு செய்து தலைமறைவான ஷேக் ஷாமை தேடி வருகின்றனர்.