கேரளாவில் இருந்து மருத்துவக்கழிவுகள் கொண்டு வரப்படுவது தடுத்து நிறுத்தம்: ஐகோர்ட் கிளையில் அரசு அறிக்கை

மதுரை: தென்காசியைச் சேர்ந்த சிதம்பரம், ஐகோர்ட் மதுரை கிளையில் தாக்கல் செய்த மனு:

கேரளாவில் இருந்து நெல்லை, தென்காசி மாவட்டங்களில் மருத்துவக்கழிவுகள் தொடர்ந்து கொட்டப்பட்டு வருகிறது. இதை தடுக்க வேண்டும் என கடந்த 2018ல் பொது நல மனு தாக்கல் செய்யப்பட்டது.

அப்போது, நெல்லை கலெக்டர் ஷில்பா தாக்கல் செய்த பதில் மனுவில், ‘நெல்லை கலெக்டர் தலைமையில் சுகாதாரத்துறை, காவல்துறை, போக்குவரத்து துறையின் அலுவலர்களை இணைத்து, மருத்துவ கழிவுகள் மேலாண்மை குழு அமைக்கப்பட்டுள்ளது. இக்குழு மருத்துவக்கழிவுகள் நெல்லை மாவட்டத்திற்குள் நுழையாத வகையில் முன் நடவடிக்கைகள் எடுக்கிறது. கொட்டுவோர் மீது கடுமையான நடவடிக்கை எடுக்கப்பட்டு வருகிறது என பதில் மனு தாக்கல் செய்யப்பட்டது. இதனால், அந்த மனு முடிக்கப்பட்டது. ஆனால், கேரளாவில் இருந்து மருத்துவ கழிவுகள் தொடர்ந்து கொட்டப்பட்டு வருகிறது. எனவே, மருத்துவ கழிவுகள் கொட்டுவதை தடுக்காத நெல்லை கலெக்டர் மீது நீதிமன்ற அவமதிப்பு நடவடிக்கை எடுக்க வேண்டும். இவ்வாறு கூறியிருந்தார்.

இந்த மனு நீதிபதிகள் எஸ்.எம்.சுப்ரமணியம், மரியா கிளெட் ஆகியோர் முன் நேற்று விசாரணைக்கு வந்தது. அரசு பிளீடர் திலக்குமார் ஆஜராகி, கேரள மாநிலத்தில் இருந்து கொண்டுவரும் மருத்துவக்கழிவுகளை முற்றிலும் தடுக்கும்விதமாக மாவட்ட காவல்துறை கண்காணிப்பாளர் தலைமையில் குழு அமைக்கப்பட்டு மருத்துவ கழிவுகள் உள்ளே கொண்டு வருவது தடுக்கப்பட்டு வருகிறது எனக் கூறி அது தொடர்பான அறிக்கையை தாக்கல் செய்தார். இதை பதிவு செய்துகொண்ட நீதிபதிகள் மனுவை முடித்து வைத்தனர்.