வெளிநாடுகளில் விற்பனை செய்ய காரில் கடத்திய ரூ.22 கோடி மதிப்பிலான சிலைகள் மீட்பு: 3 பேர் கைது
அப்போது, தஞ்சாவூர் பெரியார் சமத்துவபுரம் பஸ் நிறுத்தம் அருகே சந்தேகத்திற்கிடமாக நின்றிருந்த காரில் சோதனை செய்தனர். இதில் உள்ளே மறைத்து வைத்திருந்த 6 சாக்கு பைகளை திறந்து பார்த்தபோது, திரிபுரந்தகர், தேவதாந்திர தக்ஷிணாமூர்த்தி, ரிஷபதேவர், அம்மன் / தேவி சிலைகள் என 6 சாமி சிலைகள் இருந்தது கண்டுபிடிக்கப்பட்டது. இதையடுத்து, டிரைவரான சேலம் மாவட்டம் கொங்கணாபுரத்தை சேர்ந்த ராஜேஷ் கண்ணன் (42), நண்பர் மயிலாடுதுறை மாவட்டம், கொருக்கையை சேர்ந்த லெட்சுமணன் (64) மற்றும் மருமகன் திருமுருகன் (39) ஆகிய 3 பேரையும் கைது செய்தனர்.
இது குறித்து சிலை கடத்தல் தடுப்பு பிரிவு போலீசார் கூறுகையில், ‘‘மயிலாடுதுறை மாவட்டம், கொருக்கை கிராமத்தை சேர்ந்த லெட்சுமணன் 5 ஆண்டுகளுக்கு முன்பு வீட்டின் கட்டுமானத்திற்காக குழிதோண்டியுள்ளார். அப்போது, தொன்மை வாய்ந்த 6 சிலைகள் கிடைத்துள்ளன. இதுபற்றி அதிகாரிகளுக்கு தெரியப்படுத்தாமல் வீட்டிலேயே சிலைகளை பதுக்கி வைத்துள்ளார். தனது நண்பரான ராஜேஷ்கண்ணனுக்கும், மருமகனுக்கும் தெரிவித்துள்ளார். அவர்கள் கூறியபடி சிலைகளை விற்க காரில் எடுத்து சென்றபோது சிக்கினர். கைப்பற்றப்பட்ட சிலைகளின் மதிப்பு ரூ.22 கோடி இருக்கும்’’ என்று தெரிவித்தனர்.
