முதல்வர் மு.க.ஸ்டாலின் பிறந்தநாளையொட்டி அன்னம்தரும் அமுதக்கரங்கள் 200வது நிகழ்ச்சி: அமைச்சர்கள் ராஜகண்ணப்பன், பி.கே.சேகர்பாபு பங்கேற்பு

சென்னை: முதல்வர் மு.க.ஸ்டாலின் பிறந்தநாளையொட்டி, அமைச்சர் பி.கே.சேகர்பாபு ஏற்பாட்டில், அன்னம் தரும் அமுதக் கரங்கள் என்ற நிகழ்ச்சி மூலம் ஏழை எளிய மக்களுக்கு வருடம் முழுவதும் அன்னதானம் வழங்கப்பட்டு வருகிறது. அதன்படி, சென்னை கொளத்தூர் சீனிவாசன் நகரில், அன்னம் தரும் அமுதக் கரங்கள் 200வது நிகழ்ச்சி நேற்று நடைபெற்றது. அமைச்சர் பி.கே.சேகர்பாபு தலைமை வகித்தார். இதில் அமைச்சர் ராஜகண்ணப்பன் பங்கேற்று பொதுமக்களுக்கு அன்னதானம் வழங்கினர். பின்னர் அவர் நிருபர்களிடம் கூறியதாவது: ஓட்டுப்போட தெரியாதவர்கள் 10, 12, 13 என சினிமா பார்க்கக் கூடிய வயதில் மாநாடுக்கு வருவார்கள். அதனால் அதை கண்டுகொள்ளக்கூடாது. எங்களை பொறுத்தவரை ஆக்கப்பூர்வமான பணிகளை மேற்கொண்டு வருகிறோம். தமிழ்நாடு உரிமைக்காக முதல்வர் மு.க.ஸ்டாலின் போராடி வருகிறார்.

முதலமைச்சர் யாருக்கும் அடிபணிந்தவர் கிடையாது. மக்கள் கடமைகளை நிறைவேற்றுவதில் சரியாக இருக்கவேண்டும் என்பது தான் அவரின் முதல் கடமை. 33 சதவீதம் ஒரு நாட்டில் காடு இருக்கவேண்டும். தமிழத்தில் 26 சதவீதம்தான் உள்ளது. நமது ஆட்சி காலத்தில் மீதம் உள்ள சதவீதத்தை எட்டும் வகையில் பணிகள் நடைபெற்று வருகிறது. கர்நாடகா, கேரளா உள்ளிட்ட மாநிலங்களில் புலி, யானைகள் அதிகமாகியுள்ளது. தமிழகத்தில் தடுப்பு வழி அமைத்துள்ளோம்‌. புகார் வரும் இடங்களில் சிறுத்தைகளை பிடித்து வருகிறோம். மக்கள் பாதுகாப்பாக இருக்க வேண்டும் என்று செயல்படுகிறோம். அதிமுக ஒரு கட்சியே கிடையாது. அங்குள்ள தொண்டர்கள் எல்லாம் திமுகவுக்கு வந்துவிட்டார்கள். வரும் தேர்தலில் திமுக 200 தொகுதிகளுக்கு மேல் வெல்லும். தெற்கில் 27 தொகுதிகளை அதிமுக வைத்துள்ளார்கள். இந்த முறை 7 தொகுதிகளில்தான் வெற்றி பெறுவார்கள்.

இந்த முறை தெற்கில் 33 தொகுதிகளில் திமுக வெற்றிபெறும். இவ்வாறு அமைச்சர் கூறினார். நிகழ்ச்சியில் கலாநிதி வீராசாமி எம்பி, ஜோசப் சாமுவேல் எம்எல்ஏ, மண்டல குழு தலைவர்கள் சரிதா, கூ.பி. ஜெயின், ராமலு, பி.கே.மூர்த்தி, பகுதி செயலாளர்கள் ஐசிஎப் முரளி, நாகராஜன், தலைமை செயற்குழு உறுப்பினர்கள் மகேஷ்குமார், சந்துரு, சம்பத்குமார் கலந்து கொண்டனர்.