![]()
சென்னை: பாமக தலைவர் அன்புமணி வெளியிட்டுள்ள அறிக்கை: இந்திய அரசியலமைப்பு சட்டத்தால் குடிமக்களுக்கு வழங்கப்பட்டுள்ள 10 வகையான உரிமைகளை மீட்டெடுக்கும் நோக்குடன் கடந்த ஜூலை 25ம் தேதி திருப்போரூர் நகரில் தொடங்கி தமிழக மக்கள் உரிமை மீட்புப் பயணத்தை மேற்கொண்டு வருகிறோம். பயணத்தின் முதற்கட்டம் வரும் 4ம் தேதி மாலை திருப்பத்தூர் நகரில் நிறைவடைய உள்ளது. அதைத் தொடர்ந்து இரண்டாம் கட்ட தமிழக மக்கள் உரிமை மீட்புப் பயணம் வரும் 7ம் தேதி வந்தவாசியில் தொடங்கி, ஆகஸ்ட் 18ம் தேதி கிருஷ்ணகிரி மாவட்டம் ஓசூரில் நிறைவடைய உள்ளது. இரண்டாம் கட்ட பயணத்தின் வந்தவாசி - செய்யாறு, பென்னாத்தூர் - போளூர், திண்டிவனம் - செஞ்சி, மைலம், விழுப்புரம் - விக்கிரவாண்டி, ரிஷிவந்தியம் - உளுந்தூர்பேட்டை, பர்கூர் - ஊத்தங்கரை, கிருஷ்ணகிரி - ஒசூர் பயணம் மேற்கொள்ளப்பட உள்ளன. தமிழ்நாட்டு மக்களின் உரிமைகளையும், நலன்களையும் மீட்டெடுப்பதற்கான இந்த தமிழக மக்கள் உரிமை மீட்புப் பயணத்தில் அனைத்துத் தரப்பு மக்களும் பெருமளவில் பங்கேற்று ஆதரவளிக்க வேண்டும். இவ்வாறு அதில் குறிப்பிடப்பட்டுள்ளது.
