சட்டமன்றத்திற்குள் குட்கா கொண்டு சென்ற விவகாரம்; உரிமை மீறல் குறித்து மீண்டும் விசாரணை: மேல்முறையீட்டு வழக்கில் உயர் நீதிமன்றம் உத்தரவு

சென்னை: முந்தைய அதிமுக ஆட்சியில் சட்டமன்றத்துக்குள் குட்கா கொண்டு சென்ற விவகாரம் தொடர்பான உரிமை மீறல் நோட்டீசுக்கு விளக்கம் அளிக்குமாறு சம்மந்தப்பட்ட 18 திமுக எம்.எல்.ஏ.க்களுக்கு உத்தரவிட்டதுடன், உரிமை குழு மீண்டும் விசாரித்து முடிவெடுக்குமாறு சென்னை உயர் நீதிமன்றம் கூறியுள்ளது. 2017ம் ஆண்டு முந்தைய அதிமுக ஆட்சியில் சட்டமன்றத்துக்குள் குட்கா கொண்டு சென்றதாக, அப்போதைய எதிர்க்கட்சி தலைவரும், தற்போதைய முதல்வருமான மு.க.ஸ்டாலின் உள்ளிட்ட 19 திமுக எம்.எல்.ஏ.க்களுக்கு எதிராக உரிமை மீறல் நோட்டீஸ் அனுப்பப்பட்டது. இந்த நோட்டீசை ரத்து செய்து சென்னை உயர் நீதிமன்ற தனி நீதிபதி உத்தரவிட்டார். இந்த உத்தரவை எதிர்த்து முந்தைய ஆட்சியில் தாக்கல் செய்த மேல் முறையீட்டு வழக்குகள் நீதிபதிகள் எஸ்.எம்.சுப்பிரமணியம் மற்றும் குமரப்பன் அமர்வில் விசாரணைக்கு வந்தது.

வழக்கை விசாரித்த நீதிபதிகள், உரிமை மீறல் நோட்டீசை எதிர்த்து முன்கூட்டியே வழக்கு தொடரப்பட்டுள்ளது. அந்த நோட்டீஸ் ஒரு முடிவை எட்ட வேண்டும். சட்டமன்றத்தின் பதவிக்காலம் முடிந்து விட்டால் உரிமை மீறல் பிரச்சனை காலாவதியாகி விட்டதாக திமுக எம்எல்ஏக்கள் தரப்பில் முன்வைக்கப்பட்ட வாதத்தை ஏற்க முடியாது. எனவே உரிமை மீறல் நோட்டீசை ரத்து செய்து கடந்த 2021 பிப்ரவரி மாதம் தனி நீதிபதி பிறப்பித்த உத்தரவை ரத்து செய்கிறோம். இதனால் உரிமை மீறல் நோட்டீசுக்கு முதலமைச்சர் மு.க.ஸ்டாலின் உள்ளிட்ட திமுக எம்எல்ஏக்கள் உரிமை குழுவிடம் விளக்கம் அளிக்க வேண்டும். சட்டமன்ற விதிகளை பின்பற்றி, விசாரணை நடத்தி உரிமைக்குழு இறுதி முடிவு எடுக்க வேண்டும் என்றும் உத்தரவிட்டனர்.