எந்தெந்த காலங்களில் சிவ தரிசனம் செய்யலாம்?

03:12 PM Oct 31, 2025 IST

?பலிபீடம் ஏன் இருக்கிறது? அதன் தேவை என்ன?

- சரண்யாகுமரன், தாம்பரம்.

பலிபீடம் என்பது ஆலயத்தின் நுழைவில் கொடிமரத்திற்கு முன்புறம் அமைந்திருக்கும். இங்கே வழிபாட்டின் போது தேவதைகளுக்கான ``அவி’’ அதாவது நிவேதனம் சாதிப்பார்கள். இது பெரும்பாலும் எல்லாக் கோயில்களிலும் இருக்கும். மூன்று அடுக்கு அமைந்து அதன் மேல் புறம் தாமரை மலர் போல விரிந்தபடி இந்த பலிபீடம் இருக்கும். சில கோயில்களில் சிற்பங்களும் அமைத்து இருப்பார்கள். புகழ் பெற்ற சில கோயில்களில் பலிபீடத்திற்குத் தங்கக் கவசம் சாத்தியிருப்பார்கள். ஆலயத்திற்குள்ளே நுழையும் பொழுது பலிபீடத்தையும் கொடி மரத்தையும் வணங்கி விட்டுத் தான் உள்ளே நுழைய வேண்டும். அப்படி பலிபீடத்தை வணங்குகின்ற பொழுது, மனதார நம்முடைய கெட்ட எண்ணங்களை எல்லாம் பலி கொடுத்துவிட்டு, அதாவது நீக்கிக் கொண்டு தூய்மையானவர்களாக உள்ளே நுழைய வேண்டும். பலிபீடத்திற்கு ஆகமரீதியாக ஆயிரம் காரணங்கள் சொன்னாலும், உண்மையில் ஒரு பக்தன் இந்தப் பிரகிருதி சம்பந்தத்தாலே வருகின்ற அகங்கார மம காரங்களைப் பலி கொடுத்துவிட்டு உள்ளே நுழைய வேண்டும் என்பதுதான் தாத்பரியம்.

?துறவு பெற்றால்தான் ஞானத்தை அடையமுடியுமா?

- ஜே.வாசுதேவன், குணசீலம்.

அப்படியெல்லாம் அவசியம் இல்லை. துறவு மேற்கொண்டு, ஞானம் அடையாதவர்கள் உண்டு. இல்லறத்தில் இருந்தபடியே ஞானத்தை அடைந்தவர்களும் உண்டு. மெய்ஞ்ஞானமாகிய உண்மையைக் கண்டடைவதுதான் துறவின் நோக்கம். உண்மை என்பது எங்கும் இருக்கிறது. அது துறவிலும் இருக்கிறது, இல்லறத்திலும் இருக்கிறது, அது இல்லாத இடம் இல்லை. துறவில்தான் உண்மை இருக்கிறது என்று சொன்னால், இல்லறத்தில் இல்லை என்று ஆகிவிடும். அப்படி உண்மை ஓரிடத்தில் இருந்து ஒரு இடத்தில் இல்லாமல் போனால், அதற்கு பெயர் உண்மை அல்ல. இதை உணர்வதுதான் ஞானம். அது இல்லறத்தில் இருந்தபடியே உணரமுடியும்.

?துன்பமில்லாத ஓர் வாழ்வை அமைத்துக்கொள்ள முடியாதா?

- செல்லதுரை, கரூர்.

இதற்கு ஓஷோ அற்புதமான பதிலைச் சொல்லுகிறார். வாழ்வில் இன்ப துன்பம் கலந்தே இருக்கும். ஒன்றிணைந்தே செல்லும். நரகத்திலும் மகிழ்ச்சிக்கான கணங்கள் உண்டு. சொர்க்கத்திலும் சலிப்பும் வேதனையும் உண்டு. “சொர்க்கத்தில் எல்லையற்ற இன்பங்கள் கொட்டிக் கிடப்பதால் அங்கே நான் போக விரும்பவில்லை” என்று பெர்ட்ரண்ட்ரசல் கூறினார். துன்பத்தை உணராமல் இன்பத்தை எப்படி அறிந்து கொள்ள முடியும்? நோயை உணராமல் உடல் நலத்தை அறிவது எப்படி? விரும்பியதெல்லாம் உடனே கிடைத்துவிட்டால், அவற்றைப் பெறுவதால் எப்படி மகிழ்ச்சி உண்டாகும்? ஓஷோ கூறியது போலவே நம்முடைய சான்றோர்களும் சொல்லியிருக்கின்றார்கள். “நிழலின் அருமை வெயிலில் தெரியும்” வெயில் இல்லாமல் நீங்கள் எத்தனை நிழல் இருந்தாலும் அதன் அருமையை உணர முடியாது. இன்பத்தை நுகர வேண்டும் என்று சொன்னால், துன்பத்தின் தன்மை என்னவென்று தெரிந்து கொண்டால்தான் முடியும். எனவேதான் வாழ்வில் இரண்டும் தேவை.