கமல், 3 திமுக எம்.பி.க்கள் பதவியேற்பு

புதுடெல்லி: தமிழ்நாட்டில் இருந்து மாநிலங்களவைக்கு தேர்ந்தெடுக்கப்பட்ட மதிமுக பொதுச்செயலாளர் வைகோ, திமுகவை சேர்ந்த சண்முகம், எம்.எம்.அப்துல்லா, பி.வில்சன், பாமக தலைவர் அன்புமணி, அதிமுகவை சேர்ந்த சந்திரசேகரன் ஆகிய ஆறு எம்பிக்களின் பதவிக்காலம் நேற்றுமுன்தினத்துடன் நிறைவடைந்தது. மேற்கண்ட ஆறு எம்பிக்களின் பதவியிடங்களுக்கான தேர்தலை கடந்த ஜூன் 19ம் தேதி நடத்தி முடித்த இந்திய தலைமை தேர்தல் ஆணையம், அன்றைய தினமே அதன் முடிவுகளை வெளியிட்டிருந்தது.

இந்த நிலையில்தேர்தல் ஆணையத்தின் அறிவிப்பின் அடிப்படையில் திமுகவை சேர்ந்த மூன்று எம்பிக்கள் அதாவது பி.வில்சன், கவிஞர் ராஜாத்தி என்கிற சல்மா, எஸ்.ஆர்.சிவலிங்கம் ஆகியோர் மாநிலங்களவையில் எம்பிக்களாக நேற்று காலை பதவியேற்று கொண்டனர். இதில் பி.வில்சன் மட்டும் இரண்டாவது முறையாக மாநிலங்களவை எம்பியாக பதவியேற்று கொண்டார். இவர்களுக்கு மாநிலங்களைவை துணைத் தலைவர் ஹரிவன்ஷ் நாராயண் சிங் பதவிப் பிரமாணம் செய்து வைத்தார்.

இதேபோன்று திமுக கூட்டணி கட்சியான மக்கள் நீதி மய்யத்தின் தலைவரும், நடிகருமான கமல்ஹாசனும் நேற்று முதல் முறையாக மாநிலங்களைவை உறுப்பினராக பதவியேற்றுக் கொண்டார். நாடாளுமன்றத்துக்கு வருகை தந்த கமல்ஹாசன் தமிழ் மொழியில் உறுதிமொழி எடுத்துக் கொண்டார். நிறைவாக ‘‘விழுமிய முறையுடன்’ உறுதி கூறுகிறேன் என கமல்ஹாசன் தெரிவித்தார். அதிமுகவை சேர்ந்த இன்பதுரை, தனபால் ஆகியோர் வரும் திங்கட்கிழமை எம்பியாக பதவியேற்க உள்ளனர்.