வார தொடக்க நாளில் தங்கம் விலை பவுனுக்கு ரூ.400 குறைந்தது

சென்னை: வாரம் தொடக்க நாளான நேற்று தங்கம் விலை பவுனுக்கு ரூ.400 குறைந்தது. தங்கம் விலை இம்மாதம் தொடக்கத்தில் இருந்து அதிரடியாக உயர்ந்து வருகிறது. அதுவும் காலை, மாலை என ஒரு நாளைக்கு 2 முறை தங்கம் விலை உயர்வு என்பது இருந்தது. இதன் ஒரு பகுதியாக கடந்த 17ம் தேதி ஒரு பவுன் ரூ.97,600 என்ற இதுவரை இல்லாத வரலாற்று உச்சத்தை எட்டியது. அதன் பிறகு தங்கம் விலை ஏற்றம், இறக்கத்துடன் காணப்பட்டு வருகிறது.

இந்நிலையில் கடந்த 25ம் தேதி தங்கம் விலை கிராமுக்கு ரூ.100 உயர்ந்து ஒரு கிராம் ரூ.11,500க்கும், பவுனுக்கு ரூ.800 உயர்ந்து ஒரு பவுன் ரூ.92 ஆயிரத்துக்கும் விற்றது. நேற்று முன்தினம் ஞாயிற்றுக்கிழமை என்பதால் தங்கம் மார்க்கெட்டுக்கு விடுமுறை. இதனால், தங்கம் விலையில் மாற்றம் எதுவும் இல்லாமல், முந்தைய நாள் விலையிலேயே தங்கம் விற்றது. ஒரு நாள் விடுமுறைக்கு பிறகு நேற்று தங்கம் மார்க்கெட் தொடங்கியது.

அதுவும் வாரம் தொடக்க நாளான நேற்று காலையில் தங்கம் விலை குறைந்திருந்ததை பார்க்க முடிந்தது. நேற்று காலை கிராமுக்கு ரூ.50 குறைந்து ஒரு கிராம் ரூ.11,450க்கும், பவுனுக்கு ரூ.400 குறைந்து ஒரு பவுன் ரூ.91,600க்கு விற்பனையானது. அதே நேரத்தில் வெள்ளி விலையில் நேற்று எந்தவித மாற்றமும் ஏற்படவில்லை. ஒரு கிராம் வெள்ளி ரூ.170க்கும், பார் வெள்ளி 1 லட்சத்து 70 ஆயிரம் ரூபாய்க்கும் விற்றது.