வாக்காளர் பட்டியல் தீவிர திருத்த விவகாரத்தில் ஆதார், ரேஷன் அட்டையை நிராகரிக்க கூடாது: தேர்தல் ஆணையத்திற்கு உச்ச நீதிமன்றம் மீண்டும் வலியுறுத்தல்

புதுடெல்லி: பீகார் மாநில சட்டமன்றத் தேர்தல் விரைவில் நடைபெறவுள்ளது. இந்த நிலையில் அம்மாநிலத்தில் வாக்காளர் பட்டியல் தீவிர திருத்த நடவடிக்கையை இந்திய தேர்தல் ஆணையம் மேற்கொண்டு வருகிறது. கடந்த இரு தினங்களுக்கு முன்பு வரையில் பீகார் மாநிலத்தில் சுமார் 65.2 லட்சம் வாக்காளர்கள் நீக்கம் செய்யப்பட்டுள்ளனர். மேலும் இந்த பணிகள் தொடர்ந்து நடைபெற்று வருகிறது. இதுபோன்ற சூழலில் இந்திய தேர்தல் ஆணையத்தின் மேற்கண்ட நடவடிக்கைக்கு எதிராக உச்ச நீதிமன்றத்தில் பல்வேறு அமைப்புகள் மற்றும் அரசியல் கட்சியின் தலைவர்கள் வழக்கு தொடர்ந்துள்ள வழக்கானது உச்ச நீதிமன்றத்தில் நீதிபதி சூர்யகாந்த் தலைமையிலான அமர்வில் நேற்று மீண்டும் விசாரணைக்கு வந்தது.

அப்போது நீதிபதிகள் எழுப்பிய கேள்வியில்,\”ஆதார் எண், ரேஷன் அட்டை ஆகியவற்றை இருப்பிட ஆவணங்களாக காண்பிக்க தேர்தல் ஆணையம் பரிசீலிக்க வேண்டும். அதேநேரத்தில் சிறப்பு தீவிர வாக்காளர் பட்டியல் திருத்த முறைக்கு நாங்கள் தடை எதுவும் விதிக்கவில்லை.இருப்பினும் திட்டமிட்டபடி ஆகஸ்ட் 1ம் தேதி வாக்காளர் திருத்த பட்டியலை வெளியிடலாம். அதில் தலையிட நாங்கள் விரும்பவில்லை. மேலும் வழக்கை நாளைக்கு (இன்று) ஒத்திவைக்கிறோம். அப்போது இந்த மனுக்கள் மீதான வாதங்களை முன்வைக்கும் வகையில் நேரத்தை தீர்மானிக்கலாம் என்றனர். அப்போது தேர்தல் ஆணையத்தின் தரப்பில் ஆஜரான வழக்கறிஞர்,\” ஆதார் அட்டையை ஆவணமாக பெற முடியாது என்று திட்டவட்டமாக தெரிவித்தனர்.

அப்போது மீண்டும் குறுக்கிட்ட நீதிபதிகள்,\”ஆதார், ரேஷன் அட்டைகளை பெறுவதில் என்ன பிரச்னை உங்களுக்கு உள்ளது. போலி ஆவணங்களை தாக்கல் செய்தது தெரிந்தால் சம்பந்தப்பட்ட நபர்களுக்கு நோட்டீஸ் அனுப்பி விளக்கம் கேட்கலாம். ஒட்டு மொத்தமாக ஆதார் அட்டையை நிராகரிக்கக் கூடாது என்று தேர்தல் ஆணையத்துக்கு மீண்டும் நீதிபதிகள் வலியுறுத்தினர்.