ஆடி திருவிழாக்களால் அதிரடி சேல்ஸ் அய்யலூர் வாரச்சந்தையில் ரூ.2 கோடிக்கு ஆடு விற்பனை

வேடசந்தூர் : ஆடி திருவிழாக்களையொட்டி அய்யலூர் வாரச்சந்தையில் நேற்று ஒரே நாளில் ரூ.2 கோடிக்கு ஆடு, கோழிகள் விற்பனையாகின.திண்டுக்கல் மாவட்டம், வேடசந்தூர் அருகே அய்யலூரில் வாரந்தோறும் வியாழக்கிழமை ஆட்டுச்சந்தை நடைபெறும்.

இங்கு மாவட்டத்தின் பல்வேறு பகுதிகளில் இருந்து ஆடு, கோழிகள் விற்பனைக்காக கொண்டு வரப்படும். திண்டுக்கல் மட்டுமின்றி மதுரை, திருச்சி, கரூர், புதுக்கோட்டை உள்ளிட்ட வெளிமாவட்டங்களை சேர்ந்த வியாபாரிகளும் அய்யலூர் சந்தைக்கு வந்து ஆடு, கோழிகளை வாங்கிச் செல்வர்.

ஆடி மாதத்தில் தங்களது குலதெய்வங்களுக்கு ஆடுகளை பலி கொடுத்து படையிலிட்டு வழிபடுவர். மேலும் கிராமப்புற கோயில்களில் ஆடி திருவிழாவில் ஆடுகளை பலியிட்டு பொதுமக்களுக்கு கறி விருந்து வழங்கப்படுவது வழக்கம். இதனால் நேற்று அய்யலூரில் நடந்த ஆட்டுச்சந்தை களைகட்டியது. அதிகாலை முதலே ஆடுகளை விற்க, வாங்க கால்நடை வளர்ப்போர், வியாபாரிகள் குவிந்தனர்.

சந்தை கூடியதும் வியாபாரிகள் போட்டி போட்டு ஆடுகளை வாங்கி வாகனங்களில் ஏற்றி சென்றனர். செம்மறி ஆடுகளை காட்டிலும் வெள்ளாடு விற்பனை அமோகமாக இருந்தது. 10 கிலோ வெள்ளாடு ரூ.8,500க்கும், செம்மறி ஆடு ரூ.6,500க்கும் விற்பனையாகின.

இதுபோல் நாட்டுக்கோழி தரத்திற்கேற்ப கிலோ ரூ.400 முதல் ரூ.450 வரையிலும், கட்டு சேவல்கள் ரூ.3 ஆயிரம் முதல் ரூ.10 ஆயிரம் வரையிலும் விற்பனையாகின.

இதுகுறித்து வியாபாரிகள் கூறுகையில், ‘‘நேற்று நடந்த ஆட்டுச்சந்தையில் விற்பனை நல்ல முறையில் இருந்தது. சந்தை துவங்கிய 4 மணிநேரத்தில் முடிந்தது. ரூ.2 கோடிக்கு ஆடு, கோழிகள் விற்பனையாகின’’ என்றார்.