ராஜகோபுர தரிசனம்!

மன்னார்குடி ராஜகோபால சுவாமி கோயில்

திருவாரூர் மாவட்டம் மன்னார்குடியில் ராஜகோபால சுவாமி கோவில் அமைந்துள்ளது. கேரள மாநிலத்தில் உள்ள குருவாயூரைப் போல, இந்த ஆலயம் இருக்கும் திருத்தலத்தினை ‘தட்சிண துவாரகை’ என்று அழைக்கிறார்கள். கி.பி 1070 - 1125 காலகட்டத்தில் சோழ ஆட்சியாளர்களான முதலாம் குலோத்துங்க சோழனால் சுண்ணாம்புக் கலவை மற்றும் செங்கல் கொண்டு இந்த கோயில் கட்டப்பட்டதாக வரலாறு கூறுகிறது. பின்னர் கி.பி 16 மற்றும் 17ம் நூற்றாண்டுகளில் நாயக்க மன்னர்களால் மேம்படுத்தப்பட்டு இந்த இடம் சம்பக்காரண்ய க்ஷேத்திரம் என்றும் அழைக்கப்படுகிறது.

இங்குள்ள மூலவர் வாமதேவப் பெருமாள் என்ற திருநாமம் கொண்டுள்ளார். தாயார் ‘செங்கமலத் தாயார்’. கோபிலர், கோபிரளயர் என இரண்டு முனிவர்கள் இருந்தனர். அவர்கள் இருவரும் கண்ணனை பார்க்க துவாரகை நோக்கிப் புறப்பட்டனர். வழியில் அவர்களை சந்தித்த நாரதர் கண்ணன் அவதாரம் முடிந்துவிட்டதாக கூறினார். அதனால் கண்ணனை நினைத்து இருவரும் கடும் தவம் மேற்ெகாண்டனர். அவர்கள் முன் கண்ணன் அவதரித்து அவரின் லீலைகளை காட்டி அருளினார். பின்னர் முனிவர்களின் வேண்டுதலை ஏற்று இத்தலத்தில் எழுந்தருளி மக்களுக்கு ஆசி வழங்கி வருவதாக வரலாற்றில் இடம் பெற்றுள்ளது.

16 கோபுரங்கள், 7 பிரகாரங்கள், 18 விமானங்கள், 24 சன்னதிகள், 9 தீர்த்தங்கள் என 33 ஏக்கர் பரப்பளவில் இக்கோயில் அமைந்துள்ளது. இங்குள்ள உற்சவரின் சிலை வெண்கலத்தாலானது. அவர் இடையன் கோலத்தில் வேஷ்டி தலைபாகை அணிந்து, வலது கையில் வெண்ணெய் பானை வைத்து பாலகன் வடிவில் காட்சியளிக்கிறார். இடுப்பில் சலங்கை, சாவிக்கொத்து, கையில் வளையல், காலில் தண்டை, கொலுசு, ஒரு காதில் மட்டும் குண்டலம் அணிந்து அழகாகவும் கம்பீரமாகவும் தோற்றமளிக்கிறார் வாசுதேவன் பொதுவாக ராஜகோபுரத்தில் உள்ள அனைத்து நிலைகளிலும் சுதை சிற்பங்கள் இருக்கும். ஆனால் இக்கோயிலில் அமைந்துள்ள ராஜகோபுரத்தில் 11 நிலையில் கீழிருந்து மேலாக முதல் ஆறு நிலைகளில் சுதை சிற்பங்கள் எதுவும் வடிவமைக்கப்படவில்லை. ஏழாவது நிலையில் இருந்து தான் சுவாமி சிலைகள் அமைக்கப்பட்டுள்ளது. இத்தகைய ேகாலத்தில் ராஜகோபுரத்தை காண்பது மிகவும் அரிது.

மன்னார்குடி ஸ்ரீ ராஜாதி ராஜா சதுர்வேதி மங்கலம் என்று அழைக்கப்படும் நகரம் கோயிலைச் சுற்றி அமைக்கப்பட்டு இருந்தது. சோழப் பேரரசின் அடுத்தடுத்த மன்னர்களான, மூன்றாம் ராஜராஜ சோழன், மூன்றாம் ராஜேந்திர சோழன் மற்றும் தஞ்சாவூர் நாயக்கர்களின் மன்னர்கள், அச்யுத தேவராயா மேலும் கோயிலை விரிவுபடுத்தினர். இந்தக் கோவிலில் ஹொய்சாள மன்னர்களின் கல்வெட்டுகள் மற்றும் சில விஜயநகர மானியங்கள் மற்றும் பிற்கால நாயக்கர்கள் மற்றும் மராட்டியர்களின் பல பதிவுகள் உள்ளன. தஞ்சாவூர் நாயக்கர்கள் கோவிலை தங்கள் வசம் செய்து முதன்மை ஆலயமாக மாற்றினர்.

ஆனால் தற்போதைய கோவில் அமைப்பு, 1000 தூண்கள் கொண்ட மண்டபம், கோவில் நுழைவாயில் பிரதான கோபுரம் மற்றும் கோவிலைச் சுற்றி பெரிய சுற்றுச்சுவர் ஆகியவை மன்னன் விஜயராகவ நாயக்கரால் (1532-1575 CE) கட்டப்பட்டது. ரகுநாதப்யுதயம், நாயக்கர்களின் கோட்பாடு, விலையுயர்ந்த கற்கள் பதிக்கப்பட்ட கவசத்தை அரசனால் பிரதான தெய்வத்திற்கு நன்கொடையாக வழங்கியதை விளக்குகிறது. மன்னார்குடி உச்சியில் இருந்து ஸ்ரீ ரங்கம் ரங்கநாதசுவாமி கோவிலை தரிசிக்கும் வகையில் கோவிலில் பெரிய கோபுரம் எழுப்பப்பட்டுள்ளது. நாயக்கர்கள் இசையில் ஆர்வம் கொண்டிருந்ததால், முகவினா, தண்டே, கொம்பு, சந்திரவாலயா, பேரி மற்றும் நாதஸ்வரம் போன்ற கருவிகள் பொதுவாக கோயில் சேவையில் பயன்படுத்தப்பட்டன.

59 மீட்டர் உயரமுள்ள ராஜகோபுரம் ஈர்க்கக்கூடிய கட்டிடக்கலை அதிசயமாகும். மேலும் அதன் சிக்கலான சிற்பங்கள் பண்டைய இந்திய சிற்பிகளின் கலை வலிமைக்கு ஒரு சான்றாகும்.

ஸ்ரீ ரங்கம் ரங்கநாத சுவாமி கோவிலை அதன் உச்சியில் இருந்து மன்னர் பார்க்கும் வகையில் கோவிலின் கோபுரம் கட்டப்பட்டுள்ளது என்பது குறிப்பிடத்தக்கது. தமிழ்நாட்டின் வளமான கலாச்சார பாரம்பரியத்தின் பெருமைமிக்க அடையாளமாகவும், தென்னிந்தியாவில் இந்து நாகரிகத்தின் நீடித்த பாரம்பரியத்திற்கு சான்றாகவும் இக்கோவிலின் கோபுரம் கம்பீரமாக காட்சியளிக்கிறது.

திலகவதி