Dinakaran Cinema Button CINEMA Astrology Button ASTROLOGY  Magazines Logo VIDEOS Sun network Logo Epaper LogoEpaper Facebook
search-icon-img
Advertisement

வாழப்பாடி அருகே சோகம் வேனுக்கு அடியில் சிக்கி 2 வயது சிறுவன் பலி

சேலம் : வாழப்பாடி அருகே வேனுக்கு அடியில் சிக்கி 2 வயது சிறுவன் பலியான சம்பவம் பெரும் சோகத்தை ஏற்படுத்தியுள்ளது. சேலம் மாவட்டம் வாழப்பாடி அருகேயுள்ள ஏத்தாப்பூர் வடுகத்தாம்பட்டி கிழக்குகாடு பகுதியை சேர்ந்தவர் வேல்மணி (31). இவரது மனைவி பிரியா (25). இவர்களுக்கு 5, 2 வயதில் இரு மகன்கள். நேற்று முன்தினம் மாலை 6.30 மணியளவில் வீட்டின் அருகில் 2 வயது சிறுவனான வெற்றிவாசன் விளையாடிக் கொண்டிருந்தான்.

அப்போது, பக்கத்து வீட்டை சேர்ந்த மணிகண்டன் என்பவர், கோழி லோடு ஏற்றும் தனது பிக்கப் வேனை எடுத்துள்ளார். வேன் எடுக்கப்படுவதை பார்த்ததும் சிறுவன் வெற்றிவாசன், அதன் அருகில் ஓடிவந்துள்ளான். இதனை மணிகண்டன் பார்க்கவில்லை. அவர், வேனை இடதுபுறமாக திருப்பியுள்ளார். அப்போது வலது புறத்தில் இருந்து ரோட்டிற்கு வந்த சிறுவன் வெற்றிவாசன், வேனின் பின் சக்கரத்தில் சிக்கினான்.

வயிற்றில் சக்கரம் ஏறி இறங்கியது. இவ்விபத்தில் சிறுவன் வெற்றிவாசன் சம்பவ இடத்திலேயே பரிதாபமாக உயிரிழந்தான். சிறுவனின் சடலத்தை பார்த்து, அவரது பெற்றோர் மற்றும் உறவினர்கள் கதறி துடித்தனர். இதுபற்றி தகவல் அறிந்த ஏத்தாப்பூர் போலீஸ் எஸ்ஐ சிவாஜி தலைமையிலான போலீசார் சம்பவ இடம் சென்று விசாரித்தனர்.

அவர்கள், வேன் ஏறி பலியான சிறுவன் வெற்றிவாசனின் சடலத்தை மீட்டு பிரேதப்பரிசோதனைக்காக ஆத்தூர் அரசு மருத்துவமனைக்கு அனுப்பி வைத்தனர். தொடர்ந்து விபத்தை ஏற்படுத்திய மணிகண்டன் மீது வழக்குப்பதிவு செய்து விசாரித்து வருகின்றனர். 2வயது சிறுவன் வேனுக்கு அடியில் சிக்கி உயிரிழந்த இச்சம்பவம் அவரது உறவினர்களிடையே பெரும் சோகத்தை ஏற்படுத்தியுள்ளது.