அமணீஸ்வரர் கோயில்

ராஜகோபுர தரிசனம்!

அமணீஸ்வரர் திருக்கோயில், தமிழ்நாட்டின் திருச்சி மாவட்டத்தில் உள்ள கோபுரப்பட்டி என்னும் ஊரில் அமைந்துள்ளது. இது ஒரு குற்றாலக் கங்கை சாயல் கொண்ட இயற்கை அமைப்புடன் அமைதியான கிராமப்புறத்தில் வேத வாத்தியங்கள் ஒலிக்கும் ஒரு பழமையான சிவன் திருத்தலம். இத்தலத்தின் பிரதான மூலவர் அமணீஸ்வரர். இங்குள்ள சிவலிங்கம் மிகவும் அழகாகவும், தொன்மையை உணர வைக்கும் பாணியிலும் வடிவமைக்கப்பட்டுள்ளது. தேவியின் திருநாமம் அவுடைநாயகி, அவுடை அம்பிகை என அழைக்கப்படுகிறது.

‘அமணி’ என்பது சங்கக்காலத்திலிருந்தே இடம்பெறும் தமிழ்ச்சொல்லாகும். இது ‘ஆயிரம் மணி நாதன்’ எனவும், பின்பு ‘அமணீஸ்வரர்’ எனவும் சொல்லப்படுகிறது. சிலர் இக்கோயில் ஜைன சமயத்தினரால் வழிபட்டது என்று கூறுகிறார்கள். ‘அமணர்’ என்பது ஜைனர்களின் அடையாளமாக கூறப்படுகிறது. கோயிலின் கட்டடக்கலை மற்றும் வடிவமைப்பை பார்க்கும் போது ஒன்பதாம் நூற்றாண்டுக்கும் பன்னிரெண்டாம் நூற்றாண்டுக்கும் இடைப்பட்ட காலத்தில் கட்டப்பட்டதாக இருக்கலாம் என்று கருதப்படுகிறது. தஞ்சை நாயக்கர் கலைச்சிற்ப பாணியினை இங்கு காணலாம். சிலர் சேர அரசர்களின் காலக்கட்டத்தில் கட்டப்பட்டது என்றும் கூறுகின்றனர்.

இக்கோயில் விமானத்திற்கு தளம் கிடையாது. சோழர்கள் காலத்தில் கோயிலின் கோபுரம் செங்கற்களால் கட்டப்பட்டதாகவும், அவை சிதைவுற்றதாக கூறப்படுகிறது. அதன் பிறகு அவை மீண்டும் அமைக்கப்படாமல் சாதாரணமாக கட்டப்பட்டுள்ளது. மேலும், இத்தலம் திராவிட பாணியில் அமைக்கப்பட்டுள்ளது. சதுர வடிவமான கருவறையில் லிங்க வடிவில் இறைவன் உள்ளார். அர்த்த மண்டபத்தில் சோழர்கால உருளைத்தூண்கள் உள்ளன. தேவக்கோட்டங்களில் முறையே சிற்பங்கள் அமைக்கப்பட்டுள்ளன. தாங்குதளத்தில் ராமாயண மற்றும் சிவ வடிவ புடைப்புகளை சிற்பமாகவும் மற்றும் கல்வெட்டுகளையும் காணலாம். சோழர்கள் காலத்தில் இக்கோயில் மிகவும் சிறப்புடையதாய் இருந்திருக்கிறது என்பதற்கு இங்குள்ள கல்வெட்டுகளே சான்று. கருவறை விமானத்தின் கூரைப்பகுதியில் கொடுங்கைக்கு கீழே நாற்புறமும் செல்லும் பூதவரிகள் காணப்படுகின்றன.

இந்தக் கோயில் சுமார் கி.பி. 975ம் ஆண்டில் கட்டப்பட்டது என்று தொல்லியல் மற்றும் கோயில் ஆய்வுகள் உரைத்துள்ளன. அதற்கு சான்றாக கல்வெட்டுகளில் உத்தம சோழன், ராஜராஜ சோழன் I, ராஜேந்திர சோழன் I ஆகியோரின் பெயர்கள் பொறிக்கப்பட்டுள்ளன. மேலும், உத்தம சோழனின் தாயாரான செம்பியன் மாதேவி கோவில்களுக்கு விலங்குகளை தானமாக வழங்கியுள்ளார் என்று அங்குள்ள கல்வெட்டுகள் குறிப்பிடுகிறது. கோயிலிலுள்ள நிழல்படாத தூண்கள் மற்றும் சிற்ப பாணிகள் சோழர் கால கட்டடக்கலையின் தனிச்சிறப்பை பிரதிபலிக்கின்றன.

கோயிலின் கருவறையின் தெற்குச் சுவரில் தட்சிணாமூர்த்தியும், வடக்குப் பகுதியில் நான்கு தலை மற்றும் கரங்களுடன் பிரம்மாவும், மேற்கு சுவரில் விஷ்ணுவும் (பாதி சிவன் மற்றும் பாதி விஷ்ணுவடிவில்), வடக்குப் பகுதியில் துர்கை அம்மனும், நுழைவாயிலுக்கு முன் உள்ள மண்டபத்தில் நந்தியும் வீற்றிருக்கிறார்கள். அம்மன் அவுடைநாயகிக்கு தனிச் சன்னதி அமைக்கப்பட்டுள்ளது.

தொகுப்பு: திலகவதி